រាជធានីភ្នំពេញ ៖ ស្ថានភាពប្រាសាទព្រះវិហារ ដែលជាសម្បត្តិបេតិកភណ្ឌពិភពលោក កំពុងស្ថិតក្នុងភាពប្រកាសអាសន្ន បន្ទាប់ពីការសិក្សាបានរកឃើញចំណុចខូចខាតធ្ងន់ធ្ងររហូតដល់ ៥៦២កន្លែង ដែលបង្កឡើងដោយការបាញ់បំផ្លាញពីសំណាក់យោធាថៃនាពេលកន្លងមក ។ នៅក្នុងវេទិកាសារព័ត៌មានលើប្រធានបទ…
រាជធានីភ្នំពេញ ៖ ស្ថានភាពប្រាសាទព្រះវិហារ ដែលជាសម្បត្តិបេតិកភណ្ឌពិភពលោក កំពុងស្ថិតក្នុងភាពប្រកាសអាសន្ន បន្ទាប់ពីការសិក្សាបានរកឃើញចំណុចខូចខាតធ្ងន់ធ្ងររហូតដល់ ៥៦២កន្លែង ដែលបង្កឡើងដោយការបាញ់បំផ្លាញពីសំណាក់យោធាថៃនាពេលកន្លងមក ។ នៅក្នុងវេទិកាសារព័ត៌មានលើប្រធានបទ «ការខូចខាតប្រាសាទព្រះវិហារ សម្បត្តិបេតិកភណ្ឌពិភពលោក» កាលពីថ្ងៃទី ៦ ខែមេសា ឆ្នាំ ២០២៦ មកនេះ លោក ផេង សំអឿន អគ្គនាយករងនៃអាជ្ញាធរជាតិព្រះវិហារ បានបញ្ជាក់ថា ផ្នែកសំខាន់ៗជាច្រើនរួមមាន ចម្លាក់ដ៏ពិសិដ្ឋ សិលាចារឹក ខ្លោងទ្វារ និងស្ពាននាគ បានរងការបំផ្លិចបំផ្លាញស្ទើរទាំងស្រុង ។
លោក ផេង សំអឿន បានឱ្យដឹងថា ប្រាសាទព្រះវិហារ ត្រូវបានខូចខាតយ៉ាងធ្ងន់ធ្ងរ ដែលត្រូវបានបំផ្លាញដោយយោធាថៃ ។ លោកថា យើងបានចងក្រងឯកសារដើម្បីដាក់ទៅអង្គការ UNESCO ដោយសរុបនៃការខូតខាតប្រាសាទ សរុបទាំងពីរលើកមាន ៥៦២កន្លែង ។ ចម្លាក់ប្រាសាទ គឺខូចខាតទាំងស្រុង ដោយយើងកត់សម្គាល់ឃើញថា ការខូចខាតគឺនៅកន្លែងដដែលៗ និងបានសន្និដ្ឋានថា ការបាញ់បំផ្លាញចេញពីទីតាំងដដែលនៃពួកយោធាថៃ ។
លោកបន្តថា យើងត្រូវធ្វើការងារសង្គ្រោះបន្ទាន់លើប្រាសាទ ឱ្យបានឆាប់រហ័ស ព្រោះនៅមានកន្លែងខ្លះអាចនឹងដួលរំលំបន្ត ។ លោកបានបង្ហាញថា ផ្នែកសំខាន់ៗដែលត្រូវបានបំផ្លាញ និងត្រូវសង្គ្រោះបន្ទាន់ គឺចម្លាក់ប្រាសាទដ៏ពិសិដ្ឋ គឺខូចខាតទាំងស្រុង ។ សិលាចរិកខូតខាតធ្ងន់ធ្ងរ និងការជួសជុលក៏ពិបាកដែរ ពីព្រោះភក់ ។ ចំណែកខ្លោងទ្វា និងដំបូល ដែលជាអត្តសញ្ញាណប្រាសាទព្រះវិហារក៏ខ្ទេចទាំងអស់ផងដែរ ។ ជញ្ជាំងប្រសាទ គឺសុះសាច់តែម្តង និងស្ពាននាគក៏ខូចខាតខ្លាំងដែរ ។
លោកឱ្យដឹងទៀតថា ការងារដែលយើងត្រូវសង្គ្រោះបន្ទាន់ និងការងារអភិរក្សប្រាសាទឡើងវិញ គឺទី ១ ប្រមូលឯកសារឡើងវិញ ដោយអាចប្រើ 3D scene ដែលអាចប្រមូល និងបង្ហាញទិដ្ឋភាពដែលខូចខាតគ្រប់ទីតាំងទាំងអស់ ដែលនេះជាផ្នែកមួយសំខាន់បំផុតមុននឹងយើងចាប់ផ្តើមអន្តរាគមន៍ ។ ទី ២ គឺយើងត្រូវបោសសម្អាតនូវយុទ្ធភណ្ឌមិនទាន់ផ្ទុះ ដែលនឹងត្រូវចូលរួមដោយអ្នកជំនាញរបស់យើង គឹ CMAC ។ ទី ៣ យើងធ្វើឯកសារប្រមូលបំណែក និងការបែកបាក់ផ្សេងៗ ដែលជាបច្ចេកទេសដែលស្មុគស្មាញខ្លាំង ។
អគ្គនាយករងនៃអាជ្ញាធរជាតិព្រះវិហារ បញ្ជាក់ថា អ្វីដែលយើងចាំបាច់ត្រូវធ្វើឱ្យបានឆាប់រហ័សផងដែរនោះ គឺកន្លែងកំពុងមានគ្រោះថ្នាក់ខ្លាំង ដែលវាអាចនឹងដួលរំលំបន្ថែមទៀត ។ ផ្នែកដែលគ្រោះថ្នាក់ និងប៉ះពាល់ខ្លាំង គឺជញ្ជាំង តួរប្រាសាទ និងដំបូលប្រាសាទ ។ល។ ហើយបើតាមការបកស្រាយរបស់អ្នកជំនាញបានឱ្យដឹងថា ការជួសជុលប្រាសាទអាចនឹងប្រើពេលវេលាយូរឆ្នាំ ដោយចន្លោះពី ១៨ឆ្នាំទៅ ២០ឆ្នាំ ៕
ចែករំលែកព័តមាននេះ