រាជធានីភ្នំពេញ ៖ ការប្រកួតប្រដាល់អន្តរជាតិដែលមានឈ្មោះថា «រាជបុត្រនៃអាណាចក្រខ្មែរ» ដែលរៀបចំដោយស្ថានីយទូរទស្សន៍បាយ័ន ឧបត្ថម្ភដោយស្រាបៀរកម្ពុជានៅសង្វៀនBeeline Arena ជ្រោយចង្វា កាលពីថ្ងៃសុក្រទី២៨ មិថុនា ត្រូវគេមើលឃើញថា មានភាពកក្រើកខ្លាំងខុសពីខែមុន ។ ជាពិសេសការប្រកួតរវាងផល សោភ័ណ្ឌ និងកីឡាករចិន ដែលពុំមានការផ្សាយបន្តផ្ទាល់នោះ បានទទួលការកោតសរសើរជាងគេ ដោយសារតែគូនេះមានសភាពចាញ់ឈ្នះគ្នាដោយបច្ចេកទេស និងស្វិតស្វាញបំផុត ។
កីឡាករចាន់ រតនា គូទី១ថ្វីដ្បិតតែចាញ់ កីឡាករបារាំងSebastien Billard ដោយពិន្ទុ ប៉ុន្តែគេមិនបានទទួលការស្តីបន្ទោសពីអ្នកនិយមទស្សនាកីឡាប្រដាល់នោះឡើយ ។ ផ្ទុយទៅវិញពួកគេបានរិះគន់ពីការផ្គូផ្គងឱ្យចាន់ រតនា ប៉ះជាមួយកីឡាករអឺរ៉ុប ដែលមានកម្ពស់ខ្ពស់ជាង និងមានដៃជើងវែងៗជាងខុសគ្នាដាច់ឆ្ងាយ គឺជាកត្តាចាញ់ប្រៀបរបស់កីឡាករកម្ពុជា ។ ចំពោះកីឡាករឯម ខ្លឹមខ្មៅ ក៏ទទួលរងនូវការរិះគន់ច្រើនដែរ បើទោះជាគេអាចដណ្តើមបានលទ្ធផលឈ្នះពិន្ទុលើកីឡាករអីុស្រាអែលShuki ក៏ដោយ ។ យោងតាមបទពិសោធន៍ Shuki មិនដែលឆ្លងដល់ទឹកទី៥ឡើយ គ្រប់ពេលដែលគេមានមុខប្រកួតជាមួយកីឡាករកម្ពុជា ។
អីុចឹងហើយទើបម្នាក់ៗយល់ថា ប្រសិនបើឯម ខ្លឹមខ្មៅ ប្រកួតដោយកុំខ្លាចគឺប្រហែលជាកីឡាករ Shuki ត្រូវដួលភីងបាត់ទៅហើយក្នុងអំឡុងទឹកទី៣និងទី
៤ ។ ទោះបីយ៉ាងណា គូអន្តរជាតិសម្រាប់ខែនេះអាចធ្វើឱ្យកក្រើកសង្វៀន Beeline Arena ខុសពីខែមុន ដោយសូម្បីតែកីឡាករបរទេសដែលមានប្រវត្តិប្រកួតមិនដែលឈ្នះក៏មានការវាយលុកអាចទទួលយកបានដែរ ។ កែវ រំចង់ និងកីឡាករអីុតាលី Luca គឺជាគូអន្តរជាតិចុងក្រោយ ដែលធ្វើការផ្សាយផ្ទាល់នៅលើកញ្ចក់ទូរទស្សន៍ ហើយក៏ជាគូដែលមានសម្រែកហ៊ោកញ្ជ្រៀវខ្ទរពេញទីលានធ្វើឱ្យព្រឹត្តិការណ៍រាជបុត្រនៃអាណាចក្រខ្មែរលើរេញ Beeline Arena ជ្រោយចង្វា កក្រើកហួសពីការស្មាន ។
គូនេះ ទទួលសម្រែកគាំទ្រដោយសារតែពួកគេមានការប្រកួតឌឺគ្នាទៅមក ខណៈដែលកីឡាករអីុតាលី ត្រូវកែងផង រន្ទះជើងផង និងម៉ាត់ផងពីកែវ រំចង់ ក៏ដូចជាមិនឈឺ ហើយទប់កែវ រំចង់ បានដល់ទឹកទី៥ ។ គូនេះកីឡាករកម្ពុជាឈ្នះពិន្ទុ អីុចឹងហើយទើបជាហេតុធ្វើឱ្យការប្រកួតរវាងកីឡាករផល សោភ័ណ្ឌ និងកីឡាករចិន ArHua ក្លាយជាគូដែលទទួលបានការកោតសរសើរច្រើនជាងគេ សម្រាប់ការដណ្តើមបានជ័យជម្នះដោយស្វិតស្វាញ ។ តាំងពីដើមទឹករហូតដល់ចាញ់ឈ្នះ ផល សោភ័ណ្ឌ និងកីឡាករចិន មានសកម្មភាពវាយសម្រុកគ្នាឡើងញាក់សាច់ ដោយផល សោភ័ណ្ឌ ត្រូវគេមើលឃើញថា ផ្ងារជើងមិនតិចដងនោះទេនៅលើសង្វៀន ។
យ៉ាងណាក៏ដោយក្រោមការប្រកួតដោយប្រើជំនាញ និងស្វិតស្វាញ ទើបផល សោភ័ណ្ឌ អាចធ្វើឱ្យកីឡាករចិន របួសជើងឆ្វេងធ្ងន់ធ្ងរ ហើយបង្ខំឱ្យគ្រូបង្វឹករបស់គេ ស្នើឱ្យកូនសិស្សខ្លួនសុំចាញ់កីឡាករកម្ពុជា នៅទឹកទី៣ដោយមិននឹកស្មានដល់ ៕
ចែករំលែកព័តមាននេះ