រាជធានីភ្នំពេញ ៖ ក្រុមហ៊ុន JDIFX ដែលជាក្រុមហ៊ុនវិនិយោគផ្នែកហិរញ្ញវត្ថុដំបូងគេបង្អស់លើវិស័យបណ្តុះបណ្តាល និងផ្តល់ព័ត៌មានទីផ្សារហិរញ្ញវត្ថុនៅកម្ពុជា បានសម្ពោធជាផ្លូវការ កាលពីល្ងាចថ្ងៃទី២៣ មិថុនា នៅមជ្ឈមណ្ឌលពិព័រណ៍កោះពេជ្រ ក្រោមអធិបតីភាពលោកជា ចំរើន ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ។ ក្រុមហ៊ុននេះ នឹងផ្តល់អាជីពផ្នែកហិរញ្ញវត្ថុ
រាជធានីភ្នំពេញ ៖ ក្រុមហ៊ុន JDIFX ដែលជាក្រុមហ៊ុនវិនិយោគផ្នែកហិរញ្ញវត្ថុដំបូងគេបង្អស់លើវិស័យបណ្តុះបណ្តាល និងផ្តល់ព័ត៌មានទីផ្សារហិរញ្ញវត្ថុនៅកម្ពុជា បានសម្ពោធជាផ្លូវការ កាលពីល្ងាចថ្ងៃទី២៣ មិថុនា នៅមជ្ឈមណ្ឌលពិព័រណ៍កោះពេជ្រ ក្រោមអធិបតីភាពលោកជា ចំរើន ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ។ ក្រុមហ៊ុននេះ នឹងផ្តល់អាជីពផ្នែកហិរញ្ញវត្ថុដល់យុវជនសម័យតេជោសម្រាប់ត្រៀមចូលក្នុងសហគមន៍អាស៊ាននៅឆ្នាំ២០១៥ខាងមុខ ។
លោកសយ ប៊ុនថន អគ្គនាយកក្រុមហ៊ុន JDIFX មានប្រសាសន៍នាឱកាសសម្ពោធក្រុមហ៊ុនថា ក្រុមហ៊ុនរៀបចំកម្មវិធីនេះ គឺមានចេតនាដើម្បីផ្តល់អាជីពផ្នែកហិរញ្ញវត្ថុ ដល់យុវជនសម័យតេជោ ក្នុងការត្រៀមខ្លួនចូលទៅក្នុងសហគមន៍អាស៊ាននា ឆ្នាំ២០១៥ និងចេតនាមួយទៀតគឺចង់បណ្តុះគំនិតយុវជនសម័យនេះឱ្យមានចំណេះដឹងយ៉ាងទូលំទូលាយលើវិស័យហិរញ្ញវត្ថុនៅក្នុងប្រទេសកម្ពុជា និងជាការឆ្លើយតបទៅនឹងវិស័យហិរញ្ញវត្ថុមួយ ដែលសហគមន៍នឹងចូលមកដល់នៅពេលឆាប់ៗនេះ ។ ជាដំបូងក្រុមហ៊ុននឹងផ្តល់ឱ្យយុវជនបានយល់ដឹងពីទីផ្សារផ្នែកហិរញ្ញវត្ថុ ។
លោកសយ ប៊ុនថន បន្តថា ក្រុមហ៊ុននេះប្រើប្រាស់ចំណេះដឹង បទពិសោធន៍ និងធនធានរបស់អ្នកជំនាញហិរញ្ញវត្ថុ ដើម្បីផ្តល់ឱកាសវិនិយោគលើវិស័យអប់រំ អចលនទ្រព្យ ការចរាចររូបិយប័ណ្ណអន្តរជាតិតាមប្រព័ន្ធបច្ចេកវិទ្យាទំនើប ក្នុងបុព្វហេតុដើម្បីបណ្តុះពលរដ្ឋនិងយុវជនឆ្លាតអំពីឥទិ្ធពលនិងគុណតម្លៃនៃហិរញ្ញវត្ថុនៅក្នុងសហគមន៍អាស៊ាន ។ ឆ្លងតាមបទពិសោធន៍ការងារនៅក្នុងសង្គមស៊ីវិលអស់ជាង១៥ឆ្នាំ និងក្រោយពេលបានបញ្ចប់ការសិក្សាពីប្រទេសសិង្ហបុរី លោកបានរកឃើញថា ពលរដ្ឋ និស្សិត បញ្ញវន្តកម្ពុជា មានភាពទំនេរច្រើន ហើយភាពទំនេរទាំងនេះ មិនបានចូលរួមក្នុងការអភិវឌ្ឍសេដ្ឋកិច្ចគ្រួសារ និងសង្គមជាតិទេ ។
លោកMario Singh អ្នកឯកទេសផ្នែកហិរញ្ញវត្ថុ មកពីប្រទេសសិង្ហបុរី ថ្លែងថា វិស័យហិរញ្ញវត្ថុនេះមានសារសំខាន់ណាស់សម្រាប់ប្រទេសកម្ពុជា ដោយសារតែប្រទេសកម្ពុជាជាប្រទេសមួយដែលមានភាពក្មេងខ្ចីខាងផ្នែកនេះខុសពីប្រទេសមួយចំនួនដូចជាសហភាពអឺរ៉ុប សហរដ្ឋអាមេរិកជាដើមដែលជាប្រទេសមួយចំណាស់លើផ្នែកនេះ ។ លោកបន្តថា មានក្រុមហ៊ុនធំៗជាច្រើនបានរកប្រាក់ចំណេញពីការបណ្តាក់ទុន ហើយប្រាក់ចំណេញទាំងនោះជារូបិយប័ណ្ណផ្សេងៗគ្នាចូលទៅក្នុងក្រុមហ៊ុនតែមួយ ក៏ប៉ុន្តែបើក្រុមហ៊ុនទាំងនោះមិនបានដឹងពីអត្រាប្តូរប្រាក់ ពីទីផ្សារហិរញ្ញវត្ថុប្រទេសផ្សេងៗជាមួយនឹងប្រាក់ក្នុងស្រុកនោះ ទេ គេនឹងបង់ខាតប្រាក់ចំណេញរបស់គេ ។ នៅពេលដែលគេយល់ដឹងពីទីផ្សារហិរញ្ញវត្ថុនៃបណ្តាប្រទេសផ្សេងហើយ គេនឹងមានការការពារខ្ពស់ក្នុងក្រុមហ៊ុនរបស់ពួកគេ ។
ទាក់ទងនឹងវិស័យហិរញ្ញវត្ថុអន្តរជាតិនេះដែរ វានឹងធ្វើឱ្យបណ្តាក្រុមហ៊ុននានានៅក្នុងស្រុកមានការរីកចម្រើន និងធ្វើឱ្យសេដ្ឋកិច្ចរបស់ក្រុមហ៊ុននោះ មានការកើនឡើង បើសិនណាជាម្ចាស់ក្រុមហ៊ុនក៏ដូចជាអ្នកគ្រប់គ្រងក្រុមហ៊ុនបានយល់ពីហិរញ្ញវត្ថុនិងគ្រប់គ្រងហិរញ្ញវត្ថុនៅក្នុងក្រុមហ៊ុនរបស់ខ្លួនបានល្អ ។ តាមធម្មតា នៅពេលដែលក្រុមហ៊ុនណាមួយខ្វះខាតដើមទុន ក្រុមហ៊ុននោះនឹងទៅរកខ្ចីទុនពីធនាគារ ឬពីគ្រឹះស្ថានមីក្រូហិរញ្ញវត្ថុនានាជាដើម តែនៅពេលដែលខ្ចីទុនគេ គឺយើងត្រូវតែបង់ការប្រាក់ទៅឱ្យធនាគារ ឬគ្រឹះស្ថានមីក្រូហិរញ្ញវត្ថុនោះ ។ ផ្ទុយទៅវិញ បើក្រុមហុ៊នគ្រប់គ្រងហិរញ្ញវត្ថុបានល្អគឺមិនចាំបាច់ខ្ចីប្រាក់និងបង់ការប្រាក់ឱ្យធនាគារ ឬគ្រឹះស្ថានមីក្រូហិរញ្ញវត្ថុនោះទេ ដូចនេះគឺយើងបានចំណេញមួយចំណែករួចទៅហើយ ។
គួរបញ្ជាក់ថា ក្រុមហ៊ុនJDIFX ត្រូវបានបង្កើតឡើងនាឆ្នាំ២០១២ ជាក្រុមហ៊ុនវិនិយោគផ្នែកហិរញ្ញវត្ថុដំបូងបង្អស់លើវិស័យបណ្តុះបណ្តាលនិងផ្តល់ព័ត៌មានទីផ្សារហិរញ្ញវត្ថុនៅកម្ពុជា និងបានទទួលវិញ្ញាបនបត្រចុះបញ្ជីពាណិជ្ជកម្មលេខ៦៣២១ ពណ.ចបព របស់ក្រសួងពាណិជ្ជកម្មចុះថ្ងៃទី១១ តុលា ឆ្នាំ២០១២ ៕
ចែករំលែកព័តមាននេះ