បុរសម្នាក់ត្រូវបានឃាត់ខ្លួន ក្រោយពីដេញកាប់ស្ត្រីម្នាក់

ថ្ងៃទី ០៦ ខែ ធ្នូ ឆ្នាំ ២០១៨

ម៉ោង ១៨:៥៦

ខេត្តបាត់ដំបង ៖ មន្ត្រីកងរាជអាវុធហត្ថបានឲ្យដឹងថា បុរសម្នាក់ត្រូវបានឃាត់ខ្លួន ក្រោយពីប្រើប្រាស់កាំបិតខ្វែវដេញកាប់ស្ត្រីម្នាក់ កាលពីវេលាម៉ោង៣រសៀល ថ្ងៃទី០៦ ធ្នូ នៅចំណុចភូមិខ្សាច់ពោយ សង្កាត់វត្តគរ ក្រុងបាត់ដំបង តែមិនបណ្ដាលឲ្យរងរបួសទេ។ មន្ត្រីដដែលបានប្រាប់ថា ជនសង្ស័យឈ្មោះ សួន សំណាង ហៅផ្លូញ ភេទប្រុស អាយុ៣៨ឆ្នាំ មុខរបរ កម្មករ រស់នៅចំណុចកើតហេតុខាងលើ រីឯជនរងគ្រោះឈ្មោះ ទេស លីណា ហៅមុំ ភេទស្រី អាយុ៣០ ឆ្នាំ រស់នៅភូមិ,សង្កាត់ជាមួយគ្នា។

ជនសង្ស័យបានប្រើប្រាស់កាំបិតខ្វែវដែលកាប់ស្ត្រីរងគ្រោះ បង្កឲ្យមានការភ្ញាក់ផ្អើលពេញភូមិ តែមិនបណ្ដាលឲ្យរបួសទេ ហើយបុរសរូបនេះក៏ត្រូវកម្លាំងកងរាជ អាវុធហត្ថ តាមឃាត់ខ្លួនបានភ្លាមៗដែរជាមួយនឹងកាំបិតខ្វែវមួយដើម។

]គេមិនទាន់ដឹងអំពីមូលហេតុ ដែលនាំឲ្យភាគីទាំង២ដែលនៅផ្ទះក្បែរខាងគ្នានេះផ្ទុះជម្លោះរហូតឈានដល់ទាញកាំបិតខ្វែវដេញកាប់គ្នាយ៉ាងសាហាវព្រៃផ្សៃបែបនេះទេ ស្រាប់តែបង្កឲ្យមានការភ្ញាក់ផ្អើលតែម្ដង។ មន្ត្រីកងរាជអាវុធហត្ថ បានឲ្យដឹងដែរថា ជនសង្ស័យរូបនេះអាចត្រូវចោទប្រកាន់ពីបទ <<ហឹង្សាដោយចេតនា មានស្ថានទម្ងន់>>។ ក្រោយពែលឃាត់ខ្លួនមន្ត្រីជំនាញកំពុងសួរនាំ ដើម្បីចាត់ការតាមនីតិវិធីហើយ៕