ទីក្រុងការ៉ាកាស់៖ នៅទីបំផុត លោកដូណាល់ត្រាំបញ្ជាឱ្យយោធាអាមេរិកបើកការវាយប្រហារយ៉ាងសន្ធាប់ទៅលើប្រទេសវេណេហ្ស៊ូអេឡា ព្រមទាំងចាប់ខ្លួនលោកម៉ាឌូរ៉ូ និងភរិយារបស់គាត់ដឹកចេញពីប្រទេសវេណេហ្ស៊ូអេឡា។ យកពួកគេទៅទីកន្លែងណាពិតប្រាកដនៅមិនទាន់ដឹងនៅឡើយទេ ប៉ុន្តែគេដឹងថាលោកត្រាំប្រកាសផ្ដល់រង្វាន់៥០លានដុល្លារសម្រាប់ព័ត៌មានដែលនាំទៅដល់ការចាប់ខ្លួនម៉ាឌូរ៉ូ។ លោកត្រាំបានបង្ហោះសារនៅលើបណ្ដាញសង្គមថាអាមេរិកទើបតែបើកប្រតិបត្តិការសឹកទ្រង់ទ្រាយធំដោយជោគជ័យនៅវេណេហ្ស៊ូអេឡា និងចាប់បានមេដឹកនាំប្រទេសនេះគឺលោកម៉ាឌូរ៉ូ និងប្រពន្ធរបស់គាត់ដឹកចេញទៅក្រៅប្រទេសបាត់ហើយ។
ថ្ងៃនេះ តាំងពីពេលរំលងអធ្រាត្រ គេស្ដាប់ឮសំឡេងផ្ទុះគ្រាប់រ៉ុកកែត និងសំឡេងយន្តហោះចម្បាំងយ៉ាងកងរំពងនៅទីក្រុងការ៉ាកាស់។ ទូរទស្សន៍ស៊ីប៊ីអែស (CBS) របស់អាមេរិកផ្សាយថាការវាយប្រហារនេះធ្វើឡើងក្រោមការបញ្ជាដោយផ្ទាល់មាត់ពីលោកត្រាំ។ មុនការវាយប្រហារចាប់ផ្ដើម លោកម៉ាឌូរ៉ូទំនងជាដឹងខ្លួនថានឹងមានហេតុភេទមិនស្រួលកើតឡើង។ លោកក៏ប្រកាសដាក់ប្រទេសជាតិនៅក្នុងគ្រាអាសន្ន និងចាប់ផ្ដើមចល័តកងទ័ពដើម្បីត្រៀមទប់ទល់។
រដ្ឋាភិបាលវេណេហ្ស៊ូអេឡាបានចេញសេចក្ដីថ្លែងការណ៍ច្រានចោលអ្វីដែលខ្លួនហៅថាជាអំពើឈ្លានពានដោយកម្លាំងយោធាអាមេរិកមកលើបូរណភាពទឹកដី និងប្រជាជនវេណេហ្ស៊ូអេឡា។ ដូច្នេះ វេណេហ្ស៊ូអេឡាសូមប្រកាសថ្កោលទោសជាទម្ងន់។ អ្នករាយការណ៍ព័ត៌មានរបស់ទូរទស្សន៍ស៊ីប៊ីអែស (CBS) បង្ហោះសារនៅលើបណ្ដាញអ៊ិចថាមន្ត្រីរដ្ឋាភិបាលអាមេរិកទទួលដំណឹងថានៅរដ្ឋធានីការ៉ាកាស់ មនុស្សកំពុងតែចលាចលសម្បើមណាស់។
មន្ត្រីរដ្ឋាភិបាលអាមេរិក២រូបដែលស្នើសុំមិនបញ្ចេញឈ្មោះប្រាប់ថាលោកត្រាំបានផ្ដល់សញ្ញាភ្លើងខៀវទៅយោធាអាមេរិកដើម្បីបើកការវាយប្រហារទៅលើវេណេហ្ស៊ូអេឡាតាំងពីច្រើនថ្ងៃមកហើយ (ប្រហែលជារង់ចាំចប់បុណ្យគ្រីសស្មាស់ និងចូលឆ្នាំសាកលសិន)។ ប្រជាជនវេណេហ្ស៊ូអេឡារស់នៅទីក្រុងការ៉ាកាស់ប្រាប់ថាទីតាំងជាច្រើនកន្លែងដាច់ភ្លើងអគ្គិសនី។
សូម្បីតែទីតាំងសំខាន់ដែលស្ថិតនៅក្បែរមូលដ្ឋានយោធាក៏ដាច់ភ្លើងដែរ។ គេក៏ស្ដាប់ឮផងដែរនូវស្នូរគ្រាប់កាំភ្លើងនៅតាមទីតាំងមួយចំនួន។ សាក្សីនិយាយថាពួកគេឃើញផ្សែងខ្មៅងងឹតហោះហើរពេញផ្ទៃអាកាស។ តាមរយៈវីឌីអូឃ្លីបដែលគេបង្ហោះយ៉ាងគគ្រឹកគគ្រេងនៅលើបណ្ដាញសង្គម គេស្ដាប់ឮ និងមើលឃើញការផ្ទុះគ្រាប់បែក ឬគ្រាប់រ៉ុកកែតនៅទីក្រុងការ៉ាកាស់។
គួរកត់សម្គាល់ថាការវាយប្រហារនេះធ្វើឡើងបន្ទាប់ពីលោកត្រាំចេញសារព្រមានលោកម៉ាឌូរ៉ូជាច្រើនដងមកហើយ និងបន្ទាប់ពីអាមេរិកបញ្ជូនកងទ័ព និងអាវុធយុទ្ធភ័ណ្ឌទៅសមុទ្រការីប៊ីននៅក្នុងអ្វីដែលលោកត្រាំហៅថាជាការត្រៀមវាយជើងគោកចូលវេណេហ្ស៊ូអេឡាដើម្បីបង្ក្រាបក្រុមជួញដូរគ្រឿងញៀន។ លោកត្រាំចោទប្រកាន់ថាមេដឹកនាំវេណេហ្ស៊ូអេឡារូបនេះជាមេខ្លោងជួញដូរគ្រឿងញៀនកម្រិតរដ្ឋាភិបាល។ ដូច្នេះត្រូវតែកម្ចាត់ចោល។ ទោះជាយ៉ាងណាក្ដី លោកម៉ាឌូរ៉ូអះអាងតាំងពីមុននេះថាមូលហេតុពិតប្រាកដនៅពីក្រោយរឿងនេះគឺអាមេរិកចង់គ្រប់គ្រងប្រេងឆៅ និងធនធានរ៉ែរបស់វេណេហ្ស៊ូអេឡា។
ប្រភពខ្លះបង្ហើបឱ្យដឹងថាលោកត្រាំ និងលោកម៉ាឌូរ៉ូបានសន្ទនាគ្នាតាមទូរស័ព្ទកាលពីរាត្រីថ្ងៃទី២១ ខែវិច្ឆិកា។ កាលនោះ លោកត្រាំប្រាប់ឱ្យលោកម៉ាឌូរ៉ូលះបង់ចោលអំណាចគ្រប់យ៉ាង និងប្រញាប់ចាកចេញពីវេណេហ្ស៊ូអេឡាបើចង់សុខខ្លួន។ លោកត្រាំចេញមុខធានាសន្តិសុខ និងសុវត្ថិភាពជូនលោកម៉ាឌូរ៉ូ និងក្រុមគ្រួសារក្រោយពេលម៉ាឌូរ៉ូអស់អំណាច។ ម៉ាឌូរ៉ូនៅក្នុងគ្រាទ័លច្រកមែនទែន គាត់ក៏មិនបដិសេធនឹងការទាមទារឱ្យចុះពីតំណែងដែរ។ ប៉ុន្តែគាត់ទាមទារគ្រប់គ្រងកងទ័ព និងអភ័យឯកសិទ្ធិពិសេសដែលរួចផុតពីការកាត់ទោស។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ