រាជធានីភ្នំពេញ ៖ នៅលើសង្វៀនរាជបុត្រអង្គររបស់ស្ថានីយទូរទស្សន៍បាយ័ន ស្ថិតក្នុងបរិវេណ Beeline Arena ជ្រោយចង្វា នាថ្ងៃសុក្រទី២៨ មិថុនា នេះ មានការប្រកួតរវាងគូអន្តរជាតិចំនួន៤គូទៀតហើយ ។ការប្រកួតសម្រាប់ខែនេះត្រូវគេមើលឃើញថា ជាព្រឹត្តិការណ៍ធំកម្រកើតមានដោយសារតែកីឡាករដែលតំណាងឱ្យកម្ពុជាគឺសុទ្ធតែជាជើងខ្លាំង និងល្បីឈ្មោះដែលត្រូវគេប្រដូចជាខ្លាកំណាចនៅក្នុងពិភពប្រដាល់ ។
គូអន្តរជាតិទី១ កីឡាករកម្ពុជា ចាន់ រតនា ឡើងសង្វៀនបើកឆាកប្រកួតជាមួយកីឡាករ Sebastien Billard ជាជនជាតិបារាំង សម្រាប់ស្វាគមន៍ដល់អ្នកទស្សនា ។ ជើងចាស់ ចាន់ រតនា ត្រូវគេជឿថា មានសមត្ថភាពអាចទប់នឹងភាពខ្លាំងរបស់ដៃគូបានដោយសារតែក្នុងពិភពប្រដាល់គេជាដៃគូរបស់កែវ រំចង់ និងមានស្នៀតក្បាច់គុនខម ព្រមទាំងល្បុក្កតោគួរឱ្យសរសើរ ។ ទោះបីជាយ៉ាងណា គេមិនទាន់ប្រាកដទាំងស្រុងថា ជើងខ្លាំងជនជាតិបារាំងSebastien Billard ក្លាយជាអ្នកចាញ់ក្រោមដៃចាន់ រតនា នោះទេ ខណៈអ្នកដែលយល់ថា ចាន់ រតនា ជាអ្នកចាញ់ក្រោមដៃរបស់កីឡាករជនជាតិបារាំងក៏មានសន្ទស្សន៍ច្រើនគួរសម ។
គូអន្តរជាទិទី២ កីឡាករកម្ពុជាឯម ខ្លឹមខ្មៅ ប៉ះជាមួយកីឡាករជនជាតិអីុស្រាអែល Shuki ដែលល្បីថាបានទទួលការហ្វឹកហាត់ច្រើន មុនពេលឆ្លងដែនមកដល់កម្ពុជា ។ សម្រាប់គូនេះ គេមិនអាចប៉ាន់ស្មានពីលទ្ធផលបានទេ ក្នុងពេលដែលប្រវត្តិរបស់កីឡាករជាតិអីុស្រាអែលរូបនេះនៅមិនទាន់មានការលាតត្រដាងរហូតមកទល់ពេលនេះ ។ សម្រាប់គូនេះគេនៅតែជឿថា កីឡាករឯម ខ្លឹមខ្មៅ នឹងទទួលបានជោគជ័យ ប៉ុន្តែបើឱ្យមានការជឿជាក់១០០% គឺពុំមានឡើយ ។ គូអន្តរជាតិទី៣ កីឡាករកម្ពុជា កែវ រំចង់ ប៉ះជាមួយកីឡាករ Luca មកពីប្រទេសអីុតាលី មានការសន្និដ្ឋានរួចជាស្រេចថា កីឡាកររូបនេះនឹងឈ្នះដោយមិនលំបាក ។
ការយល់ឃើញបែបនេះដោយសារតែកន្លងមកគេឃើញកីឡាករកែវ រំចង់ ឡើងសង្វៀនស្ថានីយទូរទស្សន៍បាយ័នម្តងៗគឺកម្រឃើញចាញ់ណាស់ ។ ស្របគ្នាដែលកែវ រំចង់ ជាកំពូលកីឡាករមួយរូបផង ទើបគេជឿថាកីឡាករជនជាតិអីុតាលីពិតជាពិបាកស៊ីកីឡាករកម្ពុជារូបនេះ ។ យ៉ាងណាក៏ដោយ គេមិនជឿថា កែវ រំចង់ ទទួលជ័យជម្នះក្នុងរូបភាពចម្រូងចម្រាស ដូចកាលដែលគេឡើងសង្វៀនប្រកួតជាមួយកីឡាករថៃ Jetsada ហើយត្រូវកីឡាករនេះសម្តែងការតវ៉ានៅកណ្តាលឆាកនោះឡើយ ។
សម្រាប់គូអន្តរជាតិចុងក្រោយ គឺការប្រកួតរវាងកីឡាករកម្ពុជាផល សោភ័ណ្ឌ និងកីឡាករចិន ArHua ។ តាមអ្នករៀបចំនៅសង្វៀនបាយ័នអះអាងថា កីឡាករចិនដែលជាដៃគូរបស់ផល សោភ័ណ្ឌ គឺជាកីឡាករខ្លាំងមួយរូប ដែលមានប្រវត្តិផ្តួលដៃគូជាជើងខ្លាំងៗ ឱ្យបាក់ស្បាតច្រើនលើករួចមកហើយ ។ អីុចឹងហើយ ទើបការប្រកួតរវាងគូនេះ ហាក់មានការចាប់អារម្មណ៍ច្រើនលើកីឡាករផល សោភ័ណ្ឌ ដើម្បីចង់ដឹងថា តើគេអាចដណ្តើមប្រវត្តិសាស្ត្រជោគជ័យរបស់ខ្លួនបានឬមិនបាន ។
ចាំមើលមើល៍! តើក្នុងចំណោមកីឡាករជើងខ្លាំងរបស់កម្ពុជាទាំង៤រូប កីឡាកររូបណា នឹងទទួលបានជោគជ័យនៅលើសង្វៀនរាជបុត្រអង្គរសម្រាប់ខែនេះ ?
ចែករំលែកព័តមាននេះ