រាជធានីភ្នំពេញ ៖ កីឡាករ កីឡាការិនីល្បុក្កតោកម្ពុជាចំនួន៦នាក់ កាលពីថ្ងៃទី២៩ មិថុនា បានចេញដំណើរទៅសម្ដែងនៅប្រទេសជប៉ុនក្នុងឱកាសខួបអនុស្សាវរីយ៍លើកទី៦០នៃទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រជប៉ុន ។ លោកហុក ឈាងគីម គ្រូបង្គោលប្រចាំសហព័ន្ធកីឡាល្បុក្កតោកម្ពុជាដែលបានដឹកនាំគណៈប្រតិភូកីឡាល្បុក្កតោទៅសម្ដែងនៅប្រទេសជប៉ុនឲ្យដឹងថា កីឡាករ កីឡាការិនី
រាជធានីភ្នំពេញ ៖ កីឡាករ កីឡាការិនីល្បុក្កតោកម្ពុជាចំនួន៦នាក់ កាលពីថ្ងៃទី២៩ មិថុនា បានចេញដំណើរទៅសម្ដែងនៅប្រទេសជប៉ុនក្នុងឱកាសខួបអនុស្សាវរីយ៍លើកទី៦០នៃទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រជប៉ុន ។ លោកហុក ឈាងគីម គ្រូបង្គោលប្រចាំសហព័ន្ធកីឡាល្បុក្កតោកម្ពុជាដែលបានដឹកនាំគណៈប្រតិភូកីឡាល្បុក្កតោទៅសម្ដែងនៅប្រទេសជប៉ុនឲ្យដឹងថា កីឡាករ កីឡាការិនីដែលចេញទៅសម្ដែងនាពេលនេះមានចំនួន៦នាក់ ក្នុងនោះកីឡាករ៤នាក់ កីឡាការិនី២នាក់ ។
នេះជាការសម្ដែងរួមគ្នាជាមួយក្បាច់គុនបុរាណជប៉ុនដើម្បីអបអរខួបអនុស្សាវរីយ៍លើកទី៦០នៃទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រជប៉ុន ។ លោកហុក ឈាងគីម បានបញ្ជាក់ថា ការសម្ដែងនេះមិនគ្រាន់តែដើម្បីអបអរខួបលើកទី៦០នៃទំនាក់ទំនងការទូតរវាងកម្ពុជា-ជប៉ុនប៉ុណ្ណោះទេ ប៉ុន្តែដើម្បីបង្ហាញឲ្យប្រជាជនជប៉ុន និងសាកលលោកបានឃើញនូវក្បាច់គុនបុរាណខ្មែរ ដែលធ្លាប់មានឈ្មោះល្បីពីអតីតកាល ហើយក៏ជាក្បាច់គុនដែលត្រៀមស្នើសុំដាក់បញ្ចូលក្នុងបញ្ជីបេតិភណ្ឌពិភពលោកផងដែរ ។
លោកបន្តថា ការសម្ដែងនោះគឺមាន១២វិញ្ញាសាសំខាន់ៗរួមមានវិញ្ញាសាទ្វារមេគុន, ទ្វារមេគុនបំបែកទិស,សមយុទ្ធខែលដំបងខ្លីភ្លោះ,ទ្វារមេគុនដំបងខ្លីភ្លោះឆ្មាព្រៃ, សមយុទ្ធដាវទោល, ទ្វារមេគុនដំបងខ្លាក្រាប, ទ្វារមេគុនស្នាដៃខ្មែរអង្គរ,ក្បាច់ការពារខ្លួនរបស់កុមារ, សមយុទ្ធដាវ និងដំបងវែង,ក្បាច់ដំបងផ្កាឈូកនិងក្បាច់ក្រមា, សមយុទ្ធដាវនិងដំបងនារី, ក្បាច់គុននារីម្នាក់វាយបុរស៣នាក់ ។ លោកសន្យាថា នឹងខិតខំយកចិត្តទុកដាក់ដឹកនាំការសម្ដែងឲ្យអស់ពីសមត្ថភាព ដើម្បីលើកកម្ពស់កិត្យានុភាពក្បាច់គុនបុរាណជាតិសាសន៍យើង និងប្រទេសជាតិយើង ។
លោកសង្ឃឹមថា ការសម្ដែងនាពេលនោះនឹងទទួលបាននូវការគាំទ្រនិងជោគជ័យមិនខាន ។ គួរបញ្ជាក់ថា រាល់ការចំណាយទាំងអស់ក្នុងការចេញទៅសម្ដែងនៅទីក្រុងតូក្យូ ប្រទេសជប៉ុន របស់គណៈប្រតិភូក្បាច់គុនល្បុក្កតោកម្ពុជា នាពេលនេះទទួលបានការឧបត្ថម្ភពីឯកអគ្គរាជទូតកម្ពុជាប្រចាំប្រទេសជប៉ុន ៕
ចែករំលែកព័តមាននេះ