ដើម្បីរស់នៅក្នុងសង្គមឱ្យបានទទួលនូវសិរីសួស្តី ក្តីសុខសុភមង្គល ព្រះដ៏មានព្រះភាគទ្រង់សម្តែងឱ្យសត្វលោកយល់អំពីការអប់រំផ្លូវចិត្ត ឱ្យវៀរការកាប់សម្លាប់ លួចឆក់ប្លន់ បង្កភាពវឹកវរ ក្នុងសង្គមដែលសុទ្ធតែកើតចេញមកពីអំពើបាប ។ ដូច្នេះដើម្បីឱ្យមនុស្សម្នាក់ៗបានសម្រេចនូវសិរីសួស្តីដូចគោលបំណង ចាំបាច់ដោយខានមិនបានទាល់តែគ្រប់គ្នាចៀសវាងពីអំពើបាបអកុសល ។
អ្វីទៅដែលហៅថាបាប តើមានន័យដូចម្តេច? បាបមានន័យថា អំពើអាក្រក់ ឃោរឃៅ បៀតបៀន បង្កវិនាសកម្ម ដែលនាំឲ្យបាត់បង់ផលប្រយោជន៍ អ្នកដទៃ ។ អំពើបាបនេះ ដំបូងកកើតឡើងតួចតាចទេ ដូចជាខ្ជិលច្រអូស មិនស្តាប់បង្គាប់ឪពុកម្តាយ ដើរលេងប៉ោឡែ យូរៗទៅនឹងឈានទៅប្រព្រឹត្តរឿងធំបានដូចប្រព្រឹត្តអបាយមុខល្បែងពាលា លួច ឆក់ប្លន់ គេជាដើម ។
អំពើទាំងនេះ បានបំផ្លាញនូវប្រយោជន៍ខ្លួនឯងផង និងប្រយោជន៍អ្នកដទៃផង ព្រោះហេតុដូច្នោះ គ្រប់គ្នាត្រូវរៀនលះបង់ វៀរចេញដើម្បីសេចក្តីសុខខ្លួនឯង និងសង្គមជាតិក៏ស្ងប់រម្ងាប់ មានសន្តិភាព ។
ព្រោះហេតុនោះបានជានៅក្នុងសៀវភៅមង្គលជីវិតអ្នកប្រាជ្ញបានសរសេរថា ដើម្បីរស់នៅក្នុងសង្គមគ្រួសារក្តី ក្នុងសង្គមជាតិក្តី មានសិរីសួស្តី មានសុភមង្គល លុះត្រាតែមនុស្សគ្រប់គ្នា ជៀសវាងអំពីអំពើបាប ងាកមកប្រព្រឹត្តសុចរិតទាំងអស់គ្នា ។
ចែករំលែកព័តមាននេះ