រាជធានីភ្នំពេញ ៖ រដ្ឋលេខាធិការប្រចាំការនៃលេខាធិការដ្ឋានអាកាសចរស៊ីវិល បានថ្លែងក្នុងពិព័រណ៍សមិទ្ធផលនៅវិមានឈ្នះ ឈ្នះ កាលពីថ្ងៃទី៣១ ធ្នូ កន្លងមកថា កម្ពុជាត្រូវពង្រីក និងសាងសង់ព្រលានយន្តហោះបន្ថែមទៀតដើម្បីអាចទទួលអ្នកដំណើរ៣០លាននាក់នៅឆ្នាំ២០៣០ខាងមុខ ។
លោក ជា អូន រដ្ឋលេខាធិការប្រចាំការនៃលេខាធិការដ្ឋានអាកាសចរស៊ីវិល បានបន្ដថា នៅឆ្នាំបន្តបន្ទាប់ទៀត ព្រលានយន្ដ ហោះទាំងអស់របស់កម្ពុជា នឹងត្រូវបន្ដជួសជុល និងសាងសង់សាងសង់ពង្រីកបន្ថែម ដើម្បីជំរុញការទទួលភ្ញៀវឲ្យបាន៣០លាននាក់ក្នុង១ឆ្នាំនៅឆ្នាំ២០៣០ ។ លោកបន្តថា បន្ទាប់ពីពង្រីកការសាងសង់អស់លទ្ធភាពហើយ កម្ពុជានឹងសាងសង់ព្រលានយន្តចំនួន៣កន្លែងបន្ថែមទៀត រួមមាន ការសាងសង់ព្រលានយន្តហោះនៅខេត្តសៀមរាប ការសាងសង់ព្រលានចំណុះរបស់រាជធានីភ្នំពេញ និងការពង្រីកព្រលានយន្តហោះនៅខេត្តព្រះសីហនុ ដើម្បីទទួលយន្តហោះដែលហោះឆ្លងទ្វីបទៅកាន់សហរដ្ឋអាមេរិក និងសហគមអឺរ៉ុប ។
លោក ជា អូន បានបន្ថែមថា បើយោងតាមស្ថានភាពព្រលានធំចំនួនបីកន្លែងដែលកំពុងមានបច្ចុប្បន្ន គឺព្រលានយន្តហោះនៅរាជធានីភ្នំពេញ មានលទ្ធភាពផ្ទុកមនុស្សចេញចូលបានប្រមាណ៥លាននាក់ ពោលគឺមានលក្ខណៈប្រហាក់ប្រហែលគ្នាព្រលានយន្តហោះនៅខេត្តសៀមរាប ហើយអនាគត ប្រសិនបើកម្ពុជានៅតែរក្សាកំណើនភ្ញៀវចេញចូល១៦%រៀងរាល់ឆ្នាំនោះ វានឹងជំរុញឱ្យព្រលានយន្តហោះនេះមានស្ថានភាពចង្អៀតណែន ។ លោកបញ្ជាក់ថា ៖« បច្ចុប្បន្នព្រលានយន្តហោះនីមួយៗមានយន្តហោះចុះចតកើនឡើងប្រមាណ៨០ទៅ១០០ដង ខណៈចំនួនក្រុមហ៊ុនអាកាសចរណ៍ បានកើនឡើងជាបន្តបន្ទាប់ »។
លោក ពេជ្រ សុប៉ុនតារា ប្រធានផ្នែកបង្កើនការហោះហើរនៃក្រុមហ៊ុនអាកាសយានដ្ឋានកម្ពុជាបានឲ្យដឹងដែរថា ព្រលានយន្តហោះកងកេង ក្រុងព្រះសីហនុ នឹងត្រូវពង្រីកនៅត្រីមាសទី១ឆ្នាំនេះ ដែលធ្វើឲ្យផ្លូវរត់ព្រលានយន្តហោះនេះមានសមត្ថភាពទទួលយន្តហោះចុះចត ស្មើនឹងព្រលានយន្តហោះអន្តរជាតិភ្នំពេញសព្វថ្ងៃនេះ ។ លោកបន្តថា ៖« តាមពិត បើគិតដល់ឆ្នាំ២០៣០ យើងអាចទទួលអ្នកដំណើរច្រើនជាង៣០លាននាក់ ហើយសមត្ថភាពព្រលានយន្ដ ហោះបច្ចុប្បន្នអាចទទួលអ្នកដំណើរបាន ពិសេស ព្រលានយន្តហោះអន្តរជាតិភ្នំពេញ និងសៀមរាបបច្ចុប្បន្នអាចទទួលអ្នកដំណើរបាន១០លាននាក់សម្រាប់ព្រលាននីមួយៗ ។
លោកបន្តថា ៖« ចំណែកព្រលានយន្តហោះក្រុងព្រះសីហនុ យើងត្រូវពង្រីកកាន់តែធំ តាមអ្វីដែលជាការចង់បានរបស់សម្តេចតេជោនាយករដ្ឋមន្ត្រីកម្ពុជា »។
គួរបញ្ជាក់ថា ព្រលានយន្ដអន្តរជាតិទាំងបីរបស់កម្ពុជា បានទទួលអ្នកដំណើរឆ្លងកាត់ចំនួន១០លាននាក់ ក្នុងឆ្នាំ២០១៨ បើធៀបនឹងឆ្នាំ២០១៧ មានចំនួន៨,៨លាន នាក់ ៕
ចែករំលែកព័តមាននេះ