ចោទប្រកាន់ជាផ្លូវការលើក្រុម«អតីតDJឡាយអិន»…!
- ភ្នំពេញ
រាជធានីភ្នំពេញ ៖ លោក ឡុង ជាប ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នាព្រឹកថ្ងៃ ទី២៣ ខែធ្នូ បានសម្រេចធ្វើការចោទប្រកាន់ជាផ្លូវការលើជនសង្ស័យ៤នាក់…
រាជធានីភ្នំពេញ ៖ លោក ឡុង ជាប ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នាព្រឹកថ្ងៃ ទី២៣ ខែធ្នូ បានសម្រេចធ្វើការចោទប្រកាន់ជាផ្លូវការលើជនសង្ស័យ៤នាក់ (ក្រុមឡាយអិន) ពាក់ព័ន្ធនឹងករណីរក្សាទុក ជួញដូរគ្រឿងញៀន និងកាន់កាប់អាវុធដោយគ្មានការអនុញ្ញាត ដើម្បីចាត់បញ្ជូនទៅចៅក្រមសើុបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
គួរបញ្ជាក់ថា សមត្ថកិច្ចបានបើកប្រតិបត្តិការបង្ក្រាបករណីជួញដូរ និងរក្សាទុកគ្រឿងញៀនដ៏ក្តៅគគុកមួយ កាលពីវេលាម៉ោង២និង២០នាទីរំលងអធ្រាត្រឈានចូលថ្ងៃទី១៩ ខែធ្នូ នៅមជ្ឈមណ្ឌលកម្សាន្តរ៉ក់ ស្ថិតក្នុងសង្កាត់ទន្លេបាសាក់ ខណ្ឌចំការមន ។
កម្លាំងដែលបង្ក្រាបនេះគឺនគរបាលការិយាល័យទី៦នៃមន្ទីរប្រឆាំងគ្រឿងញៀន ដឹកនាំដោយលោកឧត្តមសេនីយ៍ទោ ហម គន្ធី នាយករងមន្ទីរ បានឃាត់ខ្លួនជនសង្ស័យប្រុសស្រីចំនួន៤នាក់ ។ អ្វីដែលភ្ញាក់ផ្អើលនោះ គឺជនសង្ស័យម្នាក់ក្នុងចំណោម៤នាក់នេះ ជាអតីតពិធីករទូរទស្សន៍ល្បីម្នាក់ និងដកហូត
បានថ្នាំញៀនជាង១គីឡូក្រាម ។
សេចក្តីរាយការណ៍ឲ្យដឹងថា ជនសង្ស័យទាំង៤នាក់នេះមាន ៖១-ឈ្មោះ ហែម បូរិទ្ធ ហៅឡាយអិន ភេទប្រុស អាយុ៣៣ឆ្នាំ ជាអតីតពិធីករទូរទស្សន៍ ស្នាក់នៅផ្ទះលេខ៦៣ វិថីសុធារស សង្កាត់ទន្លេបាសាក់ ខណ្ឌចំការមន ២-ឈ្មោះ វ៉ា ស្រីណា ភេទស្រី អាយុ៣៨ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់បឹងត្របែក ខណ្ឌចំការមន ៣-ឈ្មោះ អុិន សាខន ភេទប្រុស អាយុ៥១ឆ្នាំ ស្នាក់ផ្ទះជួលលេខ៦A ផ្លូវលំ សង្កាត់ស្ទឹងមានជ័យ ខណ្ឌមានជ័យ ជាមេខ្លោង និង៤-ឈ្មោះ ស៊ិន សម្ផស្ស ភេទប្រុស អាយុ៣៣ឆ្នាំ ស្នាក់នៅភូមិ៤ សង្កាត់បឹងស្រឡាង ខណ្ឌទួលគោក ។ ជននេះទើបចេញពីពន្ធនាគារ និងក៏ជាម្ចាស់កាំភ្លើងខ្លី១ដើម ។
ជាមួយនឹងការឃាត់ខ្លួនជនសង្ស័យទាំង៤នាក់នេះ សមត្ថកិច្ចបានដកហូតវត្ថុតាងនៅក្នុងបន្ទប់លេខ១០៨នៃមជ្ឈមណ្ឌលកម្សាន្តរ៉ក់រួមមាន សារធាតុញៀនប្រភេទមេហ្វេតាមីន(ICE)ទម្ងន់ ៣៧៤,៣៩ក្រាម សារធាតុញៀនប្រភេទអិចស្តាស៊ីចំនួន១៥៦២គ្រាប់ស្មើនឹងទម្ងន់៦០៩,៣៣ ក្រាម(សរុបជាង១គីឡូក្រាម) កាំភ្លើងខ្លី១ដើម ម៉ាកឡុក ជញ្ជីងថ្លឹងគ្រឿងញៀនធំ១ និងតូច២ ៕
ចែករំលែកព័តមាននេះ