រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកបណ្ឌិតសភាចារ្យ អូន ព័ន្ធមុនីរ័ត្ន បានសម្ដែងការគាំទ្រយ៉ាងខ្លាំងទៅលើការបណ្ដុះបណ្ដាលធនធានមនុស្សលើជំនាញហិរញ្ញវត្ថុ និងធនាគារ ដើម្បីផ្គត់ផ្គង់លើទីផ្សារការងារទៅបណ្ដាធនាគារ…
រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកបណ្ឌិតសភាចារ្យ អូន ព័ន្ធមុនីរ័ត្ន បានសម្ដែងការគាំទ្រយ៉ាងខ្លាំងទៅលើការបណ្ដុះបណ្ដាលធនធានមនុស្សលើជំនាញហិរញ្ញវត្ថុ និងធនាគារ ដើម្បីផ្គត់ផ្គង់លើទីផ្សារការងារទៅបណ្ដាធនាគារ និងមីក្រូហិរញ្ញវត្ថុនានាក្នុងប្រទេសកម្ពុជា ខណៈវិស័យនេះកំពុងដើរតួនាទីយ៉ាងសំខាន់សម្រាប់អភិវឌ្ឍន៍សង្គម និងសេដ្ឋកិច្ចកម្ពុជា ។
ថ្លែងក្នុងពិធីសម្ពោធជាផ្លូវការវិទ្យាស្ថានពាណិជ្ជសាស្ត្រអេស៊ីលីដា កាលពីថ្ងៃទី២៦ ធ្នូ កន្លងមក លោកឧបនាយករដ្ឋមន្ត្រី អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា វិស័យធនាគារបានរួមចំណែកក្នុងការប្រមូលផ្ដុំ និងការបែងចែកធនធានហិរញ្ញវត្ថុ ទាំងក្នុងនិងក្រៅស្រុក ប្រកបដោយប្រសិទ្ធភាព សម្រាប់ការបង្កើត និងការពង្រីកអាជីវកម្ម ការវិនិយោគ និងតម្រូវការប្រើប្រាស់ ដែលជាកត្តារួមចំណែកដ៏សំខាន់ការក្នុងលើកកម្ពស់ជីវភាពរស់នៅរបស់ប្រជាជនកម្ពុជា និងការសម្រេចបាននូវកំណើនសេដ្ឋកិច្ចជាតិប្រចាំឆ្នាំជាមធ្យមប្រមាណ៧% ។
លោកបញ្ជាក់ថា ៖« វិស័យហិរញ្ញវត្ថុ និង ធនាគារបានដើរតួនាទីយ៉ាងសំខាន់ សម្រាប់ការរីកលូតលាស់ និងការអភិវឌ្ឍនៃសង្គម និង សេដ្ឋកិច្ចកម្ពុជា »។ លោកបន្តថា ការកើនឡើងនៃចំនួនធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ មិនត្រឹម តែឆ្លុះបញ្ចាំងពីការកើនឡើងនៃតម្រូវការហិរញ្ញប្បទាន ទាំងនៅទីក្រុង និងជនបទប៉ុណ្ណោះទេ ប៉ុន្តែថែមទាំងបង្កើននូវការប្រកួតប្រជែងកាន់តែខ្លាំង និងបង្កើននូវតម្រូវការនៃធនធានមនុស្សនៅក្នុងវិស័យនេះផងដែរ ។
លោកបណ្ឌិតថ្លែងថា ៖« ខ្ញុំពិតជារីករាយ និងមានមោទនភាព ដោយបានឃើញ គ្រឹះស្ថានធនាគារ និងមីក្រូហិរញ្ញវត្ថុទាំងអស់ ខិតខំធ្វើពិពិធកម្មសេវា និងផលិតផល ព្រមទាំងលើកកម្ពស់ប្រសិទ្ធភាព និងគុណភាពនៃប្រតិបត្តិការ តាមរយៈការប្រើប្រាស់បច្ចេកវិទ្យាហិរញ្ញវត្ថុ ដែលកំពុងមានការរីកចម្រើនយ៉ាងឆាប់រហ័ស, ការពង្រឹងអភិបាលកិច្ច និងការបណ្តុះបណ្តាលសមត្ថភាពធនធានមនុស្ស ជាដើម » ។
លោក ផុន ណារិន នាយកវិទ្យាស្ថានពាណិជ្ជសាស្ត្រ អេស៊ីលីដា បានមានប្រសាសន៍ថា ការបណ្ដុះបណ្ដាលធនធានមនុស្សក្នុងវិស័យធនាគារ និងហិរញ្ញវត្ថុ គឺជាកត្តាចំបាច់មួយក្នុងការចូលរួមអភិវឌ្ឍន៍វិស័យហិរញ្ញវត្ថុកម្ពុជា ហើយក៏តម្រូវឲ្យស្របទៅតាមបដិវត្តន៍ឧស្សាហកម្មទី៤ផងដែរ ដូច្នេះរាល់ការបណ្ដុះបណ្ដាលត្រូវតែទាមទារផ្ដោតទៅលើជំនាញបច្ចេកវិទ្យា ដូចជាបច្ចេកវិទ្យា Fintech ជាដើម ។
លោកបានលើកឡើងថា ដោយសារតែតម្រូវការធនធាជំនាញក្នុងវិស័យហិរញ្ញវត្ថុកាន់តែច្រើនពីស្ថាប័នធនាគារ និងមីក្រូហិរញ្ញវត្ថុ នានាក្នុងប្រទេស ទើបអេស៊ីលីដា បានវិនិយោគទឹកប្រាក់ប្រមាណជាង៣៦លានដុល្លារអាមេរិកសាងសង់អគារវិទ្យាស្ថានផ្ទាល់ខ្លួនមួយ ដែលអាចទទួលនិស្សិតចូលរៀនសរុបរហូតដល់៨.០០០ នាក់ ។ លោកបន្ថែមថា ៖« ចាប់ពីឆ្នាំក្រោយៗទៅវិទ្យាស្ថាន នឹងផ្គត់ផ្គង់ធនធានទៅកាន់ទីផ្សារការងារធនាគារ និងហិរញ្ញវត្ថុ ប្រមាណ៣០០នាក់ក្នុងមួយឆ្នាំ ហើយវិទ្យាស្ថានក៏នឹងទទួលបណ្ដុះបណ្ដាលដល់សហគ្រិន មិនទាន់មានជំនាញឬមានជំនាញតិចតួចក្នុងវិស័យហិរញ្ញវត្ថុ ដើម្បីអភិវឌ្ឍន៍អាជីវកម្មរបស់ពួកគេផងដែរ »។
គួរបញ្ជាក់ថា ក្នុងរយៈពេល២ ទសវត្សរ៍ចុងក្រោយនេះ វិស័យហិរញ្ញវត្ថុ និងធនាគារក្នុងប្រទេសកម្ពុជា មានការរីកលូតលាស់ និងបោះជំហានទៅមុខគួរជាទីមោទនៈ ។ ជាក់ស្តែង ទំហំ ទ្រព្យសកម្មនៃវិស័យធនាគារ និងមីក្រូហិរញ្ញវត្ថុ ធៀបនឹងផ.ស.ស បានបន្តកើនឡើងជាលំដាប់ ពីកម្រិតប្រមាណត្រឹមតែ៤៤%នៃផ.ស.សក្នុងឆ្នាំ២០០៨ កើនឡើងរហូតដល់១៤៨%នៃផ.ស.ស ក្នុងឆ្នាំ២០១៧ ។ ទន្ទឹមនេះដែរ ចំនួនធនាគារពាណិជ្ជ ក៏បានកើនឡើងរហូតដល់ជាង៥០ ហើយគ្រឹះស្ថានមីក្រូហិរញ្ញវត្ថុក៏បានកើនឡើងរហូតដល់ជិត៨០នៅក្នុងឆ្នាំ២០១៧ផងដែរ ។ ប្រាក់បញ្ញើក្នុងវិស័យធនាគារ ក៏មានការកើនឡើងខ្លាំងផងដែរ ក្នុងទំហំប្រមាណ១០០%នៃផ.ស.សក្នុងឆ្នាំ២០១៧ ដែលឆ្លុះបញ្ជាំងពីការកើនឡើងនៃទំនុកចិត្ត និងការចូលរួមរបស់ប្រជាជន ៕
ចែករំលែកព័តមាននេះ