រាជធានីភ្នំពេញ ៖ លោកស្រីចាំង ស៊ីណាត ចៅក្រមសាលាដំបូងរាជធានីភ្នំពេញ កាលពីថ្ងៃទី២៤ មិថុនា បានលើកសំណុំរឿងព្រហ្មទណ្ឌទាក់ទិននឹងការវាយដំទៅលើអ្នកកាសែតដែលជាអំពើហិង្សាដោយចេតនា ហើយស្ថានទម្ងន់ទោសនេះ ដែលមានជនជាប់ចោទឈ្មោះដេវីដ ឆាណាយវា ភេទប្រុស និងឈ្មោះប្រាក់ អូ ហ្វី ភេទប្រុស អាយុ២២ឆ្នាំ ដែលជាក្មួយត្រូវបាននាំមកកាន់សវនាការដើម្បីសួរដេញដោលនៅចំពោះមុខចៅក្រម និងព្រះរាជអាជ្ញារងលោកជេត ខេមរា ។ ចំណែកឈ្មោះយ៉ាន ស៊ីណា អតីតអនុរដ្ឋលេខាធិការក្រសួងយុត្តិធម៌មិនមានវត្តមាននៅក្នុងសវនាការនោះទេ ពីព្រោះជនរូបនោះបានរត់គេចខ្លួនក្រោយថ្ងៃកើតហេតុ ។
ការសួរដេញដោលនៅក្នុងសវនាការបានប្រើពេលអស់ជាង៣ម៉ោង ដោយមានការចាក់មើលវីដេអូឃ្លីបស្តីពីអំពើហិង្សាដែលជនជាប់ចោទបានវាយដំទៅលើអ្នកកាសែត ។ បន្ទាប់ពីសួរដេញដោលរួចមក ចៅក្រមសាលាដំបូងរាជធានីភ្នំពេញបានប្រកាសពន្យារពេលប្រកាសសាលក្រមលើសំណុំរឿងក្រុមដេវីដ ឆាណាយវា វាយអ្នកកាសែតនៅ ថ្ងៃទី២៧ មិថុនា ខាងមុខ ។ មុនពេលសវនាការ នៅចំពោះមុខអង្គសវនាការ ជនជាប់ចោទបានទាមទារឱ្យតុលាការអនុញ្ញាតឱ្យមានការថតវីដេអូចាក់ផ្សាយតាមស្ថានីយទូរទស្សន៍ និងសារព័ត៌មានជាតិដែលបានចុះផ្សាយ ឬបានចាក់ផ្សាយរូបភាពដែលក្រុមរបស់ខ្លួនបានធ្វើសកម្មភាព កាលពីយប់ថ្ងៃទី១៩ មីនា ឆ្នាំ២០១៣ កន្លងមក ។
ចំពោះការលើកឡើងនេះត្រូវបានចៅក្រមជំនុំជម្រះលោកស្រីចាំង ស៊ីណាត និងតំណាងអយ្យការលោកព្រះរាជអាជ្ញារង ជេត ខេមរា បានបដិសេធ ព្រោះមិនចាំបាច់ថតរូបទេ ហើយបទបញ្ជាផ្ទៃក្នុងរបស់តុលាការ មិនអនុញ្ញាតឱ្យមានការថតក្នុងសវនាការឡើយ ។ ជនជាប់ចោទឈ្មោះ អូហ្វី បាននិយាយប្រាប់តុលាការថា នៅថ្ងៃកើតហេតុ កាលពីថ្ងៃទី១៩ មីនា ឆ្នាំ២០១៣ ខ្លួនបានបើករថយន្តពណ៌ក្រហម តាមបណ្តោយផ្លូវព្រះមុនីវង្ស ។ នៅពេលបត់ឆ្វេងតាមផ្លូវលេខ២១៤ ក៏មានរថយន្តមួយទៀតបានមកបុករថយន្តរបស់គេពីក្រោយ បណ្តាលឱ្យរថយន្តគេបានទៅបុកនឹងបង្គោលភ្លើង ។
នៅពេលកើតហេតុ គេបានទូរស័ព្ទទៅឪពុកមារបស់ខ្លួនឈ្មោះដេវីដ ឆាណាយវា ឱ្យមកជួយខ្លួន ព្រោះមិនអាចបើករថយន្តបាន ។ នៅពេលនោះពិតជាមានការវាយតប់គ្នា ប៉ុន្តែជាការវាយទៅវិញទៅមកជាមួយអ្នកកាសែត ខណៈពេលក្រុមអ្នកកាសែតបានព្យាយាមថតរូបកន្លែងកើតហេតុ ហើយក្រុមខ្លួនបានហាមមិនឱ្យអ្នកកាសែតថត ។ ជនជាប់ចោទឈ្មោះដេវីដ ឆាណាយវា បានរៀបរាប់ប្រាប់តុលាការថា ខ្លួនគេបានវាសដៃដើម្បីការពារឈ្មោះប្រាក់ អូហ្វី ដែលត្រូវជាក្មួយប្រុស ហើយគ្រាហ៍ក្មួយរុញបញ្ចូលរថយន្ត ខណៈពេលមានក្រុមប្រជាជន និងអ្នកកាសែតបានព្យាយាមវាយមិនឱ្យគាត់ចេញ ពីកន្លែងកើតហេតុ ។
នៅពេលនោះឈ្មោះយ៉ាន ស៊ីណា បានចេញពីរថយន្តរបស់ខ្លួនទៅជួួយកុំឱ្យមានការវាយតប់គ្នា ។ ប៉ុន្តែឈ្មោះយ៉ាន ស៊ីណា ត្រូវបានក្រុមអ្នកកាសែតនិងអ្នកដទៃទៀតបានចាប់យ៉ាន ស៊ីណា ជាប់ ។ ដោយឃើញស្ថានភាពដូចនេះ ខ្លួនបានព្យាយាមរំដោះឈ្មោះយ៉ាន ស៊ីណា ឱ្យចេញពីក្រុមមនុស្សដែលមានគ្នាប្រមាណពី៤០នាក់ទៅ៥០នាក់ ។ មន្ត្រីប៉ូលិសខណ្ឌដូនពេញនិងប៉ូលិសប៉ុស្តិ៍បឹងរាំងបាននិយាយប្រាប់តុលាការថា ពួកគាត់បានសាកសួរដល់ប្រជាពលរដ្ឋនៅកន្លែងកើតហេតុដោយពួកគាត់បានចង្អុលបង្ហាញថា ឈ្មោះដេវីដ ឆាណាយវា បានវាយលើអ្នកកាសែតពិតមែនបន្ទាប់ពីកើតមានករណីគ្រោះថ្នាក់ចរាចរណ៍នោះ ។
មានការអះអាងថា ដើមបណ្តឹងបានសម្រេចដកពាក្យបណ្តឹងក្នុងរឿងនេះមានចំនួន៥នាក់ ។ តាមការបញ្ជាក់ជូនតុលាការ ជនរងគ្រោះទាំងនេះបានទាមទារសំណងជំងឺចិត្តរាប់ពាន់ដុល្លារអាមេរិកនិងសំណងការខូចខាតលើករណីនេះ ។ បើទោះជាយ៉ាងណា ជនរងគ្រោះទាំង៥នាក់ ដែលបានដាក់ពាក្យបណ្តឹងប្តឹងជនល្មើសទាំងបីនាក់ មិនបានចូលមកក្នុងសវនាការកាលពីថ្ងៃទី២៤ មិថុនានោះទេ ។ ក្រុមគ្រួសាររបស់ជនរងគ្រោះជាអ្នកកាសែតចំនួនពីរនាក់បានសម្រេចដកពាក្យបណ្តឹងប្រឆាំងនឹងជនជាប់ចោទទាំងបីនាក់ខាងលើ ព្រោះពួកគាត់រវល់បំពេញការងារនិងបានទទួលសំណងជាប្រាក់មួយចំនួន តែរឿងបណ្តឹងអាជ្ញាទុកសិទ្ធិជូនតុលាការជាអ្នក
សម្រេច ។ យោងតាមពាក្យបណ្តឹងរបស់ជនរងគ្រោះដែលបានដាក់ពាក្យបណ្តឹងទៅសាលាដំបូងរាជធានីភ្នំពេញបានទាមទារសំណងការខូចខាតនិងជំងឺចិត្តពី២.៥០០ដុល្លារអាមេរិកទៅ១ម៉ឺនដុល្លារអាមេរិក ៕
ចែករំលែកព័តមាននេះ