ពលរដ្ឋថៃកំពុងតែភ្ញាក់ផ្អើលករណី បុរសវ័យ៥៣ឆ្នាំម្នាក់ស្លាប់ដោយសារតែជំងឺសើស្បែកម្យ៉ាងដែលគេហៅថា ជំងឺ អង់ត្រាក់ ( anthrax ) ដែលជា ប្រភេទជំងឺដែលអាចឆ្លងមកពីសត្វពាហនៈ ហើយពលរដ្ឋនៅកម្ពុជាក៏ចែករំលែកច្រើនដែរតាមបណ្តាញសង្គមកាលពី…
ពលរដ្ឋថៃកំពុងតែភ្ញាក់ផ្អើលករណី បុរសវ័យ៥៣ឆ្នាំម្នាក់ស្លាប់ដោយសារតែជំងឺសើស្បែកម្យ៉ាងដែលគេហៅថា ជំងឺ អង់ត្រាក់ ( anthrax ) ដែលជា ប្រភេទជំងឺដែលអាចឆ្លងមកពីសត្វពាហនៈ ហើយពលរដ្ឋនៅកម្ពុជាក៏ចែករំលែកច្រើនដែរតាមបណ្តាញសង្គមកាលពី ម្សិលមិញ នៅពេលដែលព័ត៌មាននេះត្រូវបានផ្សព្វផ្សាយ។
ពាក់ព័ន្ធនឹងជំងឺម្យ៉ាងនេះ ចែករំលែកចុះ ប៉ុន្តែកុំជ្រួលច្របល់ហើយកុំភ័យខ្លាចជ្រុល ពីព្រោះជំងឺនេះ មិនមែនជាជំងឺថ្មីនោះទេ ហើយជំងឺនេះគេកំនត់អត្តសញ្ញាណតាំងពីសតវត្សរ៍ទី ១៦ មកម្ល៉េះហើយ បច្ចុប្បន្នវាក៏មានវ៉ាក់សាំងហើយផងដែរ។ ដូច្នេះកុំភ័យស្លន់ស្លោរអី ។
អង្គការសុខភាពពិភពលោកបានអះអាងថា ជំងឺនេះ គឺជាជំងឺឆ្លងដែលបង្កឡើងដោយបាក់តេរី Bacillus anthracis ឬ Bacillus cereus biovar anthracis។ របៀបនៃ ការឆ្លងគឺតាមរយៈការប៉ះពាល់ស្បែកអ្នកជំងឺ ឫសត្វពាហនៈដែលផ្ទុកបាក់តេរីឫមេរោគនោះ ។ រោគសញ្ញាជាធម្មតាលេចឡើងក្នុងរយៈពេលពី ១ទៅ៥ថ្ងៃ ឫអាចយូរជាងនេះអាស្រ័យលើសុខភាពរបស់មនុស្សម្នាក់ៗ ហើយអាចមានអាការៈមួយចំនួន ដែលរួមមានគ្រុនក្តៅ ចង្អោរ ក្អួត ឈឺពោះធ្ងន់ធ្ងរ ដំបៅមុខខ្មៅ និងពិបាកដកដង្ហើម ហើយ បើគ្មានការព្យាបាលទេ អ្នកជំងឺអាចប្រឈមមុខនឹងអត្រាស្លាប់ឡើងដល់ ៨០ %។
នៅកម្ពុជា ជំងឺនេះមិនទាន់មានសេចក្តីរាយការណ៍ណាមួយស៊ីជម្រៅនៅឡើយទេ ប៉ុន្តែសារព័ត៌មាន the Nation នៅប្រទេសថៃ បានរាយការណ៍ថា ករណីនេះវាបានកើតមានឡើងនៅក្នុងខេត្ត មូកដាហាន ដែលមានចម្ងាយពី ៧០០ទៅ ៨០០ គីឡូម៉ែត្រឯណោះពីកម្ពុជា ។ ប្រភពដដែលនេះបានអះអាងថា ក្រៅពីបុរសរងគ្រោះដែលកំពុងផ្ទុកជំងឺទឹកនោមផ្អែមដែរនោះ នៅមានមនុស្ស ២៤៧ នាក់ទៀត កំពុងតែត្រូវបានឃ្លាំមើល ។
អគ្គនាយកដ្ឋានប្រយុទ្ធនឹងជំងឺឆ្លងរបស់ថៃបានបញ្ជាក់ពីការស្លាប់របស់បុរសម្នាក់នោះ ហើយពួកគេកំពុងតែតាមឃ្លាំមើលមនុស្សខាងលើដោយសារពួកគេពាក់ព័ន្ធនឹងការទទួលទាន ហើយនឹងការចែកចាយសាច់គោក្នុងពិធីបុណ្យសាសនាមួយនៅក្នុងខេត្ត ។
លោកវេជ្ជបណ្ឌិត ថានុម៉ាត យ៉ានណាវេតសាគុណ (Phanumat Yannawetsakun) អគ្គនាយកដ្ឋានប្រយុទ្ធនឹងជំងឺឆ្លង បានប្រកាសនៅថ្ងៃព្រហស្បតិ៍ទី ១ខែ ឧសភា ថា ជនរងគ្រោះជាកម្មករសំណង់ ហើយកំពុងតែមានជំងឺទឹកនោមផ្អែមរ៉ាំរ៉ៃ ។
លោកវេជ្ជបណ្ឌិតបានអះអាងថា អ្នកជំងឺបានកើតដំបៅនៅដៃស្តាំកាលពីថ្ងៃទី២៤ ខែមេសា ហើយបានចូលសម្រាកព្យាបាលនៅមន្ទីរពេទ្យនៅបីថ្ងៃក្រោយមក ហើយស្រាប់តែរោគសញ្ញារបស់គាត់កាន់តែអាក្រក់ទៅៗ ដោយមុខរបួសប្រែជាខ្មៅ ហើមកូនកណ្តុរនៅក្រោមក្លៀកខាងស្តាំ ដួលសន្លប់ និងប្រកាច់ មុនពេលគាត់ស្លាប់អំឡុងពេលព្យាបាល។ ក្រោយពេលក្រុមវេជ្ជបណ្ឌិតសង្ស័យពួកគេក៏បានបញ្ជូនសំណាកទៅមន្ទីរពិសោធន៍ហើយក៏បានបញ្ជាក់ពីការឆ្លងបាក់តេរី Bacillus anthracis ។
ការស៊ើបអង្កេតដំបូងបានបង្ហាញថាអ្នកជំងឺអាចឆ្លងពីពីសត្វគោមួយក្បាលដែលត្រូវបានគេសម្លាប់ក្នុងអំឡុងពេលពិធីបុណ្យសាសនា ហើយនាំគ្នាបែងចែកសាច់ដើម្បីបរិភោគនៅតាមភូមិ ។
អ្នកដែលកំពុងតែដាក់ខ្លួននៅក្នុងការតាមដាន ពួកគេគឺសុទ្ធតែជាអ្នកដែលពាក់ព័ន្ធនឹងការសម្លាប់សត្វគោនេះ និង ក្រុមអ្នកដែលទទួលទានសាច់គោឆៅ ។ ពពូកបាក់តេរីអាក្រក់នេះ វាអាចរស់នៅក្នុងបរិយាកាសជាច្រើនឆ្នាំ ហើយសត្វដែលងាយឆ្លងគឺមាន ដូចជាសត្វពាហនៈ ពពែ និង ចៀមជាដើម ។ បាក់តេរី នេះ វាអាចឆ្លងទៅមនុស្សតាមរយៈការប៉ះផ្ទាល់ ការទទួលទានសាច់ឆៅ ឬមិនទាន់ឆ្អិន ឬការប៉ះពាល់នឹងកន្លែងដែលមានមេរោគ ។
ជំងឺនេះវាត្រូវបានកត់ត្រាថា បានកើតឡើងនៅថៃក្នុងឆ្នាំ ២០០០ ដោយនៅពេលនោះមាន ១៥ ករណី តែមិនមានអ្នកស្លាបទេ ហើយនៅក្នុងឆ្នាំ២០១៧ មាន២ករណីដែរ ប៉ុន្តែមិនមានសេចក្តីរាយការណ៍ករណីឆ្លងមកមនុស្សឡើយ ។ ក្រៅពីប្រទេសថៃនោះ នៅឆ្នាំ ២០២៤ ប្រទេសឡាវបានរាយការណ៍ ករណីឆ្លងជំងឺនេះចំនួន ១២៩ ករណី និងស្លាប់ម្នាក់។ ហើយកាលពីឧសភា ឆ្នាំ២០២៣ វៀតណាមបានកត់ត្រាការផ្ទុះឡើងចំនួន ៣ ដងដោយមាន ១៣ ករណី ។
ដើម្បីការពារជំងឺនេះ វាគ្មានអ្វីក្រៅពីការលើកកម្ពស់ការធ្វើអនាម័យខ្លួនប្រាណនោះឡើយ ហើយ ក្រៅពីនោះ គឺចៀសវាងការប៉ះពាល់ជាមួយសត្វពាហនៈ ពពែ និងចៀម ជាដើម ។ យើងទាំងអស់គ្នា គួរតែលាងដៃនិងសម្អាតខ្លួនប្រាណឲ្យបានត្រឹមត្រូវ បន្ទាប់ពីប៉ះពាល់សត្វទាំងនោះ ហើយអ្វីដែលវាហានិភ័យបំផុតនោះ គឺក្រុមអ្នកដែលនិយមទទួលទានសាច់ឫអាហារណាដែលមានគ្រឿងផ្សំពីសត្វទាំងនោះ ដោយមិនយកចិត្តទុកដាក់ចម្អិនឲ្យបានឆ្អិនល្អ ។ នៅពេលដែលមានសេចក្តីរាយការណ៍ពីរោគសញ្ញាទាំងនេះសូមមកកាន់មន្ទីរពេទ្យ ឲ្យបានឆាប់ ។ ផ្អាកបានគួរតែផ្អាកដែរពពួកអាហារដែលគេនិយមទទួលទានសាច់គោឆៅ ដូចជា ពពួកភ្លាសាច់គោសាច់ជា
ដើម។
ចែករំលែកព័តមាននេះ