ប្រទេសរុស្ស៊ី ៖ កាលពីថ្ងៃទី១ មករា ក្រសួងសភាពការណ៍បន្ទាន់រុស្ស៊ី ចេញផ្សាយរូបថតមួយ ដែលបង្ហាញកូនង៉ែតម្នាក់កាយរកឃើញនៅរស់ ក្រោមគំនរបាក់បែកនៃអគារស្នាក់នៅមួយដែលបាក់ មកពីការផ្ទុះឧស្ម័ននៅទីក្រុង MAGNITOGORSK តំបន់អ៊ូរាល់រុស្ស៊ី។
ពួកអ្នកជួយសង្គ្រោះនាថ្ងៃទី១ មករា បានរកឃើញកូនង៉ែតម្នាក់អាយុ១០ខែ ដែលនៅរស់ក្រោមគំនរបាក់បែក នៃអគាររងការបំផ្លាញនាពេលមុននេះ ក្នុងតំបន់អ៊ូរ៉ាល់ព្រោះតែការផ្ទុះឧស្ម័ន ដែលបណ្ដាលឲ្យមនុស្សស្លាប់យ៉ាងតិច៩នាក់ ហើយច្រើនសិបនាក់បាត់ខ្លួនក្រោមធាតុអាកាសត្រជាក់ខ្លាំងបំផុត។
ក្នុងសេចក្ដីប្រកាសមួយក្រសួងសភាពការណ៍បន្ទាន់រុស្ស៊ី សម្ដែងការអបអរដោយនិយាយថា រឿងអស្ចារ្យមួយបានកើតមាននាឆ្នាំថ្មីនេះ។ ក្មេងប្រុសអាយុទើប១០ខែម្នាក់ត្រូវបានសង្គ្រោះ។ នោះជាក្មេងប្រុសដែលមានឈ្មោះថាអីុវ៉ានហ្វូគីន។ ម្ដាយក្មេងនោះក៏នៅរស់រានមានជិវិតដែរ។ គាត់បានទៅកាន់មន្ទីរពេទ្យហើយស្គាល់កូនគាត់ច្បាស់។
ក្រសួងសុខាភិបាលរុស្ស៊ីនិយាយថាកុមារនោះដែលបច្ចុប្បន្នស្ថិតក្នុងស្ថានភាពធ្ងន់ធ្ងរបំផុត ស្រាំលលាដ៍ក្បាលនិងបាក់ជើង នឹងបញ្ជូនទៅព្យាបាលនៅក្រុងមូស្គូ ក្នុងមន្ទីរពេទ្យដ៏ល្អបំផុតមួយ។
មនុស្សជិត១១០០នាក់រស់នៅក្នុងអគារនេះដែលបាក់កាលពីថ្ងៃទី៣១ធ្នូដោយសារការផ្ទុះឧស្ម័ន។ អគារនេះកសាងកាលពីឆ្នាំ១៩៧៣សម័យសូវៀត ការផ្ទុះបានបំផ្លាញទាំងស្រុងផ្ទះ៣៥ល្វែង ហើយផ្ទះ១០ល្វែងទៀតរងការខូចខាត។ អ្នករស់នៅក្នុងអគារនោះច្រើនរយនាក់ បាត់ជម្រក ហើយជម្លៀសទៅកាន់សាលារៀនជិតខាងមួយ៕
ចែករំលែកព័តមាននេះ