រាជធានីភ្នំពេញ ៖ តំណាងសហគមន៍នេសាទបានលើកឡើងថា តំបន់ឡូត៍នេសាទរបស់សហគមន៍កំពុងប្រឈមដោយសារការប្រព្រឹត្តបទល្មើសខុសច្បាប់បានកើតឡើងនៅក្នុងសហគមន៍ជលផលនេសាទរបស់ពួកគាត់ដូចជា ការរំលោភធ្វើនេសាទចូលដែនអភិរក្ស ហើយជាពិសេសនៅតំបន់ដាច់ស្រយាលមានការកើនឡើងគួរឲ្យកត់សម្គាល់ ។
បញ្ហានេះត្រូវបានលើកឡើងក្នុងវេទិកាពិភាក្សាថ្នាក់ជាតិស្តីពីអភិបាលកិច្ចល្អលើការគ្រប់គ្រងធនធានជលផល ក្រោយកំណែទម្រង់ស៊ីជម្រៅ កាលពីថ្ងៃទី២៥ ខែធ្នូ ឆ្នាំ២០១៨ ។ វេទិកានេះក្រោមការឧបត្ថម្ភដោយសហភាពអឺរ៉ុបអង្គការអុកស្វាម និងហ្វ័រស៊ីដ ។ វេទិកានេះមានគោលបំណង ដើម្បីផ្តល់ឱកាសដល់សហគមន៍អាជ្ញាធរតំណាងរដ្ឋាភិបាល និងសង្គមស៊ីវិលបានចែករំលែក និងពិភាក្សាពីលទ្ធផលនៃកំណែទម្រង់ស៊ីជម្រៅរបស់រាជរដ្ឋាភិបាល។ដើម្បីពិភាក្សា និងពង្រឹងយន្តការក្នុងការចូលរួមគ្រប់គ្រងធនធានជលផលឲ្យមានប្រសិទ្ធិភាព ដើម្បីឆ្លើយតបនឹងទិសដៅនៃកំណែទម្រង់ស៊ីជម្រៅ ។
លោកយ៉េន ម៉ង់ ប្រធានសហគមន៍នេសាទសាមគ្គីភូមិកំពង់គរ ឃុំកំពង់គរ ស្រុកកំពង់គរ ខេត្តកំពង់ធំបាននិយាយថា លោកមិនសុខចិត្តចំពោះអាងមួយដែលគេធ្វើនៅក្នុងដែននេសាទ តែឆ្នាំ២០០៩-២០១០ រដ្ឋាភិបាលបានចេញ (ស.ជ.ណ) ទម្លាយអាង និងហាមមិនឲ្យធ្វើអាងទេ ។ តែនៅឆ្នាំ២០១៤មានគេមកធ្វើអាងនេះវិញ ។ លោកថា មានអ្នកមកធ្វើអាងយកទឹកដោយខ្លួនឯងដែលអាងនេះធ្វើនៅក្នុងដែនអភិរក្សជលផលរបស់សហគមន៍ជលផល ។ លោកសូមឲ្យមន្ត្រីស្ថាប័នពាក់ព័ន្ធទាំងអស់ដែលចូលរួមវេទិការជួយដោះស្រាយកង្វល់នេះផងដែលគេបានធ្វើសហគមន៍នេសាទ ។ លោកមិនចង់ឲ្យឯកជនមកគ្រប់គ្រង់ទេ សូមឲ្យផ្តល់ជូនសហគមន៍ស្រែ និងសហគមន៍ទឹកប្រើប្រាស់ទឹករួមវិញដូចមុនទៅ ។
ចំណែកលោក អ៊ីវ ធីម តំណាងសហគមន៍នេសាទភូមិកែបថ្មី និងទទឹងថ្ងៃស្រុកទឹកឈូរ ខេត្តកំពត បានលើកឡើងថា នៅឆ្នាំ២០០៨ មានក្រុមហ៊ុនកែវជាមួយបានមកវិនិយោគចាក់ដីលុបសមុទ្រចំនួន២០០ហិកតា លើផ្ទៃដីសហគមន៍ និងក្រោយមកមានជជែកគ្នាយ៉ាងខ្លាំងរហូតដល់មានការសម្របសម្រួលចុះកិច្ចសន្យារវាងក្រុមហ៊ុន និងសហគមន៍ទាំងពីរ ។ លោកថ«ពេលនេះក្រុមហ៊ុននេះនៅតែបន្តចាក់ដីចូលសមុទ្រដដែលវាជាក្តីកង្វល់ដល់សហគមន៍» ។
លោកបានលើកសំណូមពរដល់មន្ត្រីរដ្ឋាភិបាលពាក់ព័ន្ធធ្វើការកំណត់ព្រំដែនរវាងក្រុមហ៊ុន និងសហគមន៍ ។ កាលពីពេលថ្មីនេះមានការចាក់ខ្សាច់ លុបដី និងកាប់ដើមកោងកាង និងចេញប័ណ្ណឲ្យបុគ្គលមានអំណាច ហើយសហគមន៍មានការលំបាកអភិរក្ស និងការពារដែនសហគមន៍នេសាទ ។
ឯកឧត្តម អេង ជាសាន ប្រតិភូរដ្ឋាភិបាលទទួលបន្ទុកជាប្រធានរដ្ឋបាលជលផលបានថ្លែងថាចំពោះបញ្ហាខេត្តកំពង់ធំមិនចំគោលដៅនៃវេទិកាពិភាក្សាទេ ព្រោះកិច្ចពិភាក្សានេះលើកឡើងលើតំបន់ទឹកប្រៃ ឬសមុទ្រ ។ ឯកឧត្តមបន្តថា«ឯកសារទាំងនោះគួរតែផ្ញើមកក្រសួងតាមរយៈអាជ្ញាធរមូលដ្ឋានមកកាន់ក្រសួង» ។ ចំពោះតំណាងក្រសួងដែនដីនគរូបនីយ៍កម្ម និងសំណង់បានលើកឡើងថា ការកំណត់ព្រំដែននេះជាបន្តបន្ទាប់ព្រោះការកំណត់ព្រំដែនមិនមែនធ្វើមួយថ្ងៃ មួយខែ ឬមួយឆ្នាំបាននោះទេ ។
ឯកឧត្តមបដិសេធន៍មិនឆ្លើយនោះទេ នៅពេលនេះ ។ ឯកឧត្តមបានបន្តថា«បញ្ហានេះមិនអាចលើកយកមកមើលរយៈពេល២-៣នាទីនោះបានទេ ។ ពេលនេះយើងមិនដឹងថា ភាគីខាងណាខ្លះនោះទេ ។ សុំកុំប្រើពាក្យថា ទន្ទ្រានបានទេ ហើយរដ្ឋាភិបាលត្រូវការអភិវឌ្ឍន៍មិនអាចទុកចោលបានទេ ។ យើងគួរថ្លឹងថ្លែងមើលផលប្រយោជន៍សេដ្ឋកិច្ចផលប្រយោជន៍ប្រជាជន ឬទុកដីនេះចោលមិនត្រូវអភិវឌ្ឍន៍ទេ? ។
ក្នុងកិច្ចពិភាក្សានោះបានលើកឡើងថា ដើម្បីកាត់បន្ថយភាពក្រីក្ររាជរដ្ឋាភិបាលកម្ពុជាបានរៀបចំយុទ្ធសាស្ត្រចតុកោណឆ្នាំ២០០៤ និងផែនការយុទ្ធសាស្ត្រជាតិឆ្នាំ២០០៦ ហើយបានដាក់បញ្ហាអភិបាលកិច្ចល្អជាចំណុចស្នូលនៃរបៀបវារៈអភិវឌ្ឍន៍ប្រទេស ។ បច្ចុប្បន្នឃើញថា អង្គការសង្គមស៊ីវិដែលជាដៃគូអភិវឌ្ឍរបស់រាជរដ្ឋាភិបាលបានកំពុងខិតខំយ៉ាងសកម្មតាមរយៈគម្រោង និងកម្មវិធីផ្សេងៗ ដើម្បីលើកកម្ពស់ការចូលរួមរបស់ប្រជាពលរដ្ឋក្នុងការជួយរដ្ឋាភិបាល ក្នុងដំណើរការអភិវឌ្ឍន៍ឲ្យកាន់តែមានប្រសិទ្ធិភាព និងការទទួលខុសត្រូវខ្ពស់លើវិស័យជលផល ។
កំណែទម្រង់វិស័យជលផលលើកទី១ គឺបានធ្វើឡើងនៅចុងឆ្នាំ២០០០ ដោយរដ្ឋាភិបាលសម្រេចលុប និងកាត់បន្ថយនាទីឡូត៍នេសាទប្រមាណជាង៥៦% នៃផ្ទៃឡូត៍នេសាទទូទាំងប្រទេសប្រគល់ជូនប្រជាពលរដ្ឋមូលដ្ឋានប្រើប្រាស់ និងគ្រប់គ្រងតាមរយៈការរៀបចំសហគមន៍នេសាទ ៕
ចែករំលែកព័តមាននេះ