រាជធានីភ្នំពេញ ៖ មនុស្សយើងម្នាក់ៗសុទ្ធតែមានបំណងប្រាថ្នានិងក្ដីស្រមៃរៀងៗខ្លួន ប៉ុន្តែបំណងប្រាថ្នានិងក្ដីស្រមៃនោះអាចឈានដល់គោលដៅបានអាស្រ័យទាល់តែមានការខិតខំប្រឹងប្រែងបូករួមទាំងមានទេពកោសល្យពីធម្មជាតិទៀតទើបបាន ។ ជាស្ដែង លោក ហុក សុជីវ័ន្ត អតីតកីឡាករបាល់ទាត់មួយរូបបានខិតខំតស៊ូប្រឡូកនៅក្នុងវិស័យបាល់ទាត់អស់ជិត២០ឆ្នាំ…
រាជធានីភ្នំពេញ ៖ មនុស្សយើងម្នាក់ៗសុទ្ធតែមានបំណងប្រាថ្នានិងក្ដីស្រមៃរៀងៗខ្លួន ប៉ុន្តែបំណងប្រាថ្នានិងក្ដីស្រមៃនោះអាចឈានដល់គោលដៅបានអាស្រ័យទាល់តែមានការខិតខំប្រឹងប្រែងបូករួមទាំងមានទេពកោសល្យពីធម្មជាតិទៀតទើបបាន ។ ជាស្ដែង លោក ហុក សុជីវ័ន្ត អតីតកីឡាករបាល់ទាត់មួយរូបបានខិតខំតស៊ូប្រឡូកនៅក្នុងវិស័យបាល់ទាត់អស់ជិត២០ឆ្នាំ ទើបអាចក្លាយខ្លួនជាគ្រូបង្គោលរបស់ក្លិបវិសាខារហូតមកទល់សព្វថ្ងៃដែលជាក្ដីស្រមៃរបស់លោកផងដែរ ។
ជួបអ្នកសារព័ត៌មានកោះសន្តិភាព លោក ហុក សុជីវ័ន្ត បានរៀបរាប់ពីប្រវត្តិតស៊ូ និងក្ដីស្រមៃរបស់ខ្លួនជូនប្រិយមិត្តអ្នកអានបានជ្រាបផងដែរ ។ ដោយសារមានឈាមជ័រជាអ្នកកីឡានិងស្រឡាញ់កីឡាបាល់ទាត់តាំងពីនៅតូចៗលោកបានឈានជើងចូលលេងបាល់ទាត់ស៊ប់នៅក្នុងឆ្នាំ១៩៩៩ដោយដំបូងលេងឱ្យក្លិបទីបញ្ជាការកងទ័ពជើងទឹក ។
កាលណោះវិស័យកីឡាបាល់ទាត់នៅកម្ពុជាមិនទាន់រីកចម្រើននៅឡើយដោយសារមិនទាន់មានការប្រកួតប្រជែងខ្លាំង ខណៈក្លិបបាល់ទាត់ដែលមានក្របខ័ណ្ឌត្រឹមត្រូវមានតែ៣ទៅ៤ក្លិបប៉ុណ្ណោះ ។ ចំណែកកីឡាករវិញទទួលបានប្រាក់ឧបត្ថម្ភពីការប្រកួតម្ដងៗត្រឹមតែជាង១០ម៉ឺនរៀល ហើយចំពោះទីផ្សារដោះដូរកីឡាករពុំទាន់មានភាពទូលំទូលាយដូចសព្វថ្ងៃនេះទេ ។ រហូតដល់ឆ្នាំ២០០៣ទើបមានក្លិបជាច្រើនកើតឡើង ឯការដោះដូរកីឡាករក៏កាន់តែមានសកម្មភាពផុលផុស ទើបធ្វើឱ្យលោកមានឱកាសផ្លាស់ប្ដូរទៅលេងឱ្យក្លិបផ្សេងៗជាច្រើន ដូចជានៅឆ្នាំ២០០៣ លោកបានផ្លាស់មកលេងឱ្យក្លិបសាម៉ាតយូណាយធីត ។
បន្ទាប់មកនៅឆ្នាំ២០០៨វិស័យកីឡាបាល់ទាត់ចេះតែមានការរីកចម្រើន ខ្លាំងឡើង ការលេងរបស់លោកក៏មានការអភិវឌ្ឍទាំងផ្នែកបច្ចេកទេស និងកម្លាំង ដែលសព្វថ្ងៃគេហៅថា Super Star នោះ រូបលោកត្រូវបានគេទាក់ទងឱ្យទៅលេងឱ្យក្លិបជាច្រើនដូច ជាក្លិបខេត្តស្វាយរៀង ភ្នំពេញអីុមផាយអឺរ ក្លិបគីរីវង្សសុខសែនជ័យជាដើម ។ លោកបានចូលហាត់សមជើងលេងឱ្យក្លិបភ្នំពេញក្រោនដែលបានអភិវឌ្ឍខ្លួនពីក្លិបភ្នំពេញអីុមផាយអឺរនៅក្នុងឆ្នាំ២០០៩ ដើម្បីត្រៀមប្រកួតវគ្គជម្រុះAFF Suzuki Cup។ ក្រោយមកលោកក៏បានសម្រាកមួយរយៈ និងបានវិលត្រឡប់មកលេងឱ្យក្លិបភ្នំពេញក្រោនដដែលនៅក្នុងឆ្នាំ២០១០។
លោកបានជួយឱ្យក្លិបភ្នំពេញក្រោនឡើងដល់វគ្គផ្ដាច់ព្រ័ត្រពានរង្វាន់ AFF Presiden Cupនៅលើទឹកដីកោះតៃវ៉ាន់ហើយដណ្ដើមបានពានជើងឯកទៀតផង លុះដល់ឆ្នាំ២០១១លោកក៏បានលាឈប់ពីអាជីពជាកីឡាករបាល់ទាត់មកចាប់អាជីពជាគ្រូបង្វឹកវិញម្ដង។
លោក ហុក សុជីវ័ន្ត បន្តថា មុននឹងក្លាយជាគ្រូបង្វឹកកីឡាបាល់ទាត់សព្វថ្ងៃនេះ លោកបានឆ្លងកាត់ការបណ្ដុះបណ្ដាលនៅសាលាមធ្យមអប់រំកាយនិងកីឡាត្រឹមត្រូវគឺតាំងពីឆ្នាំ២០០៣មកម្លេ៉ះ ហើយលោកធ្លាប់ធ្វើជាគ្រូបង្វឹកកីឡាបាល់ទាត់នៅតាមសាលារៀន។ ចូលរៀនវគ្គបណ្ដុះបណ្ដាលជំនាញគ្រូបង្វឹកដែលរៀបចំឡើងដោយសហព័ន្ធកីឡាបាល់ទាត់អន្តរជាតិជាច្រើនវគ្គ និងធ្លាប់បម្រើការងារជាគ្រូបង្គោលរបស់ក្រុមជម្រើសជាតិអាយុក្រោម១៧ឆ្នាំ គ្រូបង្គោលរបស់ក្លិបខេមបូឌាថាយហ្គឺ និងធ្វើជាគ្រូបង្គោលរបស់ក្លិបវិសាខារហូតមកទល់សព្វថ្ងៃនេះ ។
លោក ហុក សុជីវ័ន្ត ក៏បានបញ្ជាក់ផងដែរថា លោកមានប្រពន្ធនិងកូនស្រី២នាក់ ប្រពន្ធរបស់លោកជាមន្ត្រីរាជការបម្រើការនៅក្រសួងអប់រំ យុវជន និងកីឡា ។ ចំណែកឪពុករបស់លោកគឺលោកគ្រូតាហុក ឈាងគីម ជាគ្រូកីឡាល្បុក្កតោផង និងជាគ្រូព្យាបាលចលនាសរសៃដល់កីឡាករ ។ លោកមានបងប្អូន៤នាក់ប្រុស៣ស្រី១ បងប្រុសរបស់លោកគឺលោក ហុកសុចិត្រា អតីតកីឡាករខ្សែប្រយុទ្ធរបស់ក្រុមជម្រើសជាតិអំឡុងទសវត្សឆ្នាំ១៩៩០ សព្វថ្ងៃជាអ្នកចាត់ការទូទៅរបស់ក្លិបវិសាខា ។ បងស្រីទី២អ្នកស្រី ហុក សុកញ្ញា ជាកីឡាការិនីវ៉ូស៊ូ បងប្រុសទី៣គឺលោក ហុក សុទិត្យា ក៏ជាអតីតកីឡាករបាល់ទាត់របស់ក្រុមជម្រើសជាតិមួយរូបដែរ និងរូបលោកគឺជាកូនពៅ ៕
ចែករំលែកព័តមាននេះ