ទីក្រុងម៉ូស្គូ៖ តុលាការសាលាដំបូងនៅទីក្រុងម៉ូស្គូ ប្រទេសរុស្ស៊ី បានផ្ដន្ទាទោសអតីតអ្នកការទូតម្នាក់ឱ្យជាប់ពន្ធនាគារ១២ឆ្នាំពីបទលួចយកការណ៍សម្ងាត់ផ្ដល់ទៅឱ្យអាមេរិកនៅពេលគាត់បំពេញបេសកកម្មការទូតនៅទីនោះ។ នេះបើយោងតាមសេចក្ដីប្រកាសរបស់ភ្នាក់ងារស៊ើបការណ៍សម្ងាត់ជាតិរុស្ស៊ីអែហ្វអែសប៊ី (FSB)។
អែហ្វអែសប៊ីដែលជាអ្នកស្នងតំណែងពីអង្គភាពស៊ើបការណ៍សម្ងាត់កាហ្សេបេ (KGB) កាលពីសម័យសហភាពសូវៀត អះអាងថាលោកអាសេនី កូណូវ៉ាឡូស (Arseniy Konovalov) កើតឆ្នាំ១៩៨៧ត្រូវតុលាការរកឃើញថាមានកំហុសពីបទក្បត់ជាតិ។ សេចក្ដីប្រកាសរបស់អែហ្វអែសប៊ីមានសេចក្ដីជាអាទិ៍ថាលោកកូឡូវ៉ាឡូសក្នុងនាមជាបុគ្គលិកបម្រើការនៅក្រសួងការបរទេសរុស្ស៊ី និងដែលបានចុះបេសកកម្មនៅអាមេរិករយៈពេលវែង បានបញ្ជូនព័ត៌មានសម្ងាត់យ៉ាងសកម្មទៅឱ្យភ្នាក់ងារចារកម្មរបស់អាមេរិកដើម្បីជាថ្នូរនឹងលុយ។
លោកកូណូវ៉ាឡូសត្រូវបានទីភ្នាក់ងារអែហ្វអែសប៊ីចាប់ខ្លួនកាលពីខែមីនា ឆ្នាំ២០២៤។ ទីភ្នាក់ងារព័ត៌មានតាស់ (TASS) របស់រុស្ស៊ីបានចេញផ្សាយវីឌីអូឃ្លីបបង្ហាញមុខលោកកូណូវ៉ាឡូសដែលពោរពេញដោយអារម្មណ៍តក់ស្លុតនៅពេលត្រូវចាប់ខ្លួន និងដឹកតាមរថយន្តមួយគ្រឿង។ ពេលនោះ គេប្រាប់ថាគាត់ត្រូវជាប់សង្ស័យពីបទក្បត់ជាតិ។
អែហ្វអែសប៊ីមិនបានបញ្ជាក់ថាតើព័ត៌មានអ្វីខ្លះដែលលោកកូណូវ៉ាឡូសបានបញ្ជូនទៅឱ្យភ្នាក់ងារសម្ងាត់អាមេរិកនោះទេ ហើយក៏មិនបានបញ្ជាក់ថាតើទីភ្នាក់ងារអាមេរិកមួយណាជាអ្នកទទួលការណ៍សម្ងាត់ពីគាត់ព្រោះភ្នាក់ងារចារកម្មអាមេរិកមានច្រើនស្ថាប័ន។ ចំណែកភ្នាក់ងារចារកម្មអាមេរិកក៏មិនបានធ្វើអត្ថាធិប្បាយលើរឿងនេះដែរ។ សារព័ត៌មានរុស្ស៊ីកុំម៊ែសង់ (Kommersant) ផ្សាយថាលោកកូណូវ៉ាឡូសធ្លាប់កាន់តំណែងជាលេខាទី២នៃស្ថានកុងស៊ុលរុស្ស៊ីប្រចាំទីក្រុងហូស្តុន (Houston) (រដ្ឋតិចសាសន៍)។ គាត់ធ្វើការនៅអាមេរិកចាប់ពីឆ្នាំ២០១៤-២០១៧។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ