ខេត្តមណ្ឌលគិរី ៖ ដើម្បីជួយដោះស្រាយនូវទុក្ខលំបាករបស់ប្រជាពលរដ្ឋដែលកំពុងរងគ្រោះដោយ អគ្គិភ័យឆេះផ្ទះឈើអស់ទាំងស្រុងចំនួនពីរខ្នង នារសៀលថ្ងៃទី០៣ ខែធ្នូ ឆ្នាំ២០១៨ សាខាកាកបាទ ក្រហមកម្ពុជាខេត្តមណ្ឌលគិរី ដឹកនាំដោយលោកស្រី…
ខេត្តមណ្ឌលគិរី ៖ ដើម្បីជួយដោះស្រាយនូវទុក្ខលំបាករបស់ប្រជាពលរដ្ឋដែលកំពុងរងគ្រោះដោយ អគ្គិភ័យឆេះផ្ទះឈើអស់ទាំងស្រុងចំនួនពីរខ្នង នារសៀលថ្ងៃទី០៣ ខែធ្នូ ឆ្នាំ២០១៨ សាខាកាកបាទ ក្រហមកម្ពុជាខេត្តមណ្ឌលគិរី ដឹកនាំដោយលោកស្រី ដួច ដារ៉ា អនុប្រធានគណៈកម្មាធិការសាខា កាកបាទក្រហមកម្ពុជាខេត្ត រួមទាំងសមាជិក សមាជិកា បាននាំយកអំណោយមនុស្សធម៌មួយចំនួន របស់សាខាកាកបាទក្រហមខេត្ត ផ្តល់ជូនដល់ប្រជាពលរដ្ឋរងគ្រោះភ្លាមៗចំនួន០២គ្រួសារ ស្ថិតនៅភូមិប៊ូស្រា ស្រុកពេជ្រាដា ខេត្តមណ្ឌលគិរី។
លោកស្រី ដួច ដារ៉ា បានមានប្រសាសន៍ ពាំនាំនូវការផ្តាំផ្ញើសួរសុខទុក្ខពីសំណាក់ ឯកឧត្តម ស្វាយ សំអ៊ាង ប្រធានគណៈកម្មាធិការសាខា កាកបាទក្រហមកម្ពុជាខេត្ត ជាពិសេសសម្តេចកិតិ្តព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធានកាកបាទ ក្រហមកម្ពុជា ដែលជានិច្ចកាល សម្តេចតែងតែយកចិត្តទុកដាក់គិតគូរពីសុខុមាលភាព ជូនប្រជាពលរដ្ឋ ទូទៅជាពិសេស ជនចាស់ជរាក្មេងកំព្រា ស្ត្រីមេម៉ាយជនពិការ គ្រួសារដែលមានជីវភាពក្រីក្រ និងគ្រោះថ្នាក់ដោយប្រការផ្សេងៗ។
ជាក់ស្តែង ប្រជាពលរដ្ឋរងគ្រោះដោយអគ្គិភ័យឆេះផ្ទះចំនួន០២គ្រួសារ នាពេលនេះ ទទួលបានអំណោយមនុស្សធម៌មួយចំនួន ដើម្បីជួយដោះស្រាយនូវការខ្វះខាត បានមួយរយៈពេលខ្លី។ លោកស្រី ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្ន ចំពោះការដុតទៀន ធូប និងត្រូវបិទចរន្តអគ្គិសនី នៅពេលដែលមិននៅផ្ទះចៀសវាងគ្រោះថ្នាក់ផ្សេងៗ បង្កឱ្យខូចខាតដល់ទ្រព្យសម្បត្តិ និងអាយុជីវិតមនុស្ស ជាពិសេស ត្រូវខិតខំប្រកបមុខរបរចិញ្ចឹម ជីវិតបន្ថែមទៀត ដើម្បីធ្វើយ៉ាងណាស្តារនូវជីវភាពគ្រួសារឡើងវិញ។ តាមការលើកឡើងរបស់សាខា កាកបាទក្រហមកម្ពុជាខេត្ត លោក អាន សុឃីម បានឱ្យដឹងថា៖
អំណោយដែលចែកជូនដល់ប្រជាពលរដ្ឋ រងគ្រោះចំនួន០២គ្រួសារ រួមមាន៖ ក្នុងមួយគ្រួសារ ទទួលអង្ករ៦០គីឡូក្រាម ឃីត១កញ្ចប់ តង់ កន្ទេល ត្រីខ និងថវិកាមួយចំនួន ក្នុងនោះក៏មានថវិការបស់សហភាពសហព័ន្ធយុវជនកម្ពុជាស្រុកផងដែរ។ សូមបញ្ជាក់ថា តាមរបាយការណ៍របស់អធិការរងនគរបាលស្រុកពេជ្រាដា លោកវរសេនីយ៍ត្រី ចាន់ ដារា បានឱ្យដឹងថា ករណីអគ្គិភ័យឆេះផ្ទះនេះ កើតឡើងនៅវេលាម៉ោង២ និង៣០នាទីរសៀល ថ្ងៃទី៣ ខែធ្នូ ឆ្នាំ២០១៨ លោកបន្ថែមថា ផ្ទះឈើដែលឆេះអស់ទាំងស្រុងចំនួនពីរខ្នងនេះ រួមទាំងសម្ភារប្រើប្រាស់ មួយចំនួន៕
ចែករំលែកព័តមាននេះ