តម្លៃប្រេងអន្តរជាតិដាំក្បាលចុះ ក្រោយអាមេរិក-អ៊ីរ៉ង់ ព្រមព្រៀងបទឈប់បា.ញ់ ២សប្តាហ៍ និងឯកភាពបើកច្រកហ័រមូស
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៧ ខែមេសា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី៧ ខែមេសា ឆ្នាំ២០២៦ (ម៉ោងនៅសហរដ្ឋអាមេរិក) បានប្រកាសថា លោកយល់ព្រមលើបទឈប់បាញ់រយៈពេល២សប្តាហ៍រវាងសហរដ្ឋអាមេរិក និងអ៊ីរ៉ង់ ប្រសិនបើច្រកសមុទ្រហ័រមូស (Hormuz) ត្រូវបានបើកឡើងវិញភ្លាមៗ និងដោយសុវត្ថិភាព។ នេះបើយោងតាមប្រភពពី BBC និង Reuters ចេញផ្សាយនៅថ្ងៃទី៨ ខែមេសា ឆ្នាំ២០២៦។
ទន្ទឹមជាមួយគ្នានោះ អ៊ីរ៉ង់ក៏បានយល់ព្រមជាផ្លូវការចំពោះបទឈប់បាញ់២សប្តាហ៍ និងឯកភាពបើកច្រកហ័រមូស បើការវាយប្រហាររបស់សហរដ្ឋអាមេរិក និងអ៊ីស្រាអែលត្រូវបានបញ្ឈប់ភា្លមៗ។ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រកាសថា សម្រាប់រយៈពេល២សប្តាហ៍នៃបទឈប់បាញ់ ការឆ្លងកាត់ដោយសុវត្ថិភាពតាមច្រកហ័រមូសនឹងអាចធ្វើទៅបាន តាមរយៈការសម្របសម្រួលជាមួយកងកម្លាំងប្រដាប់អាវុធអ៊ីរ៉ង់ និងដោយមានការពិចារណាយ៉ាងត្រឹមត្រូវអំពីដែនកំណត់បច្ចេកទេស។
យោងតាមប្រព័ន្ធផ្សព្វផ្សាយអ៊ីរ៉ង់ បានឱ្យដឹងថា កិច្ចចរចានឹងចាប់ផ្តើម នៅថ្ងៃទី ១០ ខែមេសា ឆ្នាំ២០២៦ នៅទីក្រុងអ៊ីស្លាម៉ាបាដ (Islamabad) ប្រទេសប៉ាគីស្ថាន ខណៈដែលសហរដ្ឋអាមេរិកមិនទាន់បានបញ្ជាក់ពីការចរចានៅឡើយទេ។ សំណើ ១០ ចំណុចរបស់អ៊ីរ៉ង់ ដែលបានផ្ញើទៅសហរដ្ឋអាមេរិក សម្រាប់ការចរចាបញ្ចប់សង្គ្រាម រួមមានទាំងការឆ្លងកាត់តាមច្រកសមុទ្រហ័រមូសដែលសម្របសម្រួលជាមួយកងកម្លាំងប្រដាប់អាវុធអ៊ីរ៉ង់ ការបញ្ចប់សង្គ្រាមប្រឆាំងអ៊ីរ៉ង់ និងក្រុមសម្ព័ន្ធមិត្ត និងដកកងកម្លាំងប្រយុទ្ធរបស់អាមេរិកចេញពីមូលដ្ឋានទ័ពក្នុងតំបន់មជ្ឈិមបូព៌ាទាំងអស់។ សំណើនេះក៏រួមបញ្ចូលទាំងការដកទណ្ឌកម្មបឋម និងបន្ទាប់បន្សំទាំងអស់ ការទូទាត់សំណងពេញលេញដល់អ៊ីរ៉ង់ និងការទូទាត់ត្រឡប់មកវិញនូវទ្រព្យសម្បត្តិអ៊ីរ៉ង់ដែលបានបង្កកផងដែរ។
តម្លៃប្រេងឆៅអន្តរជាតិបានបន្តដាំក្បាលចុះភ្លាមៗ បន្ទាប់ពីលោក ត្រាំ បានប្រកាសពីបទឈប់បាញ់រយៈពេល២សប្តាហ៍តាមលក្ខខណ្ឌ។ ជាក់ស្តែង តម្លៃប្រេងឆៅប្រភេទ Brent ស្តង់ដារសកលបានធ្លាក់ចុះប្រហែល ១៣,៦% មកនៅត្រឹម ៩៤,៥០ ដុល្លារអាមេរិកក្នុង១បារ៉ែល។ ប្រេងដែលជួញដូរនៅសហរដ្ឋអាមេរិកបានធ្លាក់ចុះប្រហែល ១៤.៣% មកនៅត្រឹម ៩៦,៨០ដុល្លារ/ប៉ារែល។ ដ្បិតតម្លៃប្រេងស្តង់ដារទាំងពីរកំពុងជួញដូរលើសពី ១០០ដុល្លារ/បារ៉ែល កាលពីថ្ងៃទី៧ ខែមេសា ឆ្នាំ២០២៦៕
ចែករំលែកព័តមាននេះ