រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានឲ្យដឹងថា ក្រសួងទេសចរណ៍ គ្រោងស្នើរាជរដ្ឋាភិបាល និងសហការជាមួយបណ្តាស្ថាប័នពាក់ព័ន្ធ បង្កើតតំបន់ទេសចរណ៍ពិសិដ្ឋ ដែលតំបន់នោះនឹងគ្រោងអភិវឌ្ឍន៍ឲ្យក្លាយជាតំបន់ទេសចរណ៍ដែលអាចជួយសម្រាល និងព្យាបាលជំងឺរបស់ភ្ញៀវទេសចរជាតិ អន្តរជាតិបានតាមរបៀបធម្មជាតិ ។
លោក ទិត ចន្ថា រដ្ឋលេខាធិការក្រសួងទេសចរណ៍បានឲ្យដឹងនៅក្រោយកិច្ចប្រជុំអន្តរក្រសួង ស្តីពី ការអភិវឌ្ឍឧស្សាហកម្មទេសចរណ៍កម្ពុជា កាលពីចុងខែវិច្ឆិកា កន្លងមកថា ដោយសារកម្ពុជា មានកំណើនឡើងនូវចំនួនភ្ញៀវទេសចរអន្តរជាតិវ័យចំណាស់ ដែលធនធានថវិកាច្រើន បានជ្រើសរើសយកកម្ពុជាធ្វើជាគោលដៅធ្វើដំណើរទេសចរណ៍សម្រាកលំហែរកាយ និងកាត់បន្ថយភាពតាននៃជំងឺតាមបែបធម្មជាតិ កម្ពុជានឹងបង្កើតគោលដៅតំបន់ទេសចរណ៍ប្រភេទនេះ បានច្រើនកន្លែង ដើម្បីរួមចំណែកលើកសុខភាពមនុស្សជាតិរបស់ពិភពលោក។ លោកបន្តថា ៖« ការបង្កើតតំបន់ទេសចរណ៍ដែលអាចឲ្យភ្ញៀវបរទេសមកសម្រាកលំហែកាយបានរយៈពេលវែង ឬរយៈពេលខ្លី ដើម្បីកាត់បន្ថយភាពតានតឹង និងព្យាបាលជំងឺតាមបែបធម្មជាតិនេះ ក្រសួងនឹងសហការបង្កើតឲ្យមានផ្ទះស្នាក់ដ៏ប្រណីត មានអាហារហូបឆ្ងាញ់ ផ្តល់សេវាពិសេស មានទេសភាពស្អាត មានខ្យល់អាកាសធាតុល្អ ខុសពីប្រទេសដើមកំណើតរបស់ភ្ញៀវ ហើយនៅក្នុងតំបន់នោះ ក៏នឹងបង្កើតមានមណ្ឌលផ្តល់សេវាសុខភាពដ៏ប្រសើរ ជូនភ្ញៀវទេសចរទាំងអស់នោះផងដែរ »។
លោក ទិត ចន្ថា បានបន្តថា បច្ចុប្បន្នក្រសួងទេសចរណ៍បាននិងកំពុងសិក្សាតំបន់ទេសចរណ៍មានឈ្មោះថា តំបន់នាគរាជដែលមានសក្តានុពលមួយកន្លែងនៅខេត្តព្រះសីហនុ ដែលអាចរៀបចំបង្កើតឲ្យទៅជាតំបន់ទេសចរណ៍ពិសិដ្ឋ និងអាចផ្តល់សេវាព្យាបាលជំងឺនានាតាមបែបធម្មជាតិបាន។ លោកបន្ថែមថា ក្រៅពីនេះក្រសួងទេសចរណ៍ ក៏បាននិងកំពុងមើលឃើញតំបន់ទេសចរណ៍ពិសិដ្ឋនេះជាច្រើនកន្លែងទៀតដូចជា នៅតំបន់ភ្នំបូកគោ តំបន់ភាគឦសានកម្ពុជា ខេត្តសៀមរាប រាជធានីភ្នំពេញ តំបន់នានានៅតំបន់បឹងទន្លេសាបជាដើម ក៏អាចបង្កើតឲ្យទៅជាតំបន់ទេសចរណ៍ពិសិដ្ឋបានដែរ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា គម្រោងនេះ បើបង្កើតជាមួយស្ថាប័នជំនាញ និងមានការចូលរួមពីក្រសួងជំនាញ ទើបគម្រោងនេះទាក់ទាញនិងទទួលបានជោគជ័យ ប៉ុន្តែអ្វីសំខាន់គឺការផ្តល់ទុនពីរាជរដ្ឋាភិបាល ទើបគម្រោងនេះអាចដំណើរការបានលឿន និងជោគជ័យ ។
លោកបន្តថា ៖« បើមានគំនិតធ្វើជារឿងល្អមួយ តែបើគ្មានថវិកាគឺបរាជ័យ ហេតុនេះយើងចង់បានការជួយទុនពីរដ្ឋាភិបាល ដើម្បីជំរុញឲ្យគម្រោងនេះទទួលជោគជ័យប្រកបដោយនិរន្តរភាព »។
លោកបន្ថែមថា ៖« ភ្ញៀវទេសចរណ៍វ័យចំណាស់មកទស្សនាកម្ពុជា នៅមានតិចតួចនៅឡើយ ហេតុនេះដើម្បីទាក់ទាញទេសចរប្រភេទនេះ យើងត្រូវមានអនាម័យអាហារ អនាម័យបរិស្ថាន មានសុខសុវត្ថិភាព និងរៀបចំកន្លែងដែលមានលក្ខខណ្ឌអាកាសធាតុល្អសម្រាប់ភ្ញៀវ ទើបយើងទទួលបានទេសចរណ៍វ័យចំណាស់ច្រើន »៕
ចែករំលែកព័តមាននេះ