ខេត្តពោធិ៍សាត់ ៖ អ្នកដំណើរដោយរថយន្ត និងម៉ូតូជាច្រើននាក់បានស្ទះចរាចរណ៍ពេញមួយថ្ងៃទី២៤ មិថុនា និងព្រឹកថ្ងៃទី២៥ មិថុនា នៅលើកំពូលភ្នំកម្ពស់១.៥០០ម៉ែត្រ ដែលអ្នកស្រុកហៅថា ភ្នំស្វារអិល ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ដោយសារបាក់ដីជញ្ជាំងភ្នំហូរធ្លាក់មកលុបផ្លូវ និងស្ពានមិនអាចធ្វើចរាចរណ៍ទៅមកបាន គឺទៅមុខក៏មិនរួច មកក្រោយក៏មិនរួច
ខេត្តពោធិ៍សាត់ ៖ អ្នកដំណើរដោយរថយន្ត និងម៉ូតូជាច្រើននាក់បានស្ទះចរាចរណ៍ពេញមួយថ្ងៃទី២៤ មិថុនា និងព្រឹកថ្ងៃទី២៥ មិថុនា នៅលើកំពូលភ្នំកម្ពស់១.៥០០ម៉ែត្រ ដែលអ្នកស្រុកហៅថា ភ្នំស្វារអិល ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ដោយសារបាក់ដីជញ្ជាំងភ្នំហូរធ្លាក់មកលុបផ្លូវ និងស្ពានមិនអាចធ្វើចរាចរណ៍ទៅមកបាន គឺទៅមុខក៏មិនរួច មកក្រោយក៏មិនរួច ព្រោះបាក់ដីលុបលើផ្លូវពីមុខ និងពីក្រោយ ។
តាមការផ្តល់ព័ត៌មានពីលោក ឆេ ឈីវ អភិបាលស្រុកវាលវែងបានប្រាប់កោះសន្តិភាពថា ផ្លូវពីទីរួមស្រុកវាលវែងទៅកាន់ឃុំថ្មដា ជាប់ព្រំប្រទល់កម្ពុជា-ថៃជាផ្លូវចំណោតឡើងភ្នំ ចុះភ្នំបត់បែនតាមចង្កេះភ្នំ ងាយគ្រោះថ្នាក់បំផុតសម្រាប់អ្នកបើកបរមិនស្គាល់ភូមិសាស្ត្រ និងអ្នកបើកបរខ្វះការប្រុងប្រយ័ត្ន ។ លោកអភិបាលស្រុកឱ្យដឹងថា អំឡុងពេលមានភ្លៀងធ្លាក់ជាប់ៗគ្នាទាំងថ្ងៃទាំងយប់ កាលពីសប្តាហ៍មុននេះ បានធ្វើឱ្យទឹកហូរច្រោះដីពីលើកំពូលភ្នំ បាក់ធ្លាក់មកពាំងផ្លូវជិត មានកន្លែងខ្លះមានកម្ពស់ដីបាក់ជិតមួយម៉ែត្រ ។ ការបាក់ដីពាំងផ្លូវនេះ កើតឡើងចំនួនពីរលើក ជាប់ៗគ្នា គឺលើកទី១បាក់ធ្លាក់ថ្ងៃទី២៣ មិថុនា ប៉ុន្តែអាជ្ញាធរស្រុកបានកាយចេញធ្វើចរាចរណ៍បានម្តងហើយ ។
លុះដល់វេលាយប់បានបាក់ធ្លាក់ម្តងទៀត មានទ្រង់ទ្រាយធំជាងមុន ធ្វើឱ្យស្ទះចរាចរណ៍ពេញមួយថ្ងៃទី២៤ មិថុនា ហើយនៅថ្ងៃទី២៥ មិថុនា មន្ទីរសាធារណការ និងដឹកជញ្ជូនខេត្ត និងក្រុមហ៊ុន MDS របស់ឧកញ៉ា ទ្រី ភាព បានសហការគ្នាយកគ្រឿងចក្រទៅកាយដីចេញ ដើម្បីសម្រួលដល់ការធ្វើដំណើរបាននៅថ្ងៃទី២៥ មិថុនា ដដែល ។
លោក ឆេ ឈីវ បានបញ្ជាក់ប្រាប់កោះសន្តិភាពថា រដូវវស្សាពេលមានភ្លៀងធ្លាក់ខ្លាំងរយៈពេលយូរម្តងៗ កន្លែងនេះតែងមានការបាក់ដីស្ទះចរាចរណ៍ជារៀងរាល់ឆ្នាំ ប៉ុន្តែមិនដែលមានគ្រោះថ្នាក់ដល់អ្នកធ្វើដំណើរទេ ។ បន្ទាប់ពីមន្ទីរសាធារណការ និងដឹកជញ្ជូន និងក្រុមហ៊ុន MDS យកគ្រឿងចក្រទៅធ្វើសកម្មភាពកាយដីចេញពីលើថ្នល់រួចមក នៅវេលាម៉ោងប្រមាណ១១ព្រឹក ថ្ងៃទី២៥ មិថុនា អាចធ្វើចរាចរណ៍ធម្មតាបានវិញហើយ ៕
ចែករំលែកព័តមាននេះ