យុទ្ឋនាការឃោសនា​រកសំឡេងឆ្នោត​សម្រាប់ការបោះឆ្នោតជ្រើស​តំាងតំណាងរាស្រ្តនីតិកាលទី៥​នៃរដ្ឋសភា​ នឹងចាប់ផ្តើមហើយ​នៅព្រឹកថ្ងៃទី២៧ មិថុនា​ ២០១៣ ។

សម្រាប់ថ្ងៃដំបូង​នៃយុទ្ឋនាការឃោសនា​រកសំឡេងឆ្នោត​នេះដែរ គណបក្សប្រជាជនកម្ពុជា​(CPP) នឹងជួបជុំគ្នានៅមជ្ឈមណ្ឌល​កោះពេជ្រ ​បន្ទាប់មកទើប​​ចាប់ផ្តើម​ហែ​ក្បួននៅក្នុង​និងជុំវិញរាជធានី​ភ្នំពេញ ។

បើតាមប្រធាន​គណបក្សប្រជាជនរាជធានីភ្នំពេញ​ លោក កែប ជុតិមា ​បានឲ្យដឹងថា ព្រឹកស្អែកនេះ​នឹងមានសមាជិក​គណបក្សចំនួន២ម៉ឺននាក់​ រថយន្ត៦០០គ្រឿង​ និង ម៉ូតូ២ពាន់គ្រឿង​ចូលរួមហែក្បួនឃោសនា​រកសំឡេងឆ្នោត​ ។

ចំណែក​គណបក្សសង្គ្រោះជាតិនោះវិញ​ នឹងជួបជុំគ្នា​នៅមុខទីលានប្រជាធិបតេយ្យ​ ស្ថិតនៅខាងក្រោយ​ស្ថានទូតអាមេរិក​ ហើយនឹងចាប់ផ្តើម​ហែក្បួនជុំវិញ​​រាជធានី​ភ្នំពេញ​នៅម៉ោង៩និង៣០នាទីព្រឹក​ ហើយបិទបញ្ចប់នៅ​ម៉ោង១២ថ្ងៃត្រង់​ ។

រីឯគណបក្សហ៊្វុនស៊ិនប៉ិចនោះវិញ​ បើតាមប្រភពពីមន្រ្តីជាន់ខ្ពស់គណបក្សនេះ គឺនឹងធ្វើធំនៅខេត្តកំពង់ចាម​ ហើយនៅថ្ងៃទី០៣ កក្កដា​ ទើបធ្វើនៅរាជធានីភ្នំពេញ ។ ចំណែក​គណបក្សនយោបាយ០៥ផ្សេងទៀត​ក៏នឹងចាប់ផ្តើមនៅថ្ងៃស្អែកនេះដែរ​ ដែលគណបក្សខ្លះធ្វើធំនៅរាជធានី​ភ្នំពេញ ខ្លះធ្វើនៅតាមបណ្តាខេត្តនានា​ ៕