ADផ្ទាំងផ្សព្វផ្សាយពាណិជ្ជកម្ម

ខ្មែរ-ចិនផ្ទុះហិ.ង្សារឿងជួសជុលរថយន្ត ផ្អើលយានដ្ឋានមួយកន្លែង ក្នុងសង្កាត់ចោមចៅទី២

21 ម៉ោង មុន

ភ្នំពេញ
១៦ ខែ កក្កដា ឆ្នាំ ២០២៥ ម៉ោង ១៤:១១

រាជធានីភ្នំពេញ ៖ ទំនាស់ពាក្យសម្ដីគ្នារវាងជនជាតិខ្មែរនិងចិនផ្ដើមចេញពីរឿងជួសជុលរថយន្ត ប្រើប្រាស់មិនកើតនិងទាមទារយកលុយវិញ បានក្លាយទៅជាអំពើហិង្សាវាយប្រយុទ្ធគ្នា មួយប្រាវ បណ្ដាលឲ្យស្ត្រីជនជាតិខ្មែរដែលជាម្ចាស់យានដ្ឋាន២នាក់ម្ដាយនិងកូនស្រីរងរបួសធ្ងន់ធ្ងរ ។ ចំណែកភាគីជនជាតិចិនដែលបានយករថយន្តទៅជួសជុលនោះក៏របួសស្ត្រីម្នាក់ធ្ងន់ ហើយបុរស២នាក់ក៏ត្រូវបាននគរបាលឃាត់ខ្លួននាំទៅសាកសួរនៅប៉ុស្តិ៍ផងដែរ…

ហេតុការណ៍នេះបានកើតឡើង បង្កការភ្ញាក់ផ្អើល នៅវេលាម៉ោង៩ព្រឹកថ្ងៃទី១៦ ខែកក្កដា ឆ្នាំ២០២៥ នៅចំណុចយានដ្ឋានជួសជុលរថយន្តយីហោ«ខាផៅវើ (Car Power)» ដែលមានទីតាំងស្ថិតនៅក្នុងភូមិព្រៃកំបុត សង្កាត់ចោមចៅទី២ ខណ្ឌពោធិ៍សែនជ័យ រាធានីភ្នំពេញ ។

ម្ចាស់យានដ្ឋានដែលរងរបួសធ្ងន់ទាំង២នាក់នោះម្ដាយឈ្មោះវ៉ា ផល្លី អាយុជាង៤០ឆ្នាំ និងកូនស្រីឈ្មោះស្រីពេជ្រ អាយុជាង២០ឆ្នាំ ស្នាក់នៅក្នុងភូមិកើតហេតុខាងលើ ។ ដោយឡែកភាគីជនជាតិចិនមានគ្នាចំនួន៥នាក់ ប៉ុន្តែអ្នកដៃដល់តែ៣នាក់ទេ គឺស្ត្រីម្នាក់ដែលរបួសបែកក្បាល និងបុរស២នាក់ដែលត្រូវនគរបាលចាប់ខ្លួន ហើយមិនត្រូវបានស្គាល់អត្តសញ្ញាណឡើយ ។

បើតាមជាងជួសជុលនៅយានដ្ឋានខាងលើបាននិយាយថា ទំនាស់រហូតឈានដល់ការវាយតប់គ្នានេះផ្ដើមចេញពីការ និយាយមិនត្រូវគ្នារឿងជនជាតិចិនខាងលើសុំផ្លាស់ប្ដូរគ្រឿងរថយន្ត និងទាមទារយកល្យវិញ ។ ប៉ុន្តែពួកគេយកគ្រឿងបន្លាស់មកមិនគ្រប់ហើយចេះតែបង្ខំឲ្យដូរ ហើយម្ចាស់យានដ្ឋានមិនព្រមដូរឲ្យ ក៏ផ្ទុះជាទំនាស់ពាក្យសម្ដី រហូតក្លាយជាអំពើហិង្សា ដោយភាគីជនជាតិចិនយកអំបោស និងដែកវាយទៅលើកូនស្រីម្ចាស់យានដ្ឋានមុន ទើបមានការប្រទូស្តរាយគ្នាតែម្ដង ។

ជាងជួសជុលរថយន្តដដែលនោះបាននិយាយរៀបរាប់អំពីសាវតានៃរឿងហេតុដូច្នេះថា
កាលពីអំឡុងដើមខែកក្កដា ឆ្នាំ២០២៥ ជនជាតិចិន១ក្រុមខាងលើនោះបានយករថយន្ត១គ្រឿងម៉ាកតូយ៉ូតាតាកូម៉ា ពណ៍ទឹកប្រាក់ពាក់ស្លាកលេខភ្នំពេញ2AL-3993 ទៅធ្វើការជួសជុលនិងប្ដូរគ្រឿងម៉ាសុីនត្រជានៅយានខា ផៅវើនោះ ។ ខណៈនោះអស់ថ្លៃជួសជុលនិងប្ដូរគ្រឿងថ្មីចំនួន៤៨៥ដុល្លារ លុះក្រោយជួសជុលនិងទូទាត់ប្រាក់រួចរាល់ ក៏បានយករថយន្តជិះចេញទៅបាត់ ដោយពួកគាត់(ជនជាតិចិន) ក៏បានយកគ្រឿងបន្លាស់ចាស់ៗដែលបានផ្លាស់ប្ដូររួចទាំងអស់នោះទៅជាមួយផងដែរ មិនបានទុកនៅក្នុងយានដ្ឋាននោះឡើយ ។

ជាងជួសជុលរថយន្តខាងលើបាននិយាយបន្ថែមទៀតថា រហូតមកដល់ថ្ងៃទី១៥ ខែកក្កដា ឆ្នាំ២០២៥ ក៏ឃើញយករថយន្តដដែលនោះទៅធ្វើការជួសជុលម្ដងទៀត ហើយលើកទី២នេះអស់ថ្លៃជួសជុលចំនួន៦៥ដុល្លារទៀត បន្ទាប់ពីជួសជុលរួច ក៏បានចាកចេញទៅបាត់ទៀត ។ ស្រាប់តែនៅវេលាព្រឹកថ្ងៃកើតហេតុ ក៏ឃើញជនជាតិចិនទាំងនោះមានប្រុសមានស្រីជិះរថយន្តតាកូម៉ាខាងលើ១គ្រឿង និងរថយន្ត១គ្រឿងទៀតម៉ាកតូយ៉ូតាព្រូស ពណ៍ប្រផេះ ពាក់ស្លាកលេខភ្នំពេញ2BN-3125 ទៅកាន់យានដ្ឋាន ខា ផៅវើនេះម្ដងទៀត ។

ជាងរូបនោះបានបញ្ជាក់ប្រាប់ទៀតថា ទៅលើកនេះមានគ្នា៥នាក់ក្នុងនោះជនជាតិចិនប្រុស៣នាក់ ស្រី១នាក់ រួមទាំងស្ត្រីអ្នកបកប្រែជាជនជាតិខ្មែរម្នាក់ផងដែរ ហើយបានទាមទារឲ្យដោះគ្រឿងបន្លាស់ដែលខាងយានដ្ឋានដូរឲ្យកាលពីដើមខែកក្កដានោះចេញ និងដាក់គ្រឿងបន្លាស់ចាស់ដែលបានដោះចេញនោះចូលវិញ ។ មិនតែប៉ុណ្ណោះបានទាមទារយកលុយដែលបានទូទាត់ថ្លៃជួសជុលរថយន្តទាំង២លើកអស់សរុបចំនួន៥៥០ដុល្លារនោះវិញផងដែរ ហើយខណៈនោះម្ចាស់យានដ្ឋានជាម្ដាយអត់នៅទេ នៅតែកូនស្រី ។ នាងក៏បានយល់ព្រមប្ដូរឲ្យវិញ ព្រោះនាងក៏ខ្ជិលឈ្លោះទាស់និងមិនចង់មានរឿងវែងឆ្ងាយដែរ ហើយបានឲ្យជនជាតិចិននោះយកគ្រឿងបន្លាស់ចាស់ៗ ដែលបានយកទៅទុកទាំងប៉ុន្មាននោះចេញមកដើម្បីផ្លាស់ប្ដូរឲ្យប៉ុន្តែជនជាតិចិននោះគ្មានគ្រឿងបន្លាស់ឲ្យគ្រប់ទេ ទើបមិនអាចប្ដូរបាន ។

ប្រភពពីកន្លែងកើតហេតុនោះបានប្រាប់បន្ថែមទៀតថា ពេលនោះក៏មានការទាស់ពាក្យសម្ដីគ្នាកើតឡើង ស្រាប់តែស្ត្រីជនជាតិចិនម្នាក់យកអំបោសនិងដែកវាយទៅលើស្រីពេជ្រ ដែលជាកូនស្រីម្ចាស់យានដ្ឋាន បណ្ដាលឲ្យរងរបួស ។ បន្ទាប់មកបុគ្គលិកយានដ្ឋានបានខលហៅស្ត្រីជាម្ដាយរបស់នាងឲ្យទៅកាន់យានដ្ឋានបន្ទាប់ដោយប្រាប់ថាមានរឿងហើយ គ្រាន់តែម្ចាស់យានដ្ឋានបើករថយន្តទៅដល់ភ្លាម ក៏ត្រូវបានស្ត្រីជនជាតិចិនខាងលើស្ទុះចាប់បោចសក់បោក បណ្ដាលឲ្យដួលត្រលប់ត្រឡិន ។ ទើបខណៈនោះមានការវាយប្រយុទ្ធគ្នាទៅវិញទៅមក បណ្ដាលឲ្យស្ត្រីជនជាតិចិនរបួសបែកក្បាល ហើយបុរសជនជាតិចិន២នាក់ទៀតក៏ចូលទៅវាយម្ចាសយានដ្ឋានបណ្ដាលឲ្យរងរបួសធ្ងន់ផងដែរ ។

នគរបាលបានប្រាប់ឲ្យដឹងថា ក្រោយពេលកើតហេតុ នគរបាលប៉ុស្តិ៍ចោមចៅទី២ បានចុះទៅអន្តរាគមន៍ឃាត់ខ្លួនបុរសជនជាតិចិន២នាក់នាំទៅប៉ុស្តិ៍ ខណៈម្ចាស់យានដ្ឋាន២នាក់ម្ដាយនិងកូនត្រូវបានបញ្ជូនទៅសង្គ្រោះនៅមន្ទីរពហុព្យាបាលចោមចៅ ។ ដោយឡែកស្ត្រីជនជាតិចិនដែលរងរបួសធ្ងន់ដែរនោះ ត្រូវបានបញ្ជូនតាមម៉ូតូទៅសង្គ្រោះនៅមន្ទីរពេទ្យព្រះកុសុមៈ ៕