រាជធានីភ្នំពេញ ៖ បន្ទាប់ពីស្រាវជ្រាវឃើញល្មើសនឹងបទបញ្ជា ព្រះរាជអាជ្ញាក្រសួងយុត្តិធម៌ម្នាក់ ត្រូវបានបណ្តេញចេញពីក្របខណ្ឌ និងព្រះរាជអាជ្ញារងម្នាក់ នៅខេត្តពោធិ៍សាត់ម្នាក់ ត្រូវបានផ្អាកមុខងារជាបណ្តោះអាសន្ន ពាក់ព័ន្ធល្មើសបទបញ្ជាស្តីពីការបង្ក្រាបបទល្មើសឆបោកតាមប្រព័ន្ធបច្ចេកវិទ្យា ។…
រាជធានីភ្នំពេញ ៖ បន្ទាប់ពីស្រាវជ្រាវឃើញល្មើសនឹងបទបញ្ជា ព្រះរាជអាជ្ញាក្រសួងយុត្តិធម៌ម្នាក់ ត្រូវបានបណ្តេញចេញពីក្របខណ្ឌ និងព្រះរាជអាជ្ញារងម្នាក់ នៅខេត្តពោធិ៍សាត់ម្នាក់ ត្រូវបានផ្អាកមុខងារជាបណ្តោះអាសន្ន ពាក់ព័ន្ធល្មើសបទបញ្ជាស្តីពីការបង្ក្រាបបទល្មើសឆបោកតាមប្រព័ន្ធបច្ចេកវិទ្យា ។
យោងតាមព្រះរាជក្រឹត្យ ត្រាស់បង្គាស់ នៅថ្ងៃទី១៥ ខែកក្កដា ឆ្នាំ២០២៥ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ត្រាស់បង្គាប់ដាក់វិន័យលោក សុច សុផាន់ណារ៉ា ដោយបណ្តេញចេញពីក្របខណ្ឌព្រះរាជអាជ្ញានៃក្រសួងយុត្តិធម៌ ។
ចំណែកលិខិតមួយច្បាប់ ដាច់ដោយឡែក របស់រដ្ឋមន្ត្រីក្រសួងយុត្តិធម៌សម្រេចផ្អាកមុខងារជាបណ្តោះអាសន្ន លោក គ្រី សីហា ព្រះរាជអាជ្ញារងនៃអយ្យការអម សាលាដំបូងខេត្តពោធិ៍សាត់ ។
ឯកឧត្តម ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ សម្រេចផ្អាកមុខងារជាបណ្តោះអាសន្ន លោក គ្រី សីហា ព្រះរាជអាជ្ញារងនៃអយ្យការអមសាលាដំបូងខេត្តពោធិ៍សាត់ ដើម្បីបើកផ្លូវឱ្យក្រុមអធិការកិច្ច និងស្ថាប័នមានសមត្ថកិច្ចធ្វើការស៊ើបអង្កេតស្រាវជ្រាវ ទាក់ទងនឹងការអនុវត្តច្បាប់ដោយរំលោ.ភបំពានក្នុងការដោះលែងជនល្មើសដែលត្រូវបានចាប់ខ្លួនពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា នៅក្នុងខេត្តពោធិ៍សាត់ ។
សូមជម្រាបថា បើតាមសំឡេងរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីត្រូវបានផ្សព្វផ្សាយតាមបណ្តាញសង្គម នៅយប់ថ្ងៃទី១៦ កក្កដា ឆ្នាំ២០២៥ បានឲ្យដឹងថា នៅខេត្តពោធិ៍សាត់ បានខិតខំបើកយុទ្ធនាការបង្ក្រាបល្បែ.ងអនឡាញ ស្រាប់តែគណៈអភិបាលខេត្តដឹកនាំធ្វើការបង្ក្រាបបានប៉ុន្មាននាក់ជាមួយសមត្ថកិច្ច ដោយខិតខំធ្វើការតែមានព្រះរាជអាជ្ញារងម្នាក់ទៅដោះលែងជនដែលប្រព្រឹត្តល្មើសទាំងនោះ ។
សម្តេចបវរធិបតី បានបញ្ជាក់ថា៖ « ខ្ញុំឲ្យក្រសួងយុត្តិធម៌ធ្វើការរឿងនេះជាបន្ទាន់ ហើយបើសិនមានការយកលុយ ខ្ញុំសុំឲ្យខាងអង្គភាពប្រឆាំងអំពើពុករលួយ (ACU) ដែលស្ថិតក្នុងជាគណៈកម្មការចំពោះកិច្ច ចាត់ការភ្លាម មិនចាំទុកស្អែកទេ» ។ សម្តេចបវរធិបតី បានលើកឡើងថា នៅពេលសមត្ថកិច្ចខិតខំធ្វើការ បែរជាមានអ្នកចាំដោះលែង ដើម្បីទទួលផលប្រយោជន៍ គឺមិនបានទេ ។
សូមជម្រាបថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានចេញ «បទបញ្ជាស្តីពីយុទ្ធនាការបោសសម្អាត ការឆបោកតាមប្រព័ន្ធបច្ចេកវិទ្យា» ដែលមាន៩ចំណុចក្នុងនោះអភិបាលនៃគណៈអភិបាលរាជធានី-ខេត្ត ស្នងការនគរបាលរាជធានី-ខេត្ត មេបញ្ជាការបណ្តាអង្គភាព និងក្រសួង ស្ថាប័នពាក់ព័ន្ធ ត្រូវអនុវត្តបទបញ្ជានេះឱ្យបានម៉ឺងម៉ាត់ ការមិនអនុវត្តតាមបទបញ្ជា ឬមិនសហការអនុវត្តត្រូវជាកម្មវត្ថុនៃការវាយតម្លៃក្នុងការតែងតាំង ផ្លាស់ប្តូរ ឬបញ្ចប់មុខតំណែង ។
ការចេញបទបញ្ជារបស់សម្តេចធិបតី ហ៊ុន ម៉ាណែត ខាងលើនេះ បន្ទាប់ពីរាជរដ្ឋាភិបាល បានសង្កេតឃើញថា បច្ចុប្បន្នសកម្មភាពឆបោក តាមប្រព័ន្ធបច្ចេកវិទ្យា (ONLINE SCAMS) នៅព្រះរាជាណាចក្រកម្ពុជា បាន និងកំពុងបង្កការគំរា.មកំហែ.ង និងអសន្តិសុខ ក្នុងពិភពលោក និងតំបន់ ។
ក្រុមឧក្រិ.ដ្ឋជនបរទេស ក៏បានជ្រៀតចូលធ្វើសកម្មភាព ឆបោកតាមប្រព័ន្ធបច្ចេកវិទ្យាផងដែរ ។ លើសពីនេះសម្តេចបវរធិបតីឲ្យ ក្រសួងយុត្តិធម៌ ត្រូវធ្វើការណែនាំដល់សាលាជម្រះក្តី និងអយ្យការអមសាលាជម្រះក្តីគ្រប់ជាន់ថ្នាក់ឱ្យយកចិត្តទុកដាក់ប្រកបដោយស្មារតីទទួលខុសត្រូវខ្ពស់ ក្នុងការអនុវត្តច្បាប់ពាក់ព័ន្ធនឹងការបង្ក្រាបការឆបោក តាមប្រព័ន្ធបច្ចេកវិទ្យា ស្របតាមច្បាប់ និងនីតិវិធីជាធរមាន ព្រមទាំងផ្តល់ការគាំទ្រផ្នែកច្បាប់ដល់ស្ថាប័ននិង អង្គភាពអនុវត្តច្បាប់ក្នុងប្រតិបត្តិការ តាមការចាំបាច់ ៕
ចែករំលែកព័តមាននេះ