ទីក្រុងប៉េកាំង ៖ ប្រទេសចិនបានប្រកាសនៅថ្ងៃទី២ ខែឧសភា ឆ្នាំ២០២៥ ថា ខ្លួនបើកចំហចំពោះកិច្ចចរចាពាណិជ្ជកម្មរបស់សហរដ្ឋអាមេរិក ប៉ុន្តែគូសបញ្ជាក់ថា ការចរចានឹងមិនអាចចាប់ផ្តើមទេ លុះត្រាតែទីក្រុងវ៉ាស៊ីនតោនយល់ព្រមដកពន្ធឯកតោភាគីដែលបានរំខានដល់ទីផ្សារពិភពលោក…
ទីក្រុងប៉េកាំង ៖ ប្រទេសចិនបានប្រកាសនៅថ្ងៃទី២ ខែឧសភា ឆ្នាំ២០២៥ ថា ខ្លួនបើកចំហចំពោះកិច្ចចរចាពាណិជ្ជកម្មរបស់សហរដ្ឋអាមេរិក ប៉ុន្តែគូសបញ្ជាក់ថា ការចរចានឹងមិនអាចចាប់ផ្តើមទេ លុះត្រាតែទីក្រុងវ៉ាស៊ីនតោនយល់ព្រមដកពន្ធឯកតោភាគីដែលបានរំខានដល់ទីផ្សារពិភពលោក និងខ្សែសង្វាក់ផ្គត់ផ្គង់។ នេះបើតាមប្រភពពីទីភ្នាក់ងារសារព័ត៌មាន AFP បានចេញផ្សាយ។
ការដាក់ពន្ធគយរបស់អាមេរិកដែលបានឈានដល់ ១៤៥% លើផលិតផលចិនជាច្រើនបានចូលជាធរមានកាលពីខែមុន ខណៈទីក្រុងប៉េកាំងបានឆ្លើយតបជាមួយនឹងពន្ធសងសឹកថ្មី ១២៥% លើការនាំចូលពីអាមេរិក។ យ៉ាងណាមិញ ផលិតផលបច្ចេកវិជ្ជាកម្រិតខ្ពស់ដូចជា ស្មាតហ្វូន គ្រឿងអេឡិចត្រូនិក និងកុំព្យូទ័រជាដើម បានទទួលការដកចេញជាបណ្តោះអាសន្នពីពន្ធរបស់អាមេរិក។
ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានអះអាងម្តងហើយម្តងទៀតថា ប្រទេសចិនបានឈានដល់កិច្ចពិភាក្សាពន្ធជាមួយអាមេរិក ហើយក្នុងសប្តាហ៍នេះ លោកបានលើកឡើងថា លោកជឿជាក់ថាមានឱកាសដ៏ល្អដែលភាគីទាំងពីរនឹងធ្វើកិច្ចព្រមព្រៀងជាមួយគ្នា។
ក្រសួងពាណិជ្ជកម្មចិន នៅថ្ងៃទី២ ខែឧសភានេះ បានប្រកាសថា ករណីនេះគឺជាអាមេរិកដែលបានចង់ចរចាពន្ធ ហើយថែមទាំងអះអាងថា ចិនកំពុងតែវាយតម្លៃការផ្តល់ជូននេះ។ ក្រសួងបានបញ្ជាក់យ៉ាងដូច្នេះថា «ប្រសិនបើអាមេរិកចង់ចរចា ពួកគេគួរតែបង្ហាញពីភាពស្មោះត្រង់ក្នុងការធ្វើដូច្នេះ ដោយត្រៀមខ្លួនដើម្បីកែតម្រូវការអនុវត្តខុសរបស់ពួកគេ និងលុបចោលពន្ធឯកតោភាគី»។ ក្រសួងបន្ថែមថា «នៅក្នុងការចរចា ឬកិច្ចពិភាក្សាណាមួយអាចកើតមាន ប៉ុន្តែប្រសិនបើភាគីអាមេរិកមិនកែតម្រូវវិធានការពន្ធឯកតោភាគីទេ វាគ្រាន់តែមានន័យថា ភាគីអាមេរិកគ្មានភាពស្មោះត្រង់ទាំងស្រុង ហើយនឹងធ្វើឱ្យខូចខាតដល់ទំនុកចិត្តទៅវិញទៅមករវាងភាគីទាំងពីរបន្ថែមទៀត»។
សូមជម្រាបថា ប្រទេសជាច្រើនលើពិភពលោកមានពេល៩០ថ្ងៃ ដែលនឹងផុតកំណត់នៅក្នុងខែកក្កដាខាងមុខនេះ ដើម្បីចរចាលើកិច្ចព្រមព្រៀងជាមួយអាមេរិក ដើម្បីជៀសវាងការរងពន្ធថ្មីអត្រាខ្ពស់។ ផ្ទុយទៅវិញ ប្រទេសចិនក្នុងនាមមហាអំណាចសេដ្ឋកិច្ចធំទី២ពិភពលោក បានប្តេជ្ញាប្រយុទ្ធប្រឆាំងសង្គ្រាមពាណិជ្ជកម្មជាមួយអាមេរិកដល់ទីបញ្ចប់ ដូចដែលក្រសួងការបរទេសចិនបានប្តេជ្ញាកន្លងមកថា «មិនលុតជង្គង់ចុះជាដាច់ខាត! ជំហររបស់ប្រទេសចិនតែងតែស្របគ្នាឥតខ្ចោះ ប្រសិនបើគេប្រយុទ្ធ យើងនឹងប្រយុទ្ធដល់ទីបញ្ចប់ ប្រសិនបើពិភាក្សាគ្នា យើងទ្វារបើកចំហរជានិច្ច។ សង្គ្រាមពន្ធគយ និងសង្គ្រាមពាណិជ្ជកម្មត្រូវបានផ្តួចផ្តើមដោយភាគីអាមេរិកជាឯកតោភាគី»៕
ចែករំលែកព័តមាននេះ