រាជធានីភ្នំពេញ ៖ នៅក្នុងសន្និសីទសារព័ត៌មានកាលពីថ្ងៃទី២៤ មិថុនា លោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រី ថ្លែងថា មានសម្បត្តិវប្បធម៌ និងធម្មជាតិចំនួន១៩ ត្រូវបានគណៈកម្មាធិការបេតិកភណ្ឌពិភពលោក សម្រេចដាក់បញ្ចូលក្នុងបញ្ជីបេតិកភណ្ឌពិភពលោក ។ ក្នុងនោះមានបេតិកភណ្ឌធម្មជាតិចំនួន៥ និងបេតិកភណ្ឌវប្បធម៌ចំនួន១៤នៅទូទាំងពិភពលោក ។ ការសម្រេចដាក់បញ្ចូលជាបេតិកភណ្ឌពិភពលោកនេះ ត្រូវបានធ្វើឡើងនៅក្នុងរយៈពេលនៃកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៧ ដែលកម្ពុជាធ្វើជាម្ចាស់ផ្ទះ ។
លោកឧបនាយករដ្ឋមន្ត្រី សុខ អាន មានប្រសាសន៍ថា សមាជិកគណៈកម្មាធិការបេតិកភណ្ឌពិភពលោកមានចំនួន២១ប្រទេស ហើយរាល់ការសម្រេចការដាក់បញ្ចូលជាបេតិកភណ្ឌពិភពលោកនោះ លុះត្រាតែមានការឯកភាពជាកុងសង់ស៊ុស ទើបអាចបញ្ចូលបាន ។ នៅក្នុងកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៧ ដែលកម្ពុជាធ្វើជាម្ចាស់ផ្ទះ គឺមានសំណើសុំចុះឈ្មោះជាបេតិកភណ្ឌពិភពលោកចំនួន៣០ ប៉ុន្តែយើងសម្រេចតែ១៩គម្រោងប៉ុណ្ណោះ ។ លោកឧបនាយករដ្ឋមន្ត្រី សុខ អាន បានធ្វើការកត់សម្គាល់ថា ឆ្នាំនេះមានការលើកឡើងនូវគម្រោងវប្បធម៌ធម្មជាតិល្អៗច្រើន ដែលធ្វើឱ្យយើងអាចការពារបាននូវបរិស្ថាន និងជីវិត ទាំងមនុស្សសត្វដែលកំពុងរស់នៅតំបន់ទាំងនោះ ។
យ៉ាងណាក៏ដោយ លោកឧបនាយករដ្ឋមន្ត្រីបានអះអាងថា ក្នុងនាមជាម្ចាស់ផ្ទះរៀបចំកិច្ចប្រជុំគណៈកម្មាធិការបេតិកភណ្ឌពិភពលោក លើកទី៣៧នេះ កម្ពុជាដកស្រង់បាននូវបទពិសោធន៍មួយចំនួនផងដែរ រួមមាន ការរៀបចំគម្រោងផ្សេងៗ ដើម្បីស្នើសុំចុះក្នុងបញ្ជីបេតិកភណ្ឌពិភពលោក ទាំងបេតិកភណ្ឌវប្បធម៌ និងធម្មជាតិ ។ ទន្ទឹមនោះ យើងក៏ដកស្រង់បាននូវបទពិសោធន៍តាមរយៈមន្ត្រីជំនាញនូវការការពារ និងថែរក្សាសម្បត្តិវប្បធម៌ពិភពលោកនៅកម្ពុជា រួមទាំងដោះស្រាយរាល់ការលំបាកទាំងឡាយដែលគណៈកម្មាធិការបេតិកភណ្ឌពិភពលោក បាននិងកំពុងប្រឈមក្នុងកិច្ចប្រជុំលើកទី៣៧នៅកម្ពុជាផងដែរ ៕
ចែករំលែកព័តមាននេះ