ខេត្តស្វាយរៀង ៖ រឿងក្តីដ៏ចម្រូងចម្រាស់ដែលមានការចោទប្រកាន់លើលោក ឈូក បណ្ឌិត អតីតអភិបាលក្រុងបាវិតថា បានបាញ់ទៅលើកម្មការិនី៣នាក់ឱ្យរងរបួសធ្ងន់ក្នុងអំឡុងពេលមានបាតុកម្មហិង្សាមួយ កាលពីខែកុម្ភៈដើមឆ្នាំទៅត្រូវបានគេមើលឃើញថា ទំព័រខ្មៅមួយហាក់បានបញ្ចប់ ។ លោកចៅក្រមលាង សួរ នៃសាលាដំបូងខេត្តបានប្រកាសសាលក្រមជាសាធារណៈផ្តន្ទាទោសលោក ឈូក បណ្ឌិត ឱ្យជាប់ពន្ធនាគារចំនួន១៨ខែ ពីបទបង្ករបួសស្នាមដោយអចេតនា ប្រព្រឹត្តកាលពីថ្ងៃទី២០ កុម្ភៈ ២០១២ នៅរោងចក្រកាត់ស្បែកជើងកៅវ៉េ ស្ថិតក្នុងតំបន់សេដ្ឋកិច្ចពិសេសមេនហាតធេន ភូមិតាពៅ សង្កាត់បាវិត ក្រុងបាវិត ។
សាលក្រមផ្តន្ទាទោសនេះ អនុវត្តតាមមាត្រា២៣៦នៃច្បាប់ព្រហ្មទណ្ឌដោយដាក់ទោសលោក ឈូក បណ្ឌិត ក្នុងពន្ធនាគារ១ឆ្នាំ៦ខែ និងចេញដីកាតាមចាប់ខ្លួនមកដាក់ពន្ធនាគារ ព្រមទាំងបង្គាប់ឱ្យលោក ឈូក បណ្ឌិត សងសំណងរដ្ឋប្បវេណីជូនអ្នកស្រី ប៊ុន ចិន្តា ២០លានរៀល កញ្ញា នុត សាខន ១០លានរៀល និងកញ្ញា កែវ នា ចំនួន៨លានរៀល ។ ចំណែកលោក សរ ចន្ថា អធិការរងនគរបាលក្រុងបាវិតដែលជាប់ចោទដែរនោះត្រូវផ្តន្ទាទោសឱ្យជាប់ពន្ធនាគារចំនួន៦ខែ ពីបទប្រើប្រាស់អាវុធខុសច្បាប់ និងពិន័យជាប្រាក់ចំនួន១លានរៀលបង់ចូលថវិការដ្ឋ ។
ការប្រកាសសាលក្រមនេះ ធ្វើឡើងនៅសាលសវនាការសាលាដំបូងខេត្ត កាលពីថ្ងៃទី២៥ មិថុនា វេលាម៉ោង៩ព្រឹក ។ សូមបញ្ជាក់ថាពេលប្រកាសសាលក្រមនេះគឺពុំមានវត្តមានលោក ឈូក បណ្ឌិត និងមេធាវីរបស់លោកណាម្នាក់បង្ហាញខ្លួនឡើយ ។ ចំណែកលោក សរ ចន្ថា និងមេធាវីក៏ពុំមានវត្តមានដែរ ដោយលោក សរ ចន្ថា ជាប់រវល់បេសកកម្មទៅរៀន គឺមានវត្តមានតែក្រុមមេធាវី និងជនរងគ្រោះប៉ុណ្ណោះ និងវត្តមានអង្គការសង្គមស៊ីវិល សហជីពជាតិ និងអន្តរជាតិ និងអ្នកសារព័ត៌មានដែលជាអ្នកតាមដាន ។
អ្នកស្រី ប៊ុន ចិន្តា កញ្ញា កែវ នា និងកញ្ញា នុត សាខន ដែលជាកម្មការិនីរងគ្រោះ និយាយថា ពួកនាងទទួលយកបានចំពោះការកាត់ក្តីរបស់លោកចៅក្រម លាង សួរ ដែលបានផ្តល់យុត្តិធម៌ឱ្យពួកនាង និងឱ្យជនប្រព្រឹត្តលោក ឈូក បណ្ឌិត ជាប់ពន្ធនាគារ១ឆ្នាំ៦ខែ ។ ប៉ុន្តែពួកនាងពុំដឹងថា តើដីកាតាមចាប់ខ្លួនលោក ឈូក បណ្ឌិត មកផ្តន្ទាទោសដាក់ពន្ធនាគារបានឬក៏យា៉ងណានោះទេ ពីព្រោះលោក ឈូក បណ្ឌិត មិនបានចូលខ្លួនឡើយ តាំងពីថ្ងៃបើកសវនាការរយៈពេល៣ថ្ងៃគឺថ្ងៃ ១២-១៣-១៤ មិថុនា ។ ចំពោះសំណងរដ្ឋប្បវេណី ពួកនាងមិនយល់ព្រមទេ ដោយសារទំហំនៃការព្យាបាលរបួសអស់ច្រើន ដូច្នេះពួកនាងនៅពិចារណាសិន ថាតើគួរប្តឹងទារសំណងរដ្ឋប្បវេណីបន្ថែមឬយា៉ងណា ?
លោក មឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា ការកាត់ក្តីរបស់លោកចៅក្រម គឺពិតជាបានពិចារណាយា៉ងល្អិតល្អន់តាមវិជ្ជាជីវៈ ដោយបានផ្តន្ទាទោសលោក ឈូក បណ្ឌិត ឱ្យជាប់ទោស១ឆ្នាំ៦ខែ ហើយបានប្រកាសចេញដីកាតាមចាប់ខ្លួនទៀត ។ ចំណែកលោក សរ ចន្ថា ការផ្តន្ទាទោសមិនទាក់ទងនឹងរឿងក្តីបាញ់កម្មការិនីនោះទេ តែជាទោសប្រើអាវុធខុសច្បាប់ប៉ុណ្ណោះ ។ មិនអាចរកការបំភ្លឺបានទេពីលោក ឈូក បណ្ឌិត និងលោក សរ ចន្ថា ជុំវិញការប្រកាសសាលក្រមនេះ ព្រោះតុលាការទុកឱ្យរយៈពេល៣០ថ្ងៃ សម្រាប់ការសម្រេចចិត្តប្តឹងទាស់ទៅសាលាឧទ្ធរណ៍ ៕
ចែករំលែកព័តមាននេះ