ខេត្តរតនគិរី ៖ អតីតអ្នកទោសឧក្រិដ្ឋ ដែលទើបរួចពីពន្ធនាគារ ឈ្មោះសាត សឿន ហៅសឿនផែនដី ដែលបង្កការបាញ់បោះអនាធិបតេយ្យនៅមុខហាងខារ៉ាអូខេពន្លកមាស មានទីតាំងស្ថិតនៅក្នុងភូមិជ្រី សង្កាត់យក្សឡោម ក្រុងបានលុង កាលពីយប់ថ្ងៃទី៦ កក្កដានោះបានត្រូវកម្លាំងកងរាជអាវុធហត្ថខេត្ត ចាប់ខ្លួនបញ្ជូនមកកាន់សាលាដំបូងខេត្តនាវេលាម៉ោង២និង៣០នាទីរសៀលថ្ងៃទី៨ កក្កដា ដើម្បីកសាងសំណុំរឿងចាត់ការតាមច្បាប់ ។
ប្រភពព័ត៌មានច្បាស់ការឱ្យដឹងថា បន្ទាប់ពីកម្លាំងកងរាជអាវុធហត្ថខេត្ត បានប្រើវិធីត្រជាក់គ្រប់បែបយ៉ាង ដើម្បីលួងលោមឱ្យឈ្មោះសឿនផែនដីប្រគល់ខ្លួនតាមសម្រួល ក្រោយពេលបង្កការបាញ់បោះ ព្រោះជននេះជាមនុស្សកាច មិនអាចចេះតែចាប់ខុសទំនងបានទេ ។ យោងតាមប្រភពព័ត៌មានបានឱ្យដឹងថា សាត សឿន ហៅសឿនផែនដី បន្ទាប់ពីមានការបាញ់បោះ២លើកអស់ជាច្រើនគ្រាប់ កម្លាំងកងរាជអាវុធហត្ថខេត្ត បានប្រើគ្រប់យុទ្ធវិធីដើម្បីនាំខ្លួនមកកាន់ទីបញ្ជាការកងរាជអាវុធហត្ថខេត្ត ។
ពេលសឿនផែនដីដើរចូលស៊ងហើយ ខាងប៉េអឹមក៏ចាប់ផ្តើមធ្វើការឃុំខ្លួន និងសួរចម្លើយ ព្រមទាំងធ្វើកំណត់ហេតុរួចរាល់ ទើបបញ្ជូនមកកាន់សាលាដំបូងខេត្ត នៅវេលាម៉ោង២និង៤០នាទីរសៀលថ្ងៃទី៨ កក្កដា។ ពុំមានប្រភពណាមួយបញ្ជាក់ថា លោកសឿនផែនដី មានតួនាទីអ្វីពិតប្រាកដទេ ហើយអាវុធខ្លីដែលប្រើប្រាស់នោះក៏មិនដឹងថាបានមកពីណាដែរ គ្រាន់តែដឹងថា សាត សឿន ហៅ សឿនផែនដី ប្រកបរបរជាអ្នកដើរប្រមូលទិញឈើប្រណីត ។
នៅវេលាម៉ោង៣និង៣០នាទីរសៀលថ្ងៃដដែល សឿនផែនដី ស្ថិតនៅក្នុងបន្ទប់លោកព្រះរាជអាជ្ញា និងកំពុងត្រូវបានសាកសួរ ប៉ុន្តែពុំទាន់បានទម្លាយព័ត៌មានមកខាងក្រៅនោះទេ ។ ទោះបីជាបែបណា ប្រភពបានបញ្ជាក់ថា ជននេះនឹងត្រូវបញ្ជូនខ្លួនទៅពន្ធនាគាររង់ចាំបើកសវនាការនៅពេលក្រោយ ។ ចំណែកខាងសមត្ថកិច្ចបានចោទប្រកាន់ថា ប្រើប្រាស់កាំភ្លើងអត់មានច្បាប់ និងបាញ់បោះសេរី ៕
ចែករំលែកព័តមាននេះ