សម្តេចតេជោ ប្រាប់ថៃ ថាការចរចាពិតត្រូវធ្វើដោយនាយករដ្ឋមន្ត្រី ហ៊ុន ម៉ាណែត មិនមែនជាមួយប្រធានព្រឹទ្ធសភាទេ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានប្រាប់ទៅភាគីថៃ ថា ការចរចាពិត ត្រូវធ្វើដោយនាយករដ្ឋមន្ត្រី…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានប្រាប់ទៅភាគីថៃ ថា ការចរចាពិត ត្រូវធ្វើដោយនាយករដ្ឋមន្ត្រី ហ៊ុន ម៉ាណែត មិនមែនជាមួយប្រធានព្រឹទ្ធសភា នោះទេ ។
សម្តេចតេជោ បានសរសេរលើបណ្តាញសង្គមនៅល្ងាចថ្ងៃទី១៦ ខែកក្កដា ឆ្នាំ២០២៥ ថា «មុននេះលោក ឃ្លាំង ហួត បានឆ្លើយតបជាមួយនាយករដ្ឋមន្ត្រីស្តីទី និងជាអតីតរដ្ឋមន្ត្រីក្រសួងការពារជាតិថៃ ដែលបានវាយប្រហារចំពោះខ្ញុំ» ។
សម្តេចបានបញ្ជាក់ថា ៖ “ខ្ញុំក៏ចង់បញ្ជាក់បែបទះកំភ្លៀងចំពោះបុគ្គលរូបនេះ ថាបើ ហ៊ុន សែន អត់មានតម្លៃសម្រាប់ការចរចា ហេតុអ្វីលោកត្រូវអមដំណើរអតីតនាយករដ្ឋមន្ត្រី ដែលកំពុងព្យួរតំណែង មកចាំទូរសព្ទជួបខ្ញុំ នៅរសៀលថ្ងៃទី១៥ ខែមិថុនា ឆ្នាំ២០២៥ ដោយមិនមានការណាត់ជាមុន ?” ។
សម្តេចតេជោ បានលើកឡើងថា កាលពីថ្ងៃទី១៥ ខែមិថុនា ឆ្នាំ២០២៥ ពួកលោក ចាត់ទុក ហ៊ុន សែន ជាមនុស្សមានតម្លៃ ដែលអស់លោកយល់ថា ត្រូវសុំឱវាទ ឬសុំយោបល់ ឬសុំចរចា តែដល់ថ្ងៃទី១៦ ខែកក្កដា ឆ្នាំ២០២៥ លោកបែរជានិយាយថា លោក ហ៊ុន សែន មិនមានតម្លៃក្នុងការចរចា។ តើលោកលេបថ្នាំខុសទេដឹង ទើបធ្វើឲ្យលោកបាត់ការចងចាំបែបនេះ ?
សម្តេចក៏បានគូសបញ្ជាក់ថា ៖ “សម្រាប់តួនាទីក្នុងតំណែងគ្រប់គ្រងរដ្ឋ ខ្ញុំស្គាល់ច្បាស់ណាស់ ព្រោះខ្ញុំដឹកនាំនីតិប្រតិបត្តិ តាំងពីលោកនៅជាកងទ័ពថៃក្រហម (កុម្មុយនីស្តថៃ) មិនទាន់ចេញពីព្រៃមកម្ល៉េះ និងឆ្លងកាត់នាយករដ្ឋមន្ត្រីថៃ ជាង១០នាក់។ ការចរចាពិត ត្រូវធ្វើដោយនាយករដ្ឋមន្ត្រី ហ៊ុន ម៉ាណែត មិនមែនជាមួយប្រធានព្រឹទ្ធសភា ហ៊ុន សែន នោះឡើយ” ។
ជាមួយគ្នានោះដែរ សម្តេចក៏បានរំលឹកកាលពីមុន ក៏ដូចជាថ្ងៃនេះ លោកតែងប្រាប់ជនជាតិថៃ ថាកុំឲ្យស្តាប់លោក ហ៊ុន សែន ពេក តើលោកខ្លាចបណ្តាញសង្គម ដែលខ្ញុំបង្ហោះសារចេញមែនទេ ?
សម្តេចក៏បានសង្កត់ធ្ងន់ថា ៖ “ខ្ញុំមិនចង់ឆ្លើយតបជាមួយមនុស្សព្រហើន ដូចលោកទេ តែខ្ញុំមានការចាំបាច់បញ្ជូនសារទៅប្រាប់ប្រជាជនថៃ ថា នាយករដ្ឋមន្ត្រីស្តីទីរបស់ថៃ សព្វថ្ងៃនេះ មានចំណែកទទួលខុសត្រូវលើការសុំឱវាទ ឬយោបល់ ឬចរចាតាមទូរសព្ទ នាល្ងាចថ្ងៃទី១៥ ខែមិថុនា ឆ្នាំ២០២៥ ជាមួយលោកស្រី អ៊ុង អ៊ីន កន្លងមក។ ជូនពរលោក ប្រឹងតោងកៅអីនាយករដ្ឋមន្ត្រីស្តីទី ឲ្យបានយូរបន្តិច” ៕
ចែករំលែកព័តមាននេះ