ប្រទេសវៀតណាម ៖ រដ្ឋបាលផ្លូវទឹក និងសមុទ្រវៀតណាម (VIMAWA) បានជំរុញឱ្យក្រសួងសំណង់ឱ្យស្នើសុំក្រសួងការបរទេស (MoFA) ធ្វើការជាមួយរដ្ឋាភិបាលអ៊ីរ៉ង់ ដើម្បីគាំទ្រ និងផ្តល់អាទិភាពដល់ការឆ្លងកាត់ដោយសុវត្ថិភាពរបស់បណ្តាកប៉ាលដឹកជញ្ជូន…
ប្រទេសវៀតណាម ៖ រដ្ឋបាលផ្លូវទឹក និងសមុទ្រវៀតណាម (VIMAWA) បានជំរុញឱ្យក្រសួងសំណង់ឱ្យស្នើសុំក្រសួងការបរទេស (MoFA) ធ្វើការជាមួយរដ្ឋាភិបាលអ៊ីរ៉ង់ ដើម្បីគាំទ្រ និងផ្តល់អាទិភាពដល់ការឆ្លងកាត់ដោយសុវត្ថិភាពរបស់បណ្តាកប៉ាលដឹកជញ្ជូន និងក្រុមនាវិកវៀតណាមឆ្លងកាត់ច្រកសមុទ្រហ័រមូស (Hormuz)។ នេះបើតាមប្រភពពីសារព័ត៌មានវៀតណាម VnExpress ចេញផ្សាយថ្ងៃទី៣១ ខែមីនា ឆ្នាំ២០២៦។
យោងតាមរដ្ឋបាល កប៉ាល់ចំនួន ១៩ គ្រឿងជាកម្មសិទ្ធិសហគ្រាសវៀតណាមកំពុងតែប្រតិបត្តិការនៅមជ្ឈិមបូព៌ា ដោយកប៉ាល់ ៤ គ្រឿងដោតទង់ជាតិវៀតណាម និង ១៥ គ្រឿងដែលបានចុះបញ្ជីក្រោមទង់ជាតិបរទេស។
នៅក្នុងចំណោមក្តីបារម្ភអំពីសន្តិសុខកាន់តែខ្លាំងឡើងក្នុងតំបន់ រដ្ឋបាលបានសង្កត់ធ្ងន់លើតម្រូវការសម្របសម្រួលឱ្យកាន់តែរឹងមាំជាមួយដៃគូពាក់ព័ន្ធ ដើម្បីការពារប្រតិបត្តិការផ្លូវសមុទ្រ និងសុវត្ថិភាពក្រុមនាវិក តាមរយៈការធានាពីអ៊ីរ៉ង់ដើម្បីអនុញ្ញាតឱ្យកប៉ាល់ដោតទង់ជាតិវៀតណាម និងកប៉ាល់ដោតទង់ជាតិបរទេសតែជាកម្មសិទ្ធិរបស់ក្រុមហ៊ុនវៀតណាមអាចធ្វើប្រតិបត្តិការ និងឆ្លងកាត់ច្រកហ័រមូសដោយសុវត្ថិភាព។
តាមសំណើនេះ អាទិភាពដំបូងនឹងត្រូវបានផ្តល់ឱ្យកប៉ាល់ដោតទង់ជាតិវៀតណាមដែលជាកម្មសិទ្ធិសហគ្រាសវៀតណាម ដឹកទំនិញរវាងមជ្ឈិមបូព៌ា និងវៀតណាម។ កម្រិតទី២ នឹងគ្របដណ្តប់លើកប៉ាល់ដោតទង់ជាតិបរទេសជាកម្មសិទ្ធិក្រុមហ៊ុនវៀតណាម ដែលមានសមាជិកក្រុមនាវិកវៀតណាម និងអាទិភាពទី៣ នឹងអនុវត្តចំពោះកប៉ាល់ដោតមានទង់ជាតិបរទេសជាកម្មសិទ្ធិក្រុមហ៊ុនវៀតណាម ដែលមានក្រុមនាវិកបរទេសចូលរួមក្នុងការដឹកជញ្ជូនទំនិញហួសពីទឹកដីវៀតណាម។
រដ្ឋបាលក៏បានស្នើឱ្យអ៊ីរ៉ង់សម្រួលដល់ការឆ្លងកាត់របស់កប៉ាល់ដឹកប្រេងវៀតណាម និងផលិតផលប្រេងកាតពីមជ្ឈិមបូព៌ាទៅកាន់ប្រទេសវៀតណាម ដោយហេតុនេះជួយរក្សាការផ្គត់ផ្គង់ថាមពលឱ្យមានស្ថេរភាពសម្រាប់បណ្តាប្រទេសអាស៊ីអាគ្នេយ៍។ លើសពីនេះ ខ្លួនបានអំពាវនាវឱ្យអ៊ីរ៉ង់ពិចារណាចេញសេចក្តីជូនដំណឹងជាផ្លូវការមួយ ដែលអនុញ្ញាតឱ្យបណ្តាកប៉ាល់ និងក្រុមនាវិកវៀតណាមឆ្លងកាត់ច្រកហ័រមូស តាមរយៈការផ្តល់កុងត្រាដល់ក្រុមហ៊ុនដឹកជញ្ជូន និងម្ចាស់កប៉ាល់វៀតណាម ដើម្បីទទួលបានការធានារ៉ាប់រងហានិភ័យសង្គ្រាម ដែលបច្ចុប្បន្នក្រុមហ៊ុនធានារ៉ាប់រងជាច្រើនបដិសេធ ដោយសារគ្មានកិច្ចសហប្រតិបត្តិការជាផ្លូវការពីអាជ្ញាធរអ៊ីរ៉ង់។
ដើម្បីបង្កើនវិធានការសុវត្ថិភាពបន្ថែមទៀត រដ្ឋបាលផ្លូវទឹក និងសមុទ្រវៀតណាមបានស្នើឱ្យក្រសួងសំណង់ស្នើសុំឱ្យក្រសួងកិច្ចការផ្ទៃក្នុងណែនាំបេសកកម្មការទូតវៀតណាមនៅមជ្ឈិមបូព៌ា ឱ្យតាមដានការវិវឌ្ឍន៍យ៉ាងដិតដល់ ផ្តល់ព័ត៌មានថ្មីៗទាន់ពេលវេលា និងផ្តល់ការគាំទ្រចាំបាច់សម្រាប់បណ្តាកប៉ាល់ និងក្រុមនាវិកវៀតណាមក្នុងករណីមានអាសន្ន៕
ចែករំលែកព័តមាននេះ