ខេត្តកណ្ដាល ៖ បុរសម្នាក់រាយខ្សែភ្លើងដើម្បីឆក់កណ្តុរ បណ្តាលឱ្យឆក់ខ្លួនឯងស្លាប់កាលពីវេលាម៉ោងប្រហែល២និង២៥នាទីថ្ងៃទី៣០ ខែធ្នូ ឆ្នាំ២០១៨ នៅចំណុចប្រឡាយទឹក ក្នុងភូមិព្រែកស្វាយ២ ឃុំឈើទាល ស្រុកកៀនស្វាយ…
ខេត្តកណ្ដាល ៖ បុរសម្នាក់រាយខ្សែភ្លើងដើម្បីឆក់កណ្តុរ បណ្តាលឱ្យឆក់ខ្លួនឯងស្លាប់កាលពីវេលាម៉ោងប្រហែល២និង២៥នាទីថ្ងៃទី៣០ ខែធ្នូ ឆ្នាំ២០១៨ នៅចំណុចប្រឡាយទឹក ក្នុងភូមិព្រែកស្វាយ២ ឃុំឈើទាល ស្រុកកៀនស្វាយ ខេត្តកណ្តាល ។
ជនរងគ្រោះដែលស្លាប់ឈ្មោះ សំ ប៊ុនធឿន ហៅឡូញ ភេទប្រុស អាយុ៥១ឆ្នាំ មានទីលំនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល ។
តាមការបំភ្លឺពីបងប្អូនជនរងគ្រោះបានឱ្យដឹងថា ជនរងគ្រោះតែងតែមកដេកយាមរោងធ្វើស្រែ តែម្នាក់ឯងជារៀងរាល់យប់ ហើយបានតខ្សែភ្លើងជាមួយខ្សែលួសដើម្បីឆក់កណ្តុរជុំវិញរោងដែលជនរងគ្រោះដេក ក៏បណ្តាលឱ្យឆក់ខ្លួនឯងស្លាប់តែម្តង។ បន្ទាប់ពីកើតហេតុ បងប្អូនរបស់ជនរងគ្រោះបានរាយការណ៍ទៅសមត្ថកិច្ច ដើម្បីឱ្យចុះមកពិនិត្យ។
កម្លាំងប៉ុស្តិ៍នគរបាលរដ្ឋបាលឈើទាលបានទទួលព័ត៌មានពីលោកស្រីអនុប្រធានភូមិស្រែអំពិលតាមរយៈទូរសព្ទ័ថា មានករណីមនុស្សឆក់ខ្សែភ្លើងស្លាប់ ភ្លាមនោះកម្លាំងប៉ុស្តិ៍ឈើទាលបានចុះដល់កន្លែងកើតហេតុ និងសហការជាមួយកម្លាំងជំនាញ ក្រុមប្រឹក្សាឃុំឈើទាល មេភូមិព្រែកស្វាយ លោកគ្រូពេទ្យឃុំចុះធ្វើការពិនិត្យសព និងបានបញ្ជាក់ថា ជនរងគ្រោះមានស្នាមឆេះខ្លោចដើមដៃខាងស្តាំ, ក្បាលផ្នែកខាងមុខខាងស្តាំ, ដៃខាងឆ្វេង និងដងខ្លួនចំហៀងខាងស្តាំ ដោយសារឆក់ខ្សែភ្លើង ទើបបណ្តាលឱ្យស្លាប់ពិតប្រាកដមែន ។
ក្រោយពិនិត្យរួច សពបានប្រគល់ជូនក្រុមគ្រួសារនៃសពយកទៅបុណ្យតាមប្រពៃណី ៕
ចែករំលែកព័តមាននេះ