រាជធានីភ្នំពេញ ៖ កាលពីរសៀលថ្ងៃទី២៧មិថុនា ចៅក្រមស៊ើបសួរសាលាដំបូងរាជធានីភ្នំពេញ បានសម្រេច មិនធ្វើការឃុំខ្លួនម្តាយនិងកូនប្រុស២នាក់ ដែលជាប់ពាក់ព័ន្ធនឹងការប្ដឹងចោទប្រកាន់ថា បានប្រើអំពើហិ.ង្សាលើប្រពន្ធចុង និងប្រើអាវុធភ្ជង់គំរាមប្រុងសម្លា.ប់ឪពុកនោះ តែតម្រូវដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ។
រាជធានីភ្នំពេញ ៖ កាលពីរសៀលថ្ងៃទី២៧មិថុនា ចៅក្រមស៊ើបសួរសាលាដំបូងរាជធានីភ្នំពេញ បានសម្រេច មិនធ្វើការឃុំខ្លួនម្តាយនិងកូនប្រុស២នាក់ ដែលជាប់ពាក់ព័ន្ធនឹងការប្ដឹងចោទប្រកាន់ថា បានប្រើអំពើហិង្សាលើប្រពន្ធចុង និងប្រើអាវុធភ្ជង់គំរាមប្រុងសម្លាប់ឪពុកនោះ តែតម្រូវដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ។
ការសម្រេចមិនឃុំខ្លួនស្រ្តីជាម្តាយ និងកូននេះ ប្រភពព័ត៌មាននៅសាលាដំបូងរាជធានីភ្នំ ពេញឲ្យដឹងថា តាមការសាកសួរបឋមរបស់ចៅក្រមស៊ើបសួរមិនបានរកឃើញភស្តុតាងច្បាស់លាស់ណាមួយ ដើម្បីដាក់បន្ទុកលើស្រ្តីជាម្តាយនិងកូននោះទេ ហើយដើមបណ្តឹងគឺជាប្តី និងជាឪពុកជនដែលត្រូវចោទថែមទៀត ។ ចំណុចនេះសបញ្ជាក់ឲ្យឃើញថា ដើមបណ្តឹងចេញមុខប្តឹងជំនួសប្រពន្ធចុងដែលរូបគេមានមុខងារជាប៉ូលិស មានឥទ្ធិពលសម្រាប់ដំណើរការរឿងក្តីនេះ ។ បន្ថែមលើសពីនេះទៀត ស្រ្តីជាប្រពន្ធចុងរឹតតែគ្មានភស្តុតាងណាបញ្ជាក់ឲ្យច្បាស់ថា នាងត្រូវរងរបួសដោយអំពើហិង្សានោះឡើយ ។
ប្រភពដដែលបានបន្តថា នៅចំពោះមុខតុលាការ កូនដែលត្រូវចោទបានឆ្លើយបំភ្លឺថា នៅថ្ងៃកើតហេតុពួកគេបានឃើញឪពុកដកកាំភ្លើងខ្លីភ្ជង់ម្តាយ ។ ខណៈឃើញដូច្នេះ កូនបងបានស្ទុះទៅឱបឪពុកពីក្រោយហើយប្អូនប្រុសក៏ស្ទុះទៅដណ្តើមកាំភ្លើងខ្លីពីឪពុកយកចេញ គាប់ជូនជម្លោះដ៏ស្រួចស្រាល់នោះក៏ត្រូវសមត្ថកិច្ចនគរបាលទៅដល់ និងធ្វើការឃាត់ខ្លួនម្តាយ និងកូនទាំង២នាក់ តែម្តងទៅ ។ ផ្អែកតាមចម្លើយរបស់ជនដែលត្រូវចោទ មិនជាប់ពាក់ព័ន្ធក្នុងការដណ្តើមកាំភ្លើងទៅភ្ជង់ក្នុងបំណងបាញ់សម្លាប់ឪពុកដូចការចោទប្រកាន់នោះទេ ម្យ៉ាងទៀតពួកគេស្ថិតក្នុងវ័យសិក្សាផងទើបតុលាការសម្រេចមិនឃុំខ្លួនទាំងម្តាយ និងកូនទាំង២នាក់ ។
ជនត្រូវចោទទាំង៣នាក់នេះមាន ១-ឈ្មោះចាន់ សុភា ភេទស្រី អាយុ៤០ឆ្នាំ(ម្តាយ) ២-ឈ្មោះគួយ សុខឃុន ភេទប្រុស អាយុ១៦ឆ្នាំ បានត្រូវលោកស្រីព្រះរាជអាជ្ញារងចោទប្រកាន់ពីបទហិង្សាដោយចេតនា និង៣-ឈ្មោះគួយ សុខខេង ភេទប្រុស អាយុ១៨ឆ្នាំ ត្រូវបាន ចោទប្រកាន់ពីបទប៉ុនប៉ងឃាតកម្ម ។ ដើមចមបណ្តាលឲ្យមានការចោទប្រកាន់ក្នុងសំណុំរឿង នេះត្រូវឱ្យដឹងថា កាលពីយប់ថ្ងៃទី២៣ មិថុនានៅមុខផ្ទះលេខ១៨A ផ្លូវបេតុង ភូមិបន្លាស្អិត សង្កាត់ឃ្មួញ ខណ្ឌសែនសុខ ឈ្មោះគួយ សុខា ភេទប្រុស អាយុ៤៥ឆ្នាំ ជាមន្រ្តីនគរបាលសង្កាត់ឃ្មួញ និងត្រូវជាប្តី និងជាឪពុករបស់ជនត្រូវចោទ ខណៈកំពុងនាំប្រពន្ធចុងធ្វើដំណើរតាមផ្លូវ ក៏ជួបប្រពន្ធដើម និងកូនប្រុសទាំង២នាក់ស្ទាក់ព្រួតវាយប្រពន្ធចុងនោះឲ្យដេកដួលលើដី ហើយក៏មានការប្រតាយយកកាំភ្លើងពីឪពុកផងដែរ ។
នៅចំពោះមុខសមត្ថកិច្ច ស្ត្រីឈ្មោះចាន់ សុភា ដែលជាប្រពន្ធដើមបញ្ជាក់ថា គាត់ពិតជាបានវាយតប់លើស្ត្រីប្រពន្ធចុងនោះមែន តែប្ដីគាត់បានដកកាំភ្លើងខ្លីម៉ាកកា59 ពីចង្កេះមកភ្ជង់គាត់ទើបបានជាកូនប្រុសស្ទុះទៅចាប់ក្រៀកដកយកកាំភ្លើងនោះចេញ ។ ដោយឡែកពាក្យបណ្ដឹងរបស់ប្រពន្ធដើមឈ្មោះចាន់ សុភា ដែលដាក់ទៅសមត្ថកិច្ចប៉ូលិសប្ដឹងប្ដីឈ្មោះគួយ សុខា កាលពីឆ្នាំ២០១២ កន្លងទៅ ពីបទលួចលាក់មានស្រី ជេរប្រមាថ និងគំរាមសម្លាប់ពុំទាន់ឃើញមានចំណាត់ការណាមួយនៅឡើយទេ ។
ក្នុងពាក្យបណ្ដឹងបានបញ្ជាក់ថា ឈ្មោះគួយ សុខា បានលួចលាក់មានស្រី និងរួមរស់ជាមួយគ្នាយូរហើយដោយបានចុះចោលប្រពន្ធ និងកូនៗ៤នាក់ ថែមទាំងជេរប្រមាថ បង្កជម្លោះវាយតប់គាត់ និងកូនៗឥតល្ហែ ធ្លាប់ដកកាំភ្លើងភ្ជង់គំរាមសម្លាប់គាត់ជាប្រពន្ធ និងបំផ្លិចបំផ្លាញទ្រព្យសម្បត្តិក្នុងផ្ទះអស់ជាច្រើនលើកច្រើនសាទៀតផង ។
ទោះបីជាយ៉ាងណា ការសម្រេចមិនឃុំខ្លួនជនត្រូវចោទ៣នាក់ម្ដាយ-កូនពីសំណាក់ចៅក្រមស៊ើបសួរសាលាដំបូងរាជធានីភ្នំពេញ នៅមិនមានប្រតិកម្មពីភាគីដើមបណ្ដឹងនៅឡើយទេ ។ ប៉ុន្តែរឿងនេះបើភាគីដើមបណ្ដឹងកើតទុក្ខមិនសុខចិត្តត្រូវពឹងពាក់រកមេធាវីការពារក្ដីដាក់បណ្ដឹងទាស់សាលាឧទ្ធរណ៍ដើម្បីឱ្យមានចំណាត់ការលើសំណុំរឿងនេះឡើងវិញបាន ៕
ចែករំលែកព័តមាននេះ