រាជធានីភ្នំពេញ ៖ ក្រុមហ៊ុនលីលី ផលិតនំស្រួយនៅកម្ពុជា បានទទួលពានរង្វាន់មាសពីក្រសួងឧស្សាហកម្ម រ៉ែ និងថាមពល ក្នុងការអនុវត្តនូវគម្រោងឧស្សាហកម្មបៃតងនៅកម្ពុជាបានល្អជាងគេ ដែលក្រុមហ៊ុនបានចំណាយទៅលើថាមពលផ្សេងៗអស់តិច និងទទួលបានមកវិញនូវការចំណេញច្រើន និងកាត់បន្ថយការបំពុលបរិស្ថានបានច្រើនជាងគេផងដែរ ។
រាជធានីភ្នំពេញ ៖ ក្រុមហ៊ុនលីលី ផលិតនំស្រួយនៅកម្ពុជា បានទទួលពានរង្វាន់មាសពីក្រសួងឧស្សាហកម្ម រ៉ែ និងថាមពល ក្នុងការអនុវត្តនូវគម្រោងឧស្សាហកម្មបៃតងនៅកម្ពុជាបានល្អជាងគេ ដែលក្រុមហ៊ុនបានចំណាយទៅលើថាមពលផ្សេងៗអស់តិច និងទទួលបានមកវិញនូវការចំណេញច្រើន និងកាត់បន្ថយការបំពុលបរិស្ថានបានច្រើនជាងគេផងដែរ ។
ក្រុមហ៊ុនបានទទួលពានរង្វាន់នេះ ក្នុងឱកាសដែលក្រសួងឧស្សាហកម្ម រ៉ែ និងថាមពល រៀបចំធ្វើពិធីប្រគល់ពានរង្វាន់ដល់ក្រុមហ៊ុន សហគ្រាសដែលបានអនុវត្តគម្រោងឧស្សាហកម្មបៃតងបានល្អជាងគេ កាលពីល្ងាចថ្ងៃទី២០ មិថុនា ២០១៣ នៅសណ្ឋាគារភ្នំពេញ ។
អ្នកស្រី កែវ មុំ នាយិកាក្រុមហ៊ុនលីលីផលិតនំស្រួយនៅកម្ពុជា បានឱ្យដឹងថា អ្នកស្រីពិតជាសប្បាយរីករាយណាស់ដែលក្រុមហ៊ុនលោកស្រីបានទទួលពានរង្វាន់មាសពីក្រសួងឧស្សាហកម្ម រ៉ែ និងថាមពល ដែលបានសហការជាមួយទីភ្នាក់ងារសហប្រតិបត្តិការអន្តរជាតិកូរ៉េ កូយកា ។ មុននឹងបានទទួលពានរង្វាន់នេះ ក្រុមហ៊ុននីមួយៗដែលបានអនុវត្តនូវគម្រោងឧស្សាហកម្មបៃតងនេះ ធ្វើម៉េចត្រូវតែខិតខំប្រឹងប្រែងដើម្បីជួយកាត់បន្ថយការចំណាយលើថាមពលនៅក្នុងដំណើរការរោងចក្រ សហគ្រាស កាត់បន្ថយការបំពុលបរិស្ថានបានច្រើន និងទទួលបានប្រាក់ចំណេញច្រើនផងដែរ ។
អ្នកស្រីបានបន្ថែមថា នៅពេលក្រុមហ៊ុននំស្រួយលីលីបានអនុវត្តនូវអ្វីដែលគម្រោងបានណែនាំឃើញថា ក្រុមហ៊ុនកាត់បន្ថយការចំណាយបានច្រើនដូចជា ការចំណាយទៅលើថាមពលអគ្គិសនី ការចំណាយទៅលើទឹក ហើយកាកសំណល់វិញទៀតសោតក៏បានយកមកកែច្នៃដើម្បីប្រើប្រាស់ផ្សេងៗនៅក្នុងតម្រូវការក្នុងសិប្បកម្ម ។បន្ទាប់ពីបានអនុវត្តកន្លងមក ក្រុមហ៊ុនបានទទួលប្រាក់ចំណេញច្រើន និងបានគិតគូរដល់បុគ្គលិក ដោយបានផ្តល់ជាប្រាក់រង្វាន់ផ្សេងៗជាច្រើន និងរៀបចំធ្វើការដំឡើងប្រាក់ខែជូនបុគ្គលិកដើម្បីឱ្យគាត់មានទឹកចិត្តក្នុងការបំពេញការងារ ។
មិនតែប៉ុណ្ណោះ នៅពេលដែលក្រុមហ៊ុនទទួលបានប្រាក់ចំណេញពីការអនុវត្តគម្រោងនេះ ក្រុមហ៊ុនក៏បានបរិច្ចាគថវិកាមួយចំនួនជូនដល់ប្រជាពលរដ្ឋដែលរងគ្រោះដោយសារគ្រោះធម្មជាតិផ្សេងៗ ដើម្បីជាការចូលរួមចំណែកក្នុងទឹកចិត្តសប្បុរសធម៌ជាមួយរាជរដ្ឋាភិបាលផងដែរ ៕
ចែករំលែកព័តមាននេះ