ខេត្តស្វាយរៀង ៖ មានករណីគ្រោះថ្នាក់ចរាចរណ៍ បង្កឡើងដោយរថយន្តក្រុងក្រុមហ៊ុនវៀតណាម បុកម៉ូតូជនរងគ្រោះពេញទំហឹងអូសជាង១០ម៉ែត្រ បណ្តាលឲ្យរងរបួសបែកមុខ បាក់ជើង បែកក្បាល ស្លា.ប់ភ្លាមៗ ។…
ខេត្តស្វាយរៀង ៖ មានករណីគ្រោះថ្នាក់ចរាចរណ៍ បង្កឡើងដោយរថយន្តក្រុងក្រុមហ៊ុនវៀតណាម បុកម៉ូតូជនរងគ្រោះពេញទំហឹងអូសជាង១០ម៉ែត្រ បណ្តាលឲ្យរងរបួសបែកមុខ បាក់ជើង បែកក្បាល ស្លា.ប់ភ្លាមៗ ។
ករណីនេះ បានកើតឡើងនៅវេលាម៉ោង០៤និង៣៥នាទីល្ងាចថ្ងៃទី១៦ កក្កដា ២០២៥ នៅលើកំណាត់ផ្លូវជាតិលេខ១ ត្រង់ចំណុចខាងមុខមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង ស្ថិតក្នុងភូមិស្វាត សង្កាត់ចេក ក្រុងស្វាយរៀង ។
បើតាមប្រជាពលរដ្ឋ ដែលបានឃើញហេតុការណ៍ផ្ទាល់ បានប្រាប់អ្នកសារព័ត៌មានកោះសន្តិភាពឲ្យដឹងថា មុនពេលកើតហេតុគេឃើញជនរងគ្រោះ ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខស្វាយរៀង1W-0074 បើកបរ ពីទិសខាងកើត ទៅលិច លុះមកដល់ចំណុចកើតហេតុ ស្រាប់តែមានរថយន្តក្រុង ១គ្រឿង ម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ3C-6579 ចំណុះ៤៥កៅអី (យីហោ ដានដាន ដឹកអ្នកដំណើរភ្នំពេញ-ហូជីមិញ) បានបុកម៉ូតូជនរងគ្រោះ ពេញទំហឹង រួចអូសជនរងគ្រោះ ចម្ងាយប្រមាណ១០ម៉ែត្រ បណ្តាលឲ្យជនរងគ្រោះរងរបួសបែកក្បាល បែកមុខ បាក់ជើង ហូរឈាមស្រោចលើដីស្លាប់ភ្លាមៗ នៅក្នុងថ្លុកឈាម ។
បន្ទាប់មក សមត្ថកិច្ចបានហៅរថយន្តសាមុយមន្ទីរពេទ្យបង្អែកខេត្តស្វាយរៀង ដឹកទៅរក្សាទុកនៅមន្ទីរពេទ្យខេត្ត រង់ចាំសាច់ញាតិ មកទទួលយកទៅធ្វើបុណ្យតាមប្រពៃណី ។
ចំណែកមធ្យោបាយ (រថយន្ត និងម៉ូតូ) យកទៅរក្សាទុកនៅការិយាល័យនគបាលចរាចរណ៍ នៃស្នងការដ្ឋាននគបាលខេត្ត ដើម្បីដោះស្រាយតាមនីតិវិធី ។
មហាជនបានលើកឡើងថា រថយន្តក្រុងដឹកអ្នកដំណើររបស់ក្រុមហ៊ុនវៀតណាម យីហោ(ដានដាន)នេះ គឺបើកបរលឿនណាស់ មិនគោរពច្បាប់ចរាចរណ៍ទេ បើកបរលឿនហើយ វ៉ាជែងចំណុចគ្រោះថ្នាក់ តែងតែបង្កឲ្យគ្រោះថ្នាក់ដល់អ្នកធ្វើដំណើរតាមដងផ្លូវលេខ១ ជាញឹកញាប់ ហើយសមត្ថកិច្ចបានឃាត់អ្នកបើកបរនាំយកទៅអប់រំ និងធ្វើកិច្ចសន្យា ក៏ប៉ុន្តែ ក្រុមហ៊ុនដានដាន នៅតែបើកបរលឿនដដែល។ មហាជនបានអំពាវនាវដល់សមត្ថកិច្ច ត្រូវមានវិធានការរឹតបន្តឹងដល់អ្នកបើកបរជនបរទេស និងក្រុមហ៊ុនវៀតណាម ដែលបើកបររថយន្តធ្វើចរាចរណ៍លើដងផ្លូវជាតិលេខ១ សូមឲ្យគោរពច្បាប់ចរាចរណ៍ ជាកំហិត ហើយសមត្ថកិច្ចរឹតបន្តឹងការអនុវត្តច្បាប់ចរាចរណ៍ ឲ្យបានម៉ឺងម៉ាត់ ៕
ចែករំលែកព័តមាននេះ