ខេត្តក្រចេះ ៖ ឈើអារប្រភេទលេខ២ជាឈើគ្រឿងចំនួនរាប់រយកំណាត់ និងឈើប្រណីតប្រភេទធ្នង់ជាច្រើនកំណាត់ដែលសណ្ដូនព្យាងតាមទូកតូចធំចំនួន៦គ្រឿងតាមផ្លូវទឹកក្រោមរូបភាពមានច្បាប់អនុញ្ញាតឱ្យធ្វើផ្ទះ ត្រូវបានសមត្ថកិច្ចចម្រុះចុះបង្ក្រាប និងចាប់បាននៅកណ្ដាលទន្លេមេគង្គ កាលពីយប់ថ្ងៃទី២៤ មិថុនា ប៉ុន្តែនៅកន្លែងផ្សេងៗគ្នា ។ ទូកតូចធំទាំង៦គ្រឿងនេះត្រូវគេដឹងថា បានលួចផ្ទុកនិងព្យាងសណ្ដូនឈើអារប្រភេទលេខ២ចំនួនរាប់រយកំណាត់ និងលួចបង្កប់ឈើប្រណីតប្រភេទធ្នង់ជាច្រើនកំណាត់ចេញមកពីស្រុកសំបូរ ជាប់ព្រំប្រទល់ខេត្តស្ទឹងត្រែង និងបន្តនាំឆ្ពោះទៅកាន់ខេត្តកំពង់ចាម ។
តាមប្រភពព័ត៌មានបានឱ្យដឹងថា ការដឹកជញ្ជូនឈើទាំងនេះគឺគេឃើញមានស្ត្រីម្នាក់ឈ្មោះឃឿន មានទីលំនៅក្នុងខេត្តកំពង់ចាម ជាអ្នកចេញមុខរត់ការទូកសណ្ដូនឈើទាំងនេះដោយអះអាងថា មានច្បាប់អនុញ្ញាតសម្រាប់ឱ្យដឹកជញ្ជូនយកទៅធ្វើផ្ទះ ។ ទោះបីជាយ៉ាងណា បើតាមប្រភពព័ត៌មានមួយចំនួនឱ្យដឹងថា ការដឹកជញ្ជូនឈើអារប្រភេទលេខ២ចំនួនរាប់សិបម៉ែត្រគូប របស់ស្ត្រីម្នាក់នេះបានធ្វើឡើងរាប់សិបលើកមកហើយដោយស្ត្រីរូបនេះអះអាងថា ការដឹកជញ្ជូនរបស់គាត់មានច្បាប់អនុញ្ញាតត្រឹមត្រូវពីអាជ្ញាធរខេត្តកំពង់ចាម និងខេត្តក្រចេះដើម្បីយកមកធ្វើផ្ទះ តែច្បាប់អនុញ្ញាតនោះត្រូវបានគេដឹងថា មានការអនុញ្ញាតឱ្យដឹកឈើអារតែជាង១០ម៉ែត្រគូបប៉ុណ្ណោះ ។
ជាមួយនឹងសកម្មភាពចុះឃាត់ចាប់បានទូកសណ្ដូនឈើទាំង៦គ្រឿងនេះ សមត្ថកិច្ចចម្រុះពុំបានចាប់ឃាត់ខ្លួនជនណាម្នាក់ដែលជាប់ពាក់ព័ន្ធនឹងជំនួញឈើខុសច្បាប់ទាំងនេះទេ ដោយឃើញមានតែទូកតូចធំដែលផ្ទុក និងព្យាងសណ្ដូនឈើអារលេខ២ និងបង្កប់ឈើប្រណីតចំនួន៦គ្រឿងត្រូវឃាត់ចាប់បាននៅកន្លែងផ្សេងៗគ្នាក្នុងយប់តែមួយ ។ ប្រភពព័ត៌មានបញ្ជាក់ទៀតថា យ៉ាងហោចណាស់មានទូកធំមួយគ្រឿងទៀតដែលមានផ្ទុកព្យាង និងសណ្ដូនឈើអារជាច្រើនម៉ែត្រគូប បានរត់រួចពីការតាមប្រមាញ់របស់សមត្ថកិច្ចនាយប់នោះផងដែរ ។
មន្ត្រីខណ្ឌរដ្ឋបាលព្រៃឈើក្រចេះ លោកនួន អុល បានឱ្យដឹងកាលពីព្រឹកថ្ងៃទី២៥ មិថុនា ថា ការចុះចាប់ទូកដឹកសណ្ដូនទាំងនេះគឺធ្វើឡើងបន្ទាប់ពីមានសេចក្ដីរាយការណ៍ដោយមានការសហការគ្នាពីកម្លាំងសមត្ថកិច្ចចម្រុះក្នុងខេត្ត ។ មន្ត្រីជំនាញមិនទាន់បានធ្វើការប៉ាន់ប្រមាណពីចំនួនឈើដែលបានចងព្យាង និងសណ្ដូននៅជាប់ទូកទាំង៦គ្រឿងនេះថា មានចំនួនប៉ុន្មាននៅឡើយទេ តែបើតាមការសន្និដ្ឋាន គឺឈើអារប្រភេទលេខ២ដែលផ្ទុក និងព្យាងសណ្ដូនជាប់នឹងទូកតូចធំទាំង៦គ្រឿងនេះមានចំនួនរាប់រយកំណាត់ប្រហាក់ប្រហែលជិត១រយម៉ែត្រគូប ។
លោក នួន អុល បញ្ជាក់ថា ក្រោយពីមានការចាប់ឃាត់ទូកទាំង៦គ្រឿងនេះហើយកម្លាំងជំនាញក៏នាំយកមកកាន់សង្កាត់រដ្ឋបាលព្រៃឈើបុសលាវ ស្រុកចិត្របុរី ដើម្បីស្ទូចយកទៅរក្សាទុកបន្តនៅស្ថានីយបណ្ដុះកូនឈើខ្សារ សម្រាប់ចាត់វិធានការតាមនីតិវិធីរបស់រដ្ឋបាលព្រៃឈើ ៕
ចែករំលែកព័តមាននេះ