រាជធានីភ្នំពេញ ៖ ក្លិបព្រះខ័នរាជស្វាយរៀង បានប្រកាសជាផ្លូវការអំពីការដាក់លក់សំបុត្រវគ្គផ្តាច់ព្រ័ត្រពានរង្វាន់ក្លិបលំដាប់ទី ៣ របស់ទ្វីបអាស៊ី AFC Challenge League 2024/2025។…
រាជធានីភ្នំពេញ ៖ ក្លិបព្រះខ័នរាជស្វាយរៀង បានប្រកាសជាផ្លូវការអំពីការដាក់លក់សំបុត្រវគ្គផ្តាច់ព្រ័ត្រពានរង្វាន់ក្លិបលំដាប់ទី ៣ របស់ទ្វីបអាស៊ី AFC Challenge League 2024/2025។
យោងតាមទំព័រហ្វេសប៊ុកផ្លូវការរបស់ក្លិបព្រះខ័នរាជស្វាយរៀង បានប្រកាសថា សំបុត្រទស្សនាការប្រកួតវគ្គផ្តាច់ព្រ័ត្រពានរង្វាន់ AFC Challenge League រវាងក្រុមតំណាងកម្ពុជា ព្រះខ័នរាជស្វាយរៀងទល់នឹងក្រុមមកពីប្រទេស តួកមេនីស្ថាន FK Arkadag នឹងដាក់លក់ចាប់ពីថ្ងៃទី១ ខែឧសភា ឆ្នាំ២០២៥ តទៅ។
សម្រាប់សំបុត្រទស្សនានេះ នឹងដាក់លក់នៅពហុកីឡដ្ឋានជាតិមរតកតេជោផ្ទាល់ រួមទាំងមានដាក់លក់នៅលើ APP: PKR Svay Rieng និងរោងភាពយន្ត LEGEND CINEMA សាខា Eden Garden ផងដែរ។
តម្លៃសំបុត្រទស្សនាចែកចេញជា ៣ ផ្នែក៖
-ផ្នែកទី១ (ជាន់ទី១) Zone A មានតម្លៃ ៥.០០០រៀល
-ផ្នែកទី២ (ជាន់ទី២) Zone B មានតម្លៃ ៨.០០០រៀល
-ផ្នែកទី៣ (ជាន់ទី៣) Zone C មានតម្លៃ ៥.០០០រៀល។
ដើម្បីបង្កើនភាពងាយស្រួលក្នុងការទិញសំបុត្រចូលរួមទស្សនាការប្រកួតនានារបស់ក្លិប ព្រះខ័នរាជស្វាយរៀង ជាពិសេសការប្រកួតដ៏សំខាន់នាពេលខាងមុខ រវាងព្រះខ័នរាជស្វាយរៀង និង FK Arkadag នាថ្ងៃទី១០ ខែឧសភា ឆ្នាំ២០២៥ វេលាម៉ោង៧យប់ នៅពហុកីឡដ្ឋានជាតិមរតកតេជោ ក្លិបបាល់ទាត់ព្រះខ័នរាជស្វាយរៀង សូមណែនាំឱ្យបងប្អូនទាំងអស់ដោន
ឡូត App ផ្លូវការរបស់ក្លិបព្រះខ័នរាជស្វាយរៀង FC ឥឡូវនេះ។
ការដោនឡូត និងប្រើប្រាស់ App របស់ក្លិប នឹងជួយសម្រួលដល់បងប្អូនក្នុងការទិញសំបុត្រតាមអនឡាញបានយ៉ាងឆាប់រហ័ស នៅពេលដែលក្លិបប្រកាសដាក់លក់សំបុត្រ។ បងប្អូននឹងមានឱកាសក្លាយជាអ្នកដំបូងគេដែលទទួលបានសំបុត្រ ដើម្បីធានាបានកៅអីល្អក្នុងការទស្សនាការប្រកួតដ៏អស្ចារ្យនេះ។
គួរឱ្យដឹងផងដែរថា ក្លិបបាល់ទាត់ព្រះខ័នរាជស្វាយរៀង ដែលជាក្រុមតំណាងឱ្យប្រទេសកម្ពុជា
បានឡើងដល់វគ្គផ្ដាច់ព្រ័ត្រក្នុងការប្រកួតពានរង្វាន់ក្លិបលំដាប់ទី៣របស់ទ្វីបអាស៊ីAFC
Challenge League ក្រោយពីយកឈ្នះក្លិបMadura United របស់ឥណ្ឌូណេសុីក្នុងវគ្គពាក់កណ្ដាលផ្ដាច់ព្រ័ត្រដោយលទ្ធផល៦ទល់នឹង៣នៅក្នុងការប្រកួតទាំង២ជើងគឺនៅក្នុងទឹកដីកម្ពុជាព្រះខ័នរាជស្វាយរៀងឈ្នះ៣-០ និងនៅក្នុងទឹកដីឥណ្ឌូណេសុីស្មើគ្នា៣-៣ ។ ដូច្នេះព្រះខ័នរាជស្វាយរៀងគឺត្រូវឡើងប៉ះនឹងក្រុម FK Arkadag ដែលជាក្រុមខ្លាំងមួយមកពីប្រទេសតួកមេនីស្ថាន។
FK Arkadag ទើបតែបង្កើតឡើងបានត្រឹមតែ២ឆ្នាំប៉ុណ្ណោះ ប៉ុន្តែស្ថិតិការប្រកួតរបស់ក្រុមមួយនេះគឺល្អខ្លាំងណាស់ដោយបានប្រមូលពានស្ទើរតែទាំងអស់ ។ អ្វីដែលគេចាប់អារម្មណ៍ខ្លាំងនោះគឺកីឡាកររបស់ក្រុមមួយនេះមានកាយសម្បទារឹងមាំដូចកីឡាករអឺរ៉ុបអ៊ីចឹងខណៈក្លិបមួយនេះក៏ទទួលបានការវិនិយោគពីអ្នកមានធនធាន(សេដ្ឋី)ច្រើនផងដែរ។
ទោះបីយ៉ាងណា ក្លិបព្រះខ័នរាជស្វាយរៀងនៅតែមានសង្ឃឹមក្នុងការលើកពានមួយនេះជាលើកដំបូងដោយសារការប្រកួតស្ថិតនៅក្នុងទឹកដីរបស់ខ្លួនដែលគេរំពឹងថានឹងមានអ្នកគាំទ្រ
រាប់មុឺននាក់ ។ ដូច្នេះសម្រាប់ការប្រកួតដ៏ជក់ចិត្តនៅថ្ងៃទី១០ ឧសភា ខាងមុខនេះ សង្ឃឹម
ថា ហ្វេនៗរបស់ក្លិបបាល់ទាត់ទាំងអស់ នឹងទៅចូលរួមគាំទ្រទាំងអស់គ្នា ដើម្បីឱ្យក្រុមបាល់ទាត់
ព្រះខ័នរាជស្វាយរៀងកាន់តែមានកម្លាំងចិត្តក្នុងការប្រកួតតតាំងជាមួយក្រុមខ្លាំង FK Arkadag ដណ្ដើមឱ្យបានពាន AFC Challenge League ជាលើកដំបូងក្នុងប្រវត្តិសាស្ត្របាល់ទាត់កម្ពុជា៕
ចែករំលែកព័តមាននេះ