រាជធានីភ្នំពេញ ៖ មុនពេលយុទ្ធនាការឃោសនាបោះឆ្នោតចូលមកដល់នៅថ្ងៃស្អែកនេះ មានការលេចចេញនូវបាតុភាពមួយចំនួន ដែលបាតុភាពទាំងនោះត្រូវបានគណៈបញ្ជាការសន្ដិសុខអចិន្ដ្រៃយ៍ចាត់ទុកថា ជាការគំរាមកំហែង បំភិតបំភ័យខាងនយោបាយ ធ្វើឱ្យប៉ះពាល់ដល់ដំណើរការបោះឆ្នោតនាពេលខាងមុខនេះ ហើយក៏ជាចេតនាមួយមិនទទួលស្គាល់លទ្ធផលនៃការបោះឆ្នោតទៀតផង ។
ក្នុងសេចក្ដីណែនាំចុះថ្ងៃទី២១ មិថុនា ឆ្នាំ២០១៣ របស់គណៈបញ្ជាការសន្ដិសុខអចិន្ដ្រៃយ៍ដែលចុះហត្ថលេខាដោយលោកឧបនាយករដ្ឋមន្ដ្រី ស ខេង មានខ្លឹមសារថា គណៈបញ្ជាការសន្ដិសុខអចិន្ដ្រៃយ៍បានពិនិត្យឃើញថា គណៈបញ្ជាការសន្ដិសុខអចិន្ដ្រៃយ៍គ្រប់លំដាប់ថ្នាក់បានយកចិត្ដទុកដាក់បញ្ជាដឹកនាំ ចាត់ចែងកម្លាំង និងចាត់វិធានការរក្សាសន្ដិសុខ សណ្ដាប់ធ្នាប់សាធារណៈបម្រើដល់ដំណើរការរៀបចំការបោះឆ្នោត ដែលបាន និងកំពុងប្រព្រឹត្ដទៅនាពេលនេះបានដោយរលូន និងទទួលបានជោគជ័យ ។
ប៉ុន្ដែពេលថ្មីៗនេះ លេចចេញនូវបាតុភាពមួយចំនួន ឬអាចជាការរៀបចំឆាកដែលមានចរិតធ្វើឱ្យល្អក់កករបរិយាកាសបោះឆ្នោត ដើម្បីយកលេសជាការគំរាមកំហែង បំភិតបំភ័យខាងនយោបាយ ធ្វើជាទឡ្ហីករណ៍បំផ្លាញ ឬមិនទទួលស្គាល់លទ្ធផលបោះឆ្នោត ដែលនឹងប្រព្រឹត្ដទៅនៅថ្ងៃទី២៨ កក្កដា ឆ្នាំ២០១៣ខាងមុខនេះ ។
អាស្រ័យហេតុនេះ ដើម្បីធានាឱ្យកាន់តែល្អប្រសើរបរិយាកាសសន្ដិសុខ សណ្ដាប់ធ្នាប់ របៀបរៀបរយ សម្រាប់កិច្ចដំណើរការបោះឆ្នោតទាំងមូល គណៈបញ្ជាការសន្ដិសុខអចិន្ដ្រៃយ៍ សូមធ្វើការណែនាំដូចខាងក្រោម ៖
១-បន្ដជំរុញ អនុវត្ដគោលនយោបាយភូមិ-ឃុំមានសុវត្ថិភាពឱ្យក្លាយជាយុទ្ធនាការមួយព្រមៗគ្នា គ្រប់ភូមិឃុំ-សង្កាត់ ទូទាំងប្រទេស ក្នុងគោលបំណងកៀរគរគ្រប់សមាសភាពទាំងអស់ក្នុងសង្គម ចូលរួមឱ្យបានសកម្មក្នុងការរៀបចំសណ្ដាប់ធ្នាប់សាធារណៈ ការបង្ការទប់ស្កាត់បទល្មើសគ្រប់ប្រភេទ ក៏ដូចជាបង្ការទប់ស្កាត់រាល់សកម្មភាពនានាដែលធ្វើឱ្យប៉ះពាល់ ឬបំផ្លិចបំផ្លាញដល់កិច្ចដំណើរការរៀបចំការបោះឆ្នោតដែលបាន និងកំពុងប្រព្រឹត្ដទៅនាពេលនេះ ។
២-អាជ្ញាធរមានសមត្ថកិច្ចគ្រប់លំដាប់ថ្នាក់ ទោះក្នុងករណីណាក៏ដោយ ត្រូវខិតខំស្រាវជ្រាវស៊ើបអង្កេតឱ្យបានហ្មត់ចត់លើបទល្មើសនានាដែលកើតឡើង ជាពិសេសបទល្មើសព្រហ្មទណ្ឌដែលមានការចោទប្រកាន់ពាក់ព័ន្ធផ្នែកនយោបាយ និងឧបទ្ទវហេតុនានាដែលពាក់ព័ន្ធដល់បរិយាកាសនយោបាយដូចជា ការគំរាមកំហែង បំភិតបំភ័យ ឬការទម្លាក់ស្លាក ផ្ដួលរំលំស្លាក ការលាបពណ៌ផ្សេងៗលើស្លាកគណបក្សនានា ដែលមានចរិតជាការរៀបចំទុកជាមុនដូចជាករណីនៅខេត្ដព្រៃវែង ខេត្ដស្វាយរៀង កាលពីថ្ងៃទី១៨-១៩ មិថុនា ឆ្នាំ២០១៣ ។ល។ ដើម្បីស្វែងរកចាប់ខ្លួនជនប្រព្រឹត្ដបទល្មើសយកទៅផ្ដន្ទាទោសតាមច្បាប់ជាធរមាន ។
៣-ត្រូវចាត់វិធានការសកម្មក្នុងការប្រមែប្រមូលព័ត៌មានពីគ្រប់ប្រភព ដើម្បីពិចារណាវិភាគវាយតម្លៃ សន្និដ្ឋានរាល់ហេតុការណ៍ដែលកើតឡើង ពិសេសយកចិត្ដទុកដាក់រាល់ទិន្នន័យទាំងអស់ដែលពាក់ព័ន្ធដល់សន្ដិសុខ សណ្ដាប់ធ្នាប់ និងសុវត្ថិភាពនៃកិច្ចដំណើរការរៀបចំការបោះឆ្នោតជ្រើសតាំងតំណាងរាស្រ្ដនីតិកាលទី៥ ។ ត្រូវយកចិត្ដទុកដាក់ក្ដាប់ជាប់រាល់បាតុភាពទំនាស់ផ្សេងៗក្នុងប្រជាពលរដ្ឋ ការប្រមូលផ្ដុំតវ៉ា ឬការធ្វើបាតុកម្ម កូដកម្មនានារបស់កម្មករ ដោយត្រូវខិតខំសម្របសម្រួល ដោះស្រាយមិនទុកឱ្យមានផលប៉ះពាល់ដល់ការបោះឆ្នោតនាថ្ងៃទី២៨ កក្កដា ឆ្នាំ២០១៣ ខាងមុខនេះ ។
៤-គណៈបញ្ជាការសន្ដិសុខអចិន្ដ្រៃយ៍គ្រប់លំដាប់ថ្នាក់ និងអាជ្ញាធរមានសមត្ថកិច្ច ត្រូវបន្ដសហការចាត់វិធានការការពារសន្ដិសុខ សុវត្ថិភាព សណ្ដាប់ធ្នាប់សាធារណៈ សម្រាប់គ្រប់តំណាងភ្នាក់ងារ និងបេក្ខជននៃគណបក្សនយោបាយឈរឈ្មោះបោះឆ្នោត អ្នកសង្កេតការណ៍ជាតិ អន្ដរជាតិ និងប្រជាពលរដ្ឋ ដែលត្រូវចូលរួមក្នុងដំណើរការនៃការបោះឆ្នោតជ្រើសតាំងតំណាងរាស្រ្ដនីតិកាលទី៥ ឆ្នាំ២០១៣ ឱ្យបានមធ្យ័តបំផុុតតាមដែនសមត្ថកិច្ចរបស់ខ្លួន ។ ៥-ត្រូវបន្ដយកចិត្ដទុកដាក់សហការរៀបចំ និងចាត់វិធានការការពារសន្ដិសុខ សុវត្ថិភាពនៅគ្រប់គោលដៅសំខាន់ៗ ជាអាទិ៍ ទីកន្លែងជួបជុំ ទីស្នាក់ការគណបក្សនយោបាយឈរឈ្មោះបោះឆ្នោត ការិយាល័យបោះឆ្នោត និងរាប់សន្លឹកឆ្នោត ឧបករណ៍ មធ្យោបាយ សម្ភារឃោសនា ទីតាំងរក្សាទុក ឬក្បួនដឹកជញ្ជូនសម្ភារ និងឯកសារបោះឆ្នោតរបស់ គ.ជ.ប ឬគណៈកម្មការរៀបចំការបោះឆ្នោតគ្រប់លំដាប់ថ្នាក់ ។
៦-ត្រូវយកចិត្ដទុកដាក់ផ្ដល់សេវាសន្ដិសុខ ដោយស្មើភាពគ្នាជូនគ្រប់គណបក្សនយោបាយឈរឈ្មោះបោះឆ្នោតទាំងអស់ ជាពិសេសក្នុងអំឡុងពេលយុទ្ធនាការឃោសនាបោះឆ្នោត ត្រូវផ្ដោតសំខាន់លើការបែងចែកកម្លាំងការពារគ្រប់ក្បួនឃោសនាបោះឆ្នោត ការពារនៅជុំវិញបរិវេណនៃអង្គពិធីឃោសនា ដោយធានារក្សាឱ្យបានសណ្ដាប់ធ្នាប់សាធារណៈ សណ្ដាប់ធ្នាប់ចរាចរណ៍ ព្រមទាំងបរិយាកាសនយោបាយល្អគ្មានការបំភិតបំភ័យ ការគំរាមកំហែង និងអំពើហិង្សា ចលាចល ឬការអុកឡុករំខានផ្សេងៗ ។
៧-អាជ្ញាធរមានសមត្ថកិច្ច ត្រូវសហការឱ្យបានល្អជាមួយគណៈកម្មការរៀបចំការបោះឆ្នោតគ្រប់លំដាប់ថ្នាក់ ដើម្បីធានាសន្ដិសុខ សណ្ដាប់ធ្នាប់ នៅថ្ងៃទី២៧ មិថុនា ឆ្នាំ២០១៣ ដែលជាថ្ងៃស្ងប់ស្ងៀមឱ្យបានត្រឹមត្រូវតាមច្បាប់បោះឆ្នោត និងបទបញ្ជារបស់ គ.ជ.ប ។ ភ្នាក់ងារសន្ដិសុខបោះឆ្នោត សហការជាមួយប្រធានការិយាល័យបោះឆ្នោត និងរាប់សន្លឹកឆ្នោត ធានាឱ្យបានដាច់ខាតសន្ដិសុខការិយាល័យបោះឆ្នោត និងរាប់សន្លឹកឆ្នោត និងត្រូវអនុវត្ដឱ្យបានត្រឹមត្រូវតាមនីតិវិធី និងបទបញ្ជាដែលបានកំណត់ ។
៨-គណៈបញ្ជាការសន្ដិសុខអចិន្ដ្រៃយ៍តាមលំដាប់ថ្នាក់ ត្រូវរៀបចំឱ្យមានក្រុមប្រចាំការអចិន្ដ្រៃយ៍នៅតាមថ្នាក់របស់ខ្លួន ដើម្បីទទួលព័ត៌មាន និងដោះស្រាយព័ត៌មានពាក់ព័ន្ធដល់ការបោះឆ្នោតក្នុងដែនសមត្ថកិច្ចរបស់ខ្លួន ។ ទន្ទឹមនោះ ត្រូវរៀបចំឱ្យមានក្រុមប្រតិកម្មរហ័ស ដើម្បីឆ្លើយតបចំពោះបាតុភាព ឬឧបទ្ទវហេតុផ្សេងៗ ចៀសវាងការឆ្លៀតកេងចំណេញខាងផ្នែកនយោបាយ ឬក្នុងគោលបំណងបំផ្លាញដល់ការបោះឆ្នោត ។
៩-គណៈបញ្ជាការសន្ដិសុខអចិន្ដ្រៃយ៍ថ្នាក់រាជធានី ខេត្ដ ត្រូវធានារបបរាយការណ៍មួយថ្ងៃ២ដង (ព្រឹកម៉ោង៨ និងរសៀលម៉ោង៤) ចាប់ពីពេលនេះរហូតដល់ការបោះឆ្នោតបានចប់សព្វគ្រប់ជាស្ថាពរ លើកលែងករណីបន្ទាន់ជះឥទ្ធិពលដល់ផ្នែកនយោបាយត្រូវរាយការណ៍ជាវិសាមញ្ញជូនមកលេខាធិការដ្ឋាននៃ គ.ជ.ប ដើម្បីមានវិធានការដោះស្រាយទាន់ពេលវេលា ៕
ចែករំលែកព័តមាននេះ