តាមដីកាកោះរបស់សាលាដំបូងរាជធានីភ្នំពេញ ប្រធានស្តីទីគណបក្សសង្គ្រោះជាតិ លោក កឹម សុខា នឹងត្រូវចូលទៅកាន់តុលាការនៅព្រឹកថ្ងៃទី២៧ មិថុនា ២០១៣ ដើម្បីឲ្យព្រះរាជអាជ្ញាធ្វើការសាកសួរ តាមពាក្យបណ្តឹងរបស់លោក ជុំ ម៉ី និងអតីតជនរងគ្រោះក្នុងរបបខ្មែរក្រហមមួយចំនួនទៀត ពីបទបរិហារកេរ្តិ៍ជាសាធារណៈ ។
កោះសន្តិភាពមិនទាន់អាចទាក់ទងលោក កឹម សុខា ដើម្បីសុំការអត្ថាធិប្បាយបាននៅឡើយទេនៅព្រឹកថ្ងៃព្រហស្បតិ៍នេះ ប៉ុន្តែបើតាមមន្រ្តីជាន់ខ្ពស់គណបក្សសង្គ្រោះជាតិបានបា្រប់ប្រព័ន្ឋផ្សព្វផ្សាយមួយចំនួនកាលពីដើមសបា្តហ៏នេះថា លោក កឹម សុខា ទំនងជាពុំមានវត្តមាននៅសាលាដំបូងរាជធានីភ្នំពេញតាមដីកាកោះនោះទេ ពីព្រោះ លោក កឹម សុខា ពុំមានពេលវេលានិងជាប់រវល់ចុះតាមមូលដ្ឋាន ។
គួរបញ្ចាក់ថា លោក កឹម សុខា ត្រូវបានលោក ជុំ ម៉ី និងអតីតជនរងគ្រោះក្នុងរបបខ្មែរក្រហមមួយចំនួនទៀត តាមរយៈមេធាវីរបស់ខ្លួនបានដាក់ពាក្យបណ្តឹងប្រឆាំង លោក កឹម សុខា កាលពីថ្ងៃទី១៤ មិថុនា ២០១៣ ពីបទបរិហារកេរ្តិ៍ជាសាធារណៈ ក្រោយពេលដែលមេដឹកនំាគណបក្សសង្គ្រោះជាតិរូបនេះ បាននិយាយថា ខ្សែអាត់សំឡេងដែលគេចាក់ផ្សាយថា លោក កឹម សុខា និយាយថា គុកទួលស្លែងជាកន្លែងសិប្បនិម្មិត ជាខ្សែអាត់កាត់ត ។
បើតាមលោក ជុំ ម៉ី ពាក្យបណ្តឹងនេះលោកទាមទារឲ្យលោក កឹម សុខា បង់បា្រក់ចំនួន១០០០ដុល្លារ ដើម្បីយកទៅបង្សុកូលគោរពវិញ្ញាណក្ខន្ឋដល់អ្នកស្លាប់នៅគុកទួលស្លែង និង អ្នកដែលបានស្លាប់ក្នុងរបបខ្មែរក្រហមទំាងអស់ ៕
ចែករំលែកព័តមាននេះ