រាជធានីភ្នំពេញ ៖ ឈាន ហុង មកពីក្លិបអាជ្ញាធរជាតិអាវុធគីមី ត្រូវបានគេផ្គូផ្គងឱ្យជួបប្រកួតជាមួយ រឿង សោភ័ណ្ឌ មកពីក្លិបមកុដរាជសីហ៍នៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ ថ្ងៃសៅរ៍ ទី២៩ មិថុនាសប្តាហ៍នេះ ខណៈ ថន វាសនា មកពីក្លិបនាគមានជ័យ ជួបជាមួយ យិន បូរិន មកពីក្លិបកងពលធំអន្តរាគមន៍លេខ៣ ព្រះវិហារ ។
រាជធានីភ្នំពេញ ៖ ឈាន ហុង មកពីក្លិបអាជ្ញាធរជាតិអាវុធគីមី ត្រូវបានគេផ្គូផ្គងឱ្យជួបប្រកួតជាមួយ រឿង សោភ័ណ្ឌ មកពីក្លិបមកុដរាជសីហ៍នៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ ថ្ងៃសៅរ៍ ទី២៩ មិថុនាសប្តាហ៍នេះ ខណៈ ថន វាសនា មកពីក្លិបនាគមានជ័យ ជួបជាមួយ យិន បូរិន មកពីក្លិបកងពលធំអន្តរាគមន៍លេខ៣ ព្រះវិហារ ។
កំពូលអ្នកលេងស្នៀតកែង ឈាន ហុង មិនធ្លាប់ជួប រឿង សោភ័ណ្ឌ ទេពីមុនមក ទើបគេមិនហ៊ានទស្សន៍ទាយលទ្ធផលទុកមុន ដោយសារពួកគេទាំង២មានល្បិចប្រយុទ្ធនៅលើសង្វៀនក្រាស់ឃ្មឹកពេញខ្លួនដូចគ្នា ។ ឈាន ហុងបើនិយាយពីស្នៀតកែង និងជង្គង់របស់គេគឺពិបាករកអ្នកប្រដូចខ្លាំងណាស់ ដោយរាល់ពេលដែលគេវាយចេញម្តងៗមិនដែលឥតប្រយោជន៍ឡើយ ម្យ៉ាងវិញទៀត ស្នៀតជង្គង់របស់គេអាចធ្វើការវាយចេញជាប្រយោលក៏បាន ចូលកៀកក៏បាន និងពូកែអត់ធ្មត់បំផុត ។
រីឯ រឿង សោភ័ណ្ឌ ថ្វីបើគេទើបតែឈានជើងចូលប្រឡូកនៅលើសង្វៀនមិនបានយូរប៉ុន្មានមែន តែជើងចាស់ល្មមៗមិនងាយបង្ក្រាបគេបានដោយស្រួលឡើយ ។
រឿង សោភ័ណ្ឌ មានចិត្តសឿងខ្លាំងណាស់ មិនងាយចាញ់សម្លុតគេផ្តាសឡើយ ឯស្នៀតកណ្តាប់ដៃ និងស្នៀតជើងរបស់គេក៏ល្អអាចធ្វើការវាយចេញបានរហ័ស ប៉ុន្តែទម្លាប់របស់គេចូលចិត្តឱ្យគូប្រកួតវាយឈឺសាច់ជាមុនសិនទើបតបតជាក្រោយ ធ្វើឱ្យអ្នកគាំទ្រគេមួយចំនួនមិនសូវពេញចិត្តឡើយ ។ ថន វាសនា និង យិន បូរិន ប្រវត្តិប្រកួតរបស់ពួកគេមិនសូវជាមានច្រើនប៉ុន្មានឡើយ តែល្បិចប្រយុទ្ធមិនសមជាអ្នកប្រដាល់ជើងថ្មីនោះទេ ។ ថន វាសនា ភាគច្រើនគេវាយអាងកម្លាំងតែម្តង ខណៈស្នៀតកែងនិងជង្គង់មិនសូវជាពូកែឡើយ បើនិយាយពីស្នៀតកណ្តាប់ដៃ និងស្នៀតជើងវិញល្អគ្រាន់បើ គ្រាន់តែរាល់ការវាយចេញមានសភាពយឺតយ៉ាវបន្តិចប៉ុណ្ណោះ ។
ចំណែក យិន បូរិន វិញពូកែស្នៀតជើងជាងស្នៀតដៃ ឯកម្លាំងអាចតស៊ូប្រកួតបាន៥ទឹកពេញមិនលំបាកឡើយ ។ និយាយរួមសមត្ថភាពគូនេះប្រហាក់ប្រហែលគ្នា ដូច្នេះចង់ដឹងលទ្ធផលចាញ់-ឈ្នះ មានតែរង់ចាំមើលទាំងអស់គ្នា ។ ក្រៅពីគូចាប់អារម្មណ៍២គូនេះទៅ នៅមានការប្រកួតរវាងកីឡាករ អាន សុផល មកពីក្លិបមិត្តប៉ូលិស និងកីឡាករ ជ័យ ប៊ុនសុង មកពីក្លិបខេមរិន្ទមានឫទ្ធិ ។ កីឡាករ កឿម សុវណ្ណឌឿត មកពីក្លិបមោងឫស្សី ខេត្តបាត់ដំបង ជួបជាមួយកីឡាករ ហ៊ុន ឈុនហេង មកពីក្លិបសម្រែករាជសីហ៍បង្ក្រាបគ្រឿងញៀន និងកីឡាករ ឡុង ប៊ុនហេង មកពីក្លិបសាលវ័ន្តកីឡា ជួបជាមួយកីឡាករ ពេជ្រ ម្ទេសខ្មាំង មកពីក្លិបអារុណរះកីឡា ៕
ចែករំលែកព័តមាននេះ