រាជធានីភ្នំពេញ ៖ ជនជាតិចិនចំនួន៤នាក់ត្រូវបានកម្លាំងនគរបាលខណ្ឌសែនសុខសហការជាមួយនគរបាលការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលរាជធានីភ្នំពេញឃាត់ខ្លួនជាបន្តបន្ទាប់នៅក្នុងប្រតិបត្តិការបង្ក្រាបគ្រឿងញៀនព្រមទាំងដកហូតបានថ្នាំញៀនមួយចំនួននិងកាំភ្លើងខ្លីចំនួនពីដើម។
ប្រតិបត្តិការបង្ក្រាបនេះ ធ្វើឡើង រយៈពេល០២ថ្ងៃ គឺពីថ្ងៃទី៣០ ដល់ថ្ងៃទី៣១ ខែមីនា ឆ្នាំ២០២៦ នៅ ក្នុងបុរីហ្គ្រេនភ្នំពេញ ភូមិឃ្មួញ សង្កាត់ឃ្មួញ ខណ្ឌសែនសុខ ក្រោមបទបញ្ជាផ្ទាល់ពីសំណាក់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការងនគរបាលជាតិ និងជាស្នងការនគរបាលរាជធានីភ្នំពេញ ។
តាមព័ត៌មានឲ្យដឹងថា មុនឈានដល់ការបង្ក្រាប កម្លាំងសមត្ថកិច្ចជំនាញ បានសហការជាមួយកម្លាំងគណៈបញ្ជាការឯកភាពខណ្ឌសែនសុខ ដោយប្រើវិធានការចុះរដ្ឋបាលត្រួតពិនិត្យទីតាំងផ្ទះលេខ២៣ ផ្លូវJ-01. ក្នុងបុរីហ្គ្រេនភ្នំពេញ ដោយបានឃាត់ជនជាតិចិនម្នាក់ និងបានដកហូតគ្រឿងញៀន សារធាតុផ្សំ រួមទាំងវត្ថុតាងមួយចំនួនទៀត។ ក្រោយពីឃាត់ខ្លួនសាកសួរសមត្ថកិច្ចក៏ធ្វើការស្រាវជ្រាវហើយឈានទៅឆែកឆេរនៅក្នុងបុរីខាងលើដដែលដោយឃាត់ខ្លួនបក្សពួកចំនួន ៣នាក់ទៀត នៅថ្ងៃទី៣១ ខែមីនា ឆ្នាំ២០២៦ដោយបានដកហូតអាវុធខ្លី០២ដើម និងវត្ថុតាងពាក់ព័ន្ធមួយចំនួនទៀតផងដែរ ។
បច្ចុប្បន្ន ជនសង្ស័យទាំង០៤នាក់ និងវត្ថុតាង ត្រូវបាននាំខ្លួនទៅកាន់ការិយាល័យប្រឆាំងបទល្មើសគ្រឿងញៀន ដើម្បី កសាងសំណុំរឿងបញ្ជូនទៅតុលាការចាត់វិធានការទៅតាមផ្លូវច្បាប់៕
ចែករំលែកព័តមាននេះ