ខេត្តបាត់ដំបង ៖ សមត្ថកិច្ចបានឱ្យដឹងថា តុលាការបានសម្រេចចេញដីកាបញ្ជាឱ្យឃុំខ្លួនជនជាតិវៀតណាម និងខ្មែរចំនួន៨នាក់ ដែលលួចជីកកំណប់ក្រោមរូបសំណាកតោថ្ម ស្ពានថ្មចាស់ ក្នុងពន្ធនាគារខេត្តបណ្តោះអាសន្នហើយ កាលពីរសៀលថ្ងៃទី២៤ មិថុនា ដើម្បីបើកការសើុបអង្កេតបន្ត ។
ខេត្តបាត់ដំបង ៖ សមត្ថកិច្ចបានឱ្យដឹងថា តុលាការបានសម្រេចចេញដីកាបញ្ជាឱ្យឃុំខ្លួនជនជាតិវៀតណាម និងខ្មែរចំនួន៨នាក់ ដែលលួចជីកកំណប់ក្រោមរូបសំណាកតោថ្ម ស្ពានថ្មចាស់ ក្នុងពន្ធនាគារខេត្តបណ្តោះអាសន្នហើយ កាលពីរសៀលថ្ងៃទី២៤ មិថុនា ដើម្បីបើកការសើុបអង្កេតបន្ត ។
សមត្ថកិច្ចជំនាញនិយាយថា ជនសង្ស័យជនជាតិវៀតណាមទាំង៦នាក់នោះគ្មានលិខិតឆ្លងដែនទេ ហើយត្រូវតំណាងអយ្យការចោទប្រកាន់ពីបទ«ឆ្លងដែនខុសច្បាប់ » និងមួយករណីទៀតដែលមានខ្មែរ២នាក់ចូលរួមផងគឺពីបទ«គាស់កកាយបំផ្លាញទ្រព្យសម្បត្តិរដ្ឋ» ។ លោកចៅក្រមសើុបសួរបានសម្រេចចេញដីកាបង្គាប់ឱ្យនាំខ្លួនជនសង្ស័យយួន និងខ្មែរទាំង៨នាក់នេះ ក្នុងនោះមានស្ត្រីម្នាក់ផង ទៅឃុំខ្លួនជាបណ្តោះអាសន្នក្នុងពន្ធនាគារ កាលពីរសៀលថ្ងៃទី២៤ មិថុនា ដើម្បីបើកការស៊ើបអង្កេតបន្តមុនពេលជំនុំជម្រះ ។
ពិរុទ្ធជនទាំង៨នាក់មាន១-លឹម ហុកណៃ ភេទប្រុស អាយុ៣៦ឆ្នាំ ជាជនជាតិខ្មែរនិងជាម្ចាស់រថយន្ត ២-ឈ្មោះមាស សុភាព ភេទប្រុស អាយុ៥៥ឆ្នាំ ជនជាតិខ្មែរ ៣-ឈ្មោះកៅ ស៊ុនណាម ភេទប្រុស អាយុ៣៣ឆ្នាំ ៤-ឈ្មោះវឿង វ៉ុកហយ ភេទប្រុស អាយុ៥៧ឆ្នាំ ៥-ឈ្មោះង្វៀង ចិនហុង ភេទប្រុស អាយុ២២ឆ្នាំ ៦-ឈ្មោះង្វៀង វ៉ាន់លេង ភេទប្រុស អាយុ២៤ឆ្នាំ ៧-ឈ្មោះទ្រឹង វ៉ាន់ធី ភេទប្រុស អាយុ៣៧ឆ្នាំ និង៨-ឈ្មោះង្វៀង ធីដាន ភេទស្រី អាយុ៤០ឆ្នាំ ទាំង៦នាក់នេះជាជនជាតិវៀតណាម ។ ជាមួយគ្នានេះរថយន្ត១គ្រឿងម៉ាក អីុស៊ុយហ្សុ៊យ សេ៊រីឆ្នាំ២០១២ ពណ៌ទឹកប្រាក់ពាក់ស្លាកលេខភ្នំពេញ២V-២២៣៨ ដែលក្រុមនេះជិះធ្វើសកម្មភាព ក៏ត្រូវរក្សាទុកនៅឯតុលាការដែរ ។
សូមបញ្ជាក់ថា ក្រុមជនសង្ស័យទាំង៨នាក់ខាងលើនេះ បានលួចជីកកំណប់ក្រោមរូបសំណាកតោថ្ម នៅក្បាលស្ពានថ្មចាស់ ស្ទឹងសង្កែ ត្រើយខាងលិច នៅវេលាម៉ោងប្រហែល២រំលងអធ្រាត្រឈានចូលថ្ងៃទី២២ មិថុនា ឆ្នាំ២០១៣។ ប៉ុន្តែ១ម៉ោងក្រោយ មកក៏បែកការណ៍ ទើបសមត្ថកិច្ចប៉ូលិសនៃស្នងការដ្ឋានខេត្តចេញអន្តរាគមន៍ដេញតាមចាប់រហូតទល់ភ្លឺ ។ នៅកន្លែងជីកកំណប់ គេឃើញមានស្នាមជីកលុងចូលទៅខាងក្រោមរូបសំណាកតោថ្ម ដែលមនុស្សអាចចូលក្រោមនេះបាន ។
ក្រុមនេះមានបក្សពួកចំនួន១០នាក់ ក្នុងនោះជនជាតិវៀតណាម៨និងខ្មែរ២នាក់បានចូលលួចជីករកកំណប់នៅចំណុចខាងលើ ប៉ុន្តែសមត្ថកិច្ចរបស់ស្នងការដ្ឋានខេត្តបានដេញចាប់ខ្លួនបានតែ៨នាក់ប៉ុណ្ណោះ រីឯ២នាក់ទៀតបានរត់រួច ។ ក្រោយពេលចាប់ខ្លួនជនសង្ស័យបានសារភាពថាពិតជាបានប្រព្រឹត្តដូចការចោទប្រកាន់មែន ។ គេនៅមិនទាន់ដឹងថា តើនៅក្រោមរូបសំណាកតោថ្មនោះមានកំណប់ដូចក្រុមជនទាំងនេះអះអាងដែរ ឬយ៉ាងណានោះទេ ។
បើតាមប្រភពព័ត៌មានពីមន្ត្រីនានាបានឱ្យដឹងថា តាំងពីអំឡុងទសវត្ស៨០រហូតមក គេឃើញមន្ត្រីមានអំណាចក្នុងខេត្តជាច្រើននាក់ បានរុករកកំណប់នៅចំណុចក្បាលស្ពានថ្មចាស់នោះ តែគ្មានលទ្ធផលទេ ។ លុះមកដល់ពេលនេះ ស្រាប់តែលេចជនជាតិវៀតណាមមួយក្រុមខាងលើនេះ បាននាំគ្នាមកលួចជីកកកាយស្វែងរកកំណប់លើទីតាំងដដែលនេះទៀត។ ទោះជាយ៉ាងណា អាជ្ញាធរបានបញ្ជាឱ្យលប់រណ្តៅកំណប់ក្បែររូបតោថ្មនោះវិញហើយ ។ រីឯសមត្ថកិច្ចក៏នៅតែបន្តតាមឃ្លាំមើលជាប្រចាំផងដែរ ក្រែងមានក្រុមសង្គមងងឹតផ្សេងៗទៀតនាំគ្នាមកលួចគាស់កកាយសាជាថ្មី ៕
ចែករំលែកព័តមាននេះ