រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌ បានស្នើឲ្យសាលាដំបូង និងអយ្យកាអមសាលាដំបូងរាជធានី-ខេត្តទូទាំងប្រទេស សហការឱ្យបានពេញលេញជាមួយរដ្ឋបាលរាជធានី-ខេត្តទាំងអស់ ក្នុងការប្រយុទ្ធប្រឆាំងនឹងការឆបោកតាមប្រព័ន្ធអនឡាញ ដោយត្រូវអនុវត្តការងាររបស់ខ្លួនឱ្យបានម៉ឺងម៉ាត់ប្រកបដោយក្រមសីលធម៌ វិជ្ជាជីវៈ និងការទទួលខុសត្រូវខ្ពស់…
រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌ បានស្នើឲ្យសាលាដំបូង និងអយ្យកាអមសាលាដំបូងរាជធានី-ខេត្តទូទាំងប្រទេស សហការឱ្យបានពេញលេញជាមួយរដ្ឋបាលរាជធានី-ខេត្តទាំងអស់ ក្នុងការប្រយុទ្ធប្រឆាំងនឹងការឆបោកតាមប្រព័ន្ធអនឡាញ ដោយត្រូវអនុវត្តការងាររបស់ខ្លួនឱ្យបានម៉ឺងម៉ាត់ប្រកបដោយក្រមសីលធម៌ វិជ្ជាជីវៈ និងការទទួលខុសត្រូវខ្ពស់ ។
ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ថ្លែងក្នុងកិច្ចប្រជុំបូកសរុបលទ្ធផលរយៈពេល៦ខែ ឆ្នាំ២០២៥ នៃការអនុវត្តយុទ្ធនាការជំរុញនិងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការកាលពីថ្ងៃទី១៥ ខែកក្កដា ឆ្នាំ២០២៥ នៅទីស្តីការក្រសួងថា សាលាជម្រះក្តី និងអង្គការអយ្យការអមសាលាជម្រះក្តី ត្រូវបន្តធ្វើការសម្រុះសម្រួលផ្សះផ្សាចំពោះរឿងក្តីណាដែលអាចធ្វើការសម្រុះសម្រួលផ្សះផ្សាបាន ។
ឯកឧត្តបានបន្តថា សាលាជម្រះក្តី និងអង្គការអយ្យការអមសាលាជម្រះក្តី ត្រូវបន្តយកចិត្តទុកដាក់លើសំណុំរឿងអាទិភាពទាំង៤ រួមមានសំណុំរឿងអត្រានុកូលដ្ឋាន, សំណុំរឿងគ្រោះថ្នាក់ចរាចរណ៍, សំណុំរឿងគ្រឿងញៀន និងសំណុំរឿងពាក់ព័ន្ធនឹងក្មេងទំនើង ដោយអនុវត្តឱ្យបានម៉ឺងម៉ាត់ ស្របតាមអភិក្រមដែលបានដាក់ចេញនាពេលកន្លងមក។
ដើម្បីគោរពតាមបទបញ្ជារបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានដាក់ចេញស្តីពីយុទ្ធនាការបោសសម្អាតការឆរបោកតាមប្រព័ន្ធបច្ចេកវិទ្យាឯកឧត្តមឧបនាយក រដ្ឋមន្ត្រីក៏បានគូសបញ្ជាក់ថា «សាលាដំបូង និងអង្គការអយ្យការអមសាលាដំបូងរាជធានី-ខេត្តទាំងអស់ ត្រូវសហការឱ្យបានពេញលេញជាមួយរដ្ឋបាលរាជធានី-ខេត្តទាំងអស់ ក្នុងការប្រយុទ្ធប្រឆាំងនឹងការឆបោកតាមប្រព័ន្ធអនឡាញ ដោយត្រូវអនុវត្តការងាររបស់ខ្លួនឱ្យបានម៉ឺងម៉ាត់ប្រកបដោយក្រមសីលធម៌វិជ្ជាជីវៈ និងការទទួលខុសត្រូវខ្ពស់»។
ជាងនេះ ឯកឧត្តមក៏បានឲ្យសាលាជម្រះក្តី និងអង្គការអយ្យការអមសាលាជម្រះក្តី ត្រូវយកចិត្តទុកដាក់ពិនិត្យចាត់ការសំណុំរឿងឱ្យបានត្រឹមត្រូវ ដោយត្រូវមានសម្អាងហេតុ និងសម្អាងច្បាប់ច្បាស់លាស់ ។
សូមជម្រាបថា បើតាមបទបញ្ជារបស់សម្តេចបវរធិបតីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យាបានឲ្យក្រសួងយុត្តិធម៌ ត្រូវធ្វើការណែនាំដល់សាលាជម្រះក្តីនិងអយ្យការអមសាលាជម្រះក្តីគ្រប់ជាន់ថ្នាក់ ឱ្យយកចិត្តទុកដាក់ប្រកបដោយស្មារតីទទួលខុសត្រូវខ្ពស់ ក្នុងការអនុវត្តច្បាប់ពាក់ព័ន្ធនឹងការបង្ក្រាបការឆបោក តាមប្រព័ន្ធបច្ចេកវិទ្យា ស្របតាមច្បាប់ និងនីតិវិធីជាធរមាន ព្រមទាំងផ្តល់ការគាំទ្រផ្នែកច្បាប់ដល់ស្ថាប័ននិង អង្គភាពអនុវត្តច្បាប់ក្នុងប្រតិបត្តិការតាមការចាំបាច់៕
ចែករំលែកព័តមាននេះ