រាជធានីភ្នំពេញ ៖ ព្រឹកថ្ងៃទី២៥ មិថុនា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) មានរៀបចំពិធីប្រគល់និងទទួលទូកកានូ ច្រវា ពីសហព័ន្ធកីឡាទូកកានូ អាស៊ី ដោយមានការអញ្ជើញចូលរួមពីសំណាក់លោកប៊ុន សុខ រដ្ឋលេខាធិការក្រសួងអប់រំយុវជន និងកីឡា លោក Shoken Narita សមាជិកប្រតិបត្តិសហព័ន្ធទូកកានូអន្តរជាតិ និងជាប្រធានសហព័ន្ធទូកកានូអាស៊ី ព្រមទាំងគណៈប្រតិភូកីឡាជាតិ និងអន្តរជាតិជាច្រើននាក់ ។
លោកប៊ុន សុខ រដ្ឋលេខាធិការក្រសួងអប់រំ យុវជន និងកីឡាបានមានប្រសាសន៍សម្តែងនូវការពេញចិត្តយ៉ាងខ្លាំងចំពោះការផ្តល់ជំនួយឧបត្ថម្ភពីសំណាក់សហព័ន្ធទូកកានូអាស៊ីជូនចំពោះសហព័ន្ធទូកកានូកម្ពុជា និងបានវាយតម្លៃខ្ពស់ចំពោះវិភាគទានដ៏ថ្លៃថ្លារបស់សហព័ន្ធទូកកានូអាស៊ីដើម្បីអភិវឌ្ឍន៍វិស័យកីឡាទូកកានូនៅព្រះរាជាណាចក្រកម្ពុជា ។ លោកមានប្រសាសន៍បន្តដោយចាត់ទុកថា រង្វាន់នេះគឺជារង្វាន់ជូនសម្រាប់សហស្សវត្សថ្មី ហើយទូកទាំងនេះជាមធ្យោបាយដ៏មានសារៈប្រយោជន៍សម្រាប់ផ្តល់លទ្ធភាពដល់សហព័ន្ធកីឡាទូកកានូកម្ពុជា ឱ្យខិតខំប្រឹងប្រែងធ្វើសកម្មភាពឱ្យកាន់តែមានប្រសិទ្ធភាពថែមទៀត ។
សូមបញ្ជាក់ថា ទន្ទឹមនឹងការផ្តល់ជូននូវទូកកានូ ច្រវា មកដល់ប្រទេសកម្ពុជានេះ គឺស្របពេលដែលកម្ពុជាត្រៀមរៀបចំព្រឹត្តិការណ៍ប្រណាំងទូកកានូ និងកាយ៉ាក់ ជ្រើសរើសជើងឯកប្រចាំឆ្នាំ២០១៣ នៅតាមបណ្តោយដងទន្លេក្នុងក្រុងតាខ្មៅ ខេត្តកណ្តាលនាចុងឆ្នាំ២០១៣នេះ ។ នេះគឺជាកិច្ចសហប្រតិបត្តិការមួយដ៏ល្អរវាងកម្ពុជា និងប្រទេសជប៉ុន ដែលតែងតែមានទំនាក់ទំនងល្អស្ទើរគ្រប់វិស័យជាក់ស្តែងដូចជាវិស័យកីឡាជាដើម ៕
ចែករំលែកព័តមាននេះ