ទីក្រុងឡាហាវ៉ាន៖ ប្រតិបត្តិការសឹករបស់យោធាអាមេរិកកាលពីថ្ងៃសៅរ៍នៅវេណេហ្ស៊ូអេឡានោះបានសម្លាប់ពួកគុយបាអស់៣២នាក់។ នេះបើយោងតាមការបញ្ជាក់ពីរដ្ឋាភិបាលគុយបាផ្ទាល់តែម្ដង។ គុយបាថ្លែងថាពួកគេជាមន្ត្រីនគរបាល និងកងទ័ពដែលទៅបំពេញបេសកកម្មនៅវេណេហ្ស៊ូអេឡា។ គេមិនទាន់ដឹងថាតើអ្នកទាំងនោះទៅបំពេញការងារអ្វីទេ។ ប៉ុន្តែតាំងពីច្រើនឆ្នាំមកហើយ គុយបាបានបញ្ជូនយោធាទៅបើកប្រតិបត្តិការនៅវេណេហ្ស៊ូអេឡា។
ដំណឹងស្ដីពីការស្លាប់ជនជាតិគុយបាបានលេចឮជាបណ្ដើរៗកាលពីចុងសប្ដាហ៍កន្លងទៅនេះ។ លោកត្រាំថ្លែងថាអ្នកដឹងទេ ពួកគុយបាស្លាប់ច្រើនណាស់។ ភាគីម្ខាងទៀតស្លាប់ច្រើន។ ប៉ុន្តែខាងយោធាអាមេរិកគ្មាននរណាម្នាក់ស្លាប់ឡើយ។ រដ្ឋាភិបាលវេណេហ្ស៊ូអេឡាទទួលស្គាល់ថាមនុស្សមួយចំនួនស្លាប់នៅក្នុងការហេតុការណ៍ផ្ទុះគ្រាប់បែករបស់អាមេរិក។ ប៉ុន្តែពួកគេមិនបានប្រកាសថាស្លាប់ប៉ុន្មាននាក់ទេ។
ថ្ងៃនេះ រដ្ឋាភិបាលគុយបាប្រកាសកាន់មរណទុក្ខរយៈពេល២ថ្ងៃដើម្បីគោរពវិញ្ញាណក្ខន្ធមន្ត្រីគុយបាដែលស្លាប់។ អតីតប្រធានាធិបតីគុយបា លោករ៉ាអ៊ូល កាស់ស្ត្រូ (Raul Castro) និងប្រធានាធិបតីគុយបាបច្ចុប្បន្ន លោកមីហ្គែល ឌីយ៉ាស់ កាណែល (Miguel Díaz-Canel) ក៏បានចូលរួមរំលែកមរណទុក្ខជាមួយក្រុមគ្រួសារសពផងដែរ។ ទោះជាយ៉ាងណាក្ដី រហូតមកដល់ពេលនេះ គេមិនទាន់ដឹងថាតើអ្នកស្លាប់ទាំងនោះមានមុខតំណែងអ្វីខ្លះទេ។
ទូរទស្សន៍គុយបាបានផ្សព្វផ្សាយសេចក្ដីប្រកាសជាផ្លូវការរបស់រដ្ឋាភិបាលថាក្នុងនាមជាអ្នកដែលគោរពយ៉ាងស្មោះស្ម័គ្រចំពោះការទទួលខុសត្រូវរបស់ខ្លួន ជនរួមជាតិរបស់យើងបានបំពេញភារកិច្ចប្រកបដោយតម្លៃដ៏ខ្ពង់ខ្ពស់ និងទឹកចិត្តជាអ្នកក្លាហាន។ ពួកគេស្លាប់នៅពេលប្រយុទ្ធគ្នាយ៉ាងស្វិតស្វាញប្រឆាំងនឹងអ្នកឈ្លានពាន ឬស្លាប់ដោយសារការទម្លាក់គ្រាប់បែក។
តាមពិត រដ្ឋមន្ត្រីការបរទេសអាមេរិកសព្វថ្ងៃនេះក៏ជាប់សែស្រឡាយគុយបាផងដែរ។ លោកជាកូនរបស់ជនអន្តោប្រវេសន៍គុយបាដែលធ្វើចំណាកស្រុកទៅរស់នៅអាមេរិក។ លោកថ្លែងថាគុយបាពិតជាជាប់ពាក់ព័ន្ធនឹងវេណេហ្ស៊ូអេឡានៅក្នុងប្រតិបត្តិការកាលពីថ្ងៃអាទិត្យ។ លោកថាកងសន្តិសុខរបស់លោកម៉ាឌូរ៉ូត្រូវបានគ្រប់គ្រងដោយមេបញ្ជាការជាជនជាតិគុយបា។ ពួកគេជួយការពារអំណាចឱ្យលោកម៉ាឌូរ៉ូ។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ