រាជធានីភ្នំពេញ ៖ កាលពីសប្តាហ៍ទី១គេបានរកឃើញម៉ន វិរៈ មកពីក្លិបវិស្វកម្មបច្ចេកទេសទ័ពជើងគោកព្រែកឯង ម្នាក់រួចមកហើយនៅក្នុងពូលB ដែលរកបាន៣ពិន្ទុមុនគេបន្ទាប់ពីប្រកួតឈ្នះអ៊ុង ស៊ីណា មកពីក្លិបផ្សារបឹងទំពុននៅក្នុងទឹកទី៣ ។
រាជធានីភ្នំពេញ ៖ កាលពីសប្តាហ៍ទី១គេបានរកឃើញម៉ន វិរៈ មកពីក្លិបវិស្វកម្មបច្ចេកទេសទ័ពជើងគោកព្រែកឯង ម្នាក់រួចមកហើយនៅក្នុងពូលB ដែលរកបាន៣ពិន្ទុមុនគេបន្ទាប់ពីប្រកួតឈ្នះអ៊ុង ស៊ីណា មកពីក្លិបផ្សារបឹងទំពុននៅក្នុងទឹកទី៣ ។ សប្តាហ៍នេះ ឆាំរ៉ែម មកពីក្លិបសិង្ហកីឡាគឺជាអ្នកទី២ ដែលមានសំណាងរកបាន៣ពិន្ទុពីការប្រកួតលើកទី១របស់ខ្លួននៅក្នុងព្រឹត្តិការណ៍នៃការប្រកួតវគ្គជម្រុះវិលជុំដណ្តើមខ្សែក្រវាត់K-cement ទម្ងន់៥៤គីឡូក្រាមនៅលើសង្វៀនCTN កាលពីរសៀលថ្ងៃអាទិត្យទី២៣ មិថុនា បន្ទាប់ពីរូបគេបានប្រកួតឈ្នះចាន់ រតនៈមកពីក្លិបកងពលធំអន្តរាគមន៍លេខ៣ព្រះវិហារដោយពិន្ទុយ៉ាងលំបាកបំផុត ។
អ្នកប្រដាល់មាឌតូចចិត្តធំ ឆាំ រ៉ែម ដែលបានមកជួបចាន់ រតនៈ លើកនេះមិនធម្មតាប៉ុន្មានឡើយ ព្រោះអីគូប្រកួតរបស់គេមានប្រៀបខាងកម្ពស់ជាងឆ្ងាយណាស់ដែលជាហេតុធ្វើឱ្យគេពិបាកក្នុងការសម្រុកចូលកៀកដើម្បីវាយកែង និងជង្គង់ឱ្យចំគោលដៅ ។ ទោះបីជាយ៉ាងណា តាំងពីចាប់ផ្តើមទឹកទី១មកម្លេ៉ះ ឆាំ រ៉ែម មិនមានការកោតញញើតគូប្រកួតបន្តិចណាឡើយ ។ ចាន់ រតនៈ បានព្យាយាមប្រើស្នៀតជើងទាត់ដើម្បីរារាំងមិនឱ្យគេចូលកៀកបានជាមួយនឹងការប្រើស្នៀតជង្គង់បុកនិងអុកមិនបង្អង់ក្នុងគោលបំណងបង្ក្រាបគូប្រកួតឱ្យបានឆាប់បំផុត។
ប៉ុន្តែឆាំ រ៉ែម ដែលមានចិត្តសឿងបំផុតនោះ គេនៅតែដើរចូលយ៉ាងងងើលរួចព្យាយាមទាត់សងវិញដូចព្យុះទើបចាប់ពីទឹកទី១ដល់ទឹកទី៤គេឃើញទាំងសងខាងមានប្រៀបស្មើគ្នាទាំងបច្ចេកទេសនិងកម្លាំង ។ ឆាំ រ៉ែម ចាប់ផ្តើមស្រុតចុះកម្លាំងបន្តិចវិញនៅពេលឈានចូលដល់ទឹកទី៥ ទោះបីជាបែបនេះក៏ដោយក៏គេឃើញចាន់ រតនៈ ត្រូវឆាំ រ៉ែម ទាត់ជើងក្រោមឱ្យដួលទាំងជំហរជាញឹកញាប់ មិនតែប៉ុណ្ណោះផ្លែជង្គង់របស់គេបុកចូលចំគោលដៅបានល្អ ទើបចុងក្រោយគេត្រូវប្រកាសឱ្យឈ្នះពិន្ទុចាន់ រតនៈ ទាំងលំបាកបំផុត ។
រីឯគូប្រកួតមិត្តភាពវិញ ពេជ្រ អារុណ មកពីក្លិបសម្រែករាជសីហ៍បង្ក្រាបគ្រឿងញៀន ឈ្នះពិន្ទុឡុង សុវណ្ណពៅ មកពីក្លិបសាលវ័ន្តកីឡា ។ សេរី រតនា មកពីក្លិបឃ្លាំងមឿងកីឡាខេត្តពោធិ៍សាត់ ឈ្នះពិន្ទុ ផល សីហា មកពីក្លិបយុវជនកម្ពុជាមានជ័យ ។ សោម តឿទី មកពីក្លិបខ្លារខិនមានឫទ្ធិ ឈ្នះពិន្ទុយ៉ាម រ៉េត មកពីក្លិបរស្មីកុមារកំព្រា ។ ហេង សត្រា មកពីក្លិបតាព្រហ្មមានជ័យបង្ក្រាបគ្រឿងញៀន ផ្តួលខុន សីហា មកពីក្លិបកងពលធំអន្តរាគមន៍លេខ៣ព្រះវិហារឱ្យសន្លប់នៅត្រឹមទឹកទី៤ ។
សរ រាជសីហ៍ មកពីក្លិបមោងឫស្សីមរតកគុនខ្មែរ ឈ្នះពិន្ទុហេង សារិទ្ធ មកពីក្លិបព្រៃទទឹងបង្ក្រាបគ្រឿងញៀនខេត្តបាត់ដំបង និងគូចុងក្រោយបឹង ស៊ីយ៉ាក មកពីក្លិបអេភូថងកីឡា ឈ្នះពិន្ទុ គឿម សុវណ្ណនឿត មកពីក្លិបឃ្លាំងមឿងកីឡាខេត្តពោធិ៍សាត់ ៕
ចែករំលែកព័តមាននេះ