ខេត្តព្រះសីហនុ ៖ អភិបាលខេត្តព្រះសីហនុក្នុងពេលផ្តល់បទសម្ភាសន៍ជាមួយបណ្តាញផ្សព្វផ្សាយនៅថ្ងៃទី២២ ខែធ្នូនេះ បានបញ្ជាក់ថា រដ្ឋបាលខេត្តនឹងប្រើប្រាស់វិធានការច្បាប់ ដើម្បីដោះស្រាយបញ្ហានានានៅក្នុងខេត្តមានដូចជា បញ្ហាវិវាទដីធ្លី និងបញ្ហារៀបចំសណ្តាប់ធ្នាប់សាធារណៈជាដើម ។
បើតាមឯកឧត្តមអភិបាលខេត្តបញ្ជាក់បន្ថែមថា អ្នកពាក់ពន្ធ័នឹងការរំលោភដីធ្លីលើកម្មសិទ្ធិរបស់រដ្ឋដូចជា នៅតំបន់ក្បាលឆាយ ស្រះ ត្រពាំង ឬកម្មសិទ្ធិអ្នកដ៍ទៃ ដែលអាជ្ញាធររកឃើញនឹងត្រូវប្រឈមមុខជាមួយការផ្តន្ទាទោសតាមច្បាប់ ដោយពុំមានលើកលែងឡើយ ហើយពលរដ្ឋដែលមានការពាក់ពន្ធ័នឹងវិវាទដីធ្លីណាមួយដែលយល់ឃើញថា ខ្លួនមិនពាក់ពន្ធ័នឹងអំពើ ឬសកម្មភាពខុសច្បាប់ សូមដាក់បណ្តឹងមកកាន់អាជ្ញាធររដ្ឋបាលខេត្តព្រះសីហនុ ដើម្បីរួមគ្នាពិនិត្យដោះស្រាយរកខុសត្រូវក្នុងការផ្តល់យុត្តិធម៌ដោយស្មើភាព ។
រីឯវិវាទណាមួយដែលស្ថិតនៅក្នុងនីតិវិធីរបស់តុលាការ គឺសម្រេចលើឆន្ទានុសិទ្ធិរបស់ចៅក្រមជំនុំជម្រះក្តី ។ ជុំវិញបញ្ហានេះឯកឧត្តមយន្ត មីន បានពន្យល់ថា ពលរដ្ឋ ឬអ្នកពាក់ពន្ធ័នឹងការរំលោភដណ្តើមកាន់កាប់ដីធ្លីដោយខុសច្បាប់ណាមួយតាមរយៈបុគ្គលខ្លួនឯងក្តី ឬតាមរយៈមេខ្យល់ក្តី សូមបញ្ឈប់សកម្មភាព និងដកខ្លួនថយដោយសារចាប់ពីពេលនេះទៅអាជ្ញាធរគណបញ្ជាការឯកភាពរដ្ឋបាលខេត្ត ស្រុក កំពុងតែបើកយុទ្ធនាការក្តៅ ដើម្បីបញ្ឈប់គ្រប់សកម្មភាពល្មើសច្បាប់ ។
ជាមួយ និងចំណាត់ការនេះលោក សរ កក្កដា អភិបាលស្រុកព្រៃនប់ក៏ប្រកាន់ជំហរម៉ឺងម៉ាត់ តាមអភិបាលខេត្តក្នុងការទប់ស្កាត់ឈានដល់ការបង្ក្រាបជាក់ស្តែង ដើម្បីបញ្ឈប់រាប់សកម្មភាពមិនអោយកើតមានតទៅទៀត ៕
ចែករំលែកព័តមាននេះ