រាជបុត្រជួបលោកពូទីន ដើម្បីចរចាពីបញ្ហាប្រេង
ទីក្រុងប៊ុយណូស៊ែ ៖ ព្រះរាជបុត្រ Mohammed bin Salman របស់អារ៉ាប៊ីសាអូឌីតបានជួបជាមួយនឹងលោកប្រធានាធិបតីវ្លាដឺមៀរ ពូទីន (Vladimir Putin)…
ទីក្រុងប៊ុយណូស៊ែ ៖ ព្រះរាជបុត្រ Mohammed bin Salman របស់អារ៉ាប៊ីសាអូឌីតបានជួបជាមួយនឹងលោកប្រធានាធិបតីវ្លាដឺមៀរ ពូទីន (Vladimir Putin) ក្រៅផ្លូវការក្នុងអំឡុងកិច្ចប្រជុំ G20 នៅប្រទេសអាហ្សង់ទីនកាលពីថ្ងៃសៅរ៍កន្លងមកនេះ និងបានពិភាក្សាពីកិច្ចសហប្រតិបត្តិការក្នុងផ្នែកជាច្រើនដូចជាការស្វែងរកតុល្យភាពទីផ្សារប្រេងពិភពលោកជាដើម ។
អង្គការនៃប្រទេសនាំចេញប្រេង (OPEC) និងប្រទេសរុស្ស៊ីរួមជាមួយនឹងប្រទេសផលិតប្រេងសំខាន់ៗជុំវិញពិភពលោក នឹងជួបគ្នានៅទីក្រុងវីយែននៃប្រទេសអូទ្រីសចាប់ពីថ្ងៃទី៦ដល់៧ ខែធ្នូ ដើម្បីពិភាក្សាពីទីផ្សារប្រេង ខណៈដែលតម្លៃប្រេងធ្លាក់ចុះ ព្រោះតែការផ្គត់ផ្គង់លើសលប់ ។
អារ៉ាប៊ីសាអូឌីតបានស្នើដល់OPEC និងសម្ព័ន្ធមិត្តរបស់ខ្លួនឲ្យកាត់បន្ថយទិន្នផលប្រេងប្រមាណ១លានធុងក្នុង១ថ្ងៃពីខែមករាឆ្នាំ២០១៩ ដើម្បីទប់ស្កាត់តម្លៃមិនឲ្យធ្លាក់ចុះបន្ត ។
លោកប្រធានាធិបតីពូទីន បាននិយាយកាលពីថ្ងៃសៅរ៍ថា លោកមិនអាចឲ្យតួលេខច្បាស់លាស់ទាក់ទិននឹងការកាត់បន្ថយទិន្នផលប្រេងទេ ប៉ុន្តែប្រទេសរុស្ស៊ីនឹងបន្តចូលរួមចំណែកក្នុងការកាត់បន្ថយទិន្នផលប្រេងជុំវិញពិភពលោក ។
កាលពីថ្ងៃសុក្រ លោកប្រធានាធិបតីពូទីន និងព្រះរាជបុត្របានផ្តោះប្តូរការស្វាគមន៍គ្នាយ៉ាងជិតស្និទ្ធ ខណៈដែលអ្នកដឹកនាំទាំងពីរអង្គុយជិតគ្នានៅកិច្ចប្រជុំ G20 ។
អាកប្បកិរិយារបស់លោកពូទីន មានលក្ខណៈខុសគ្នានឹងអ្នកដឹកនាំដទៃនៅកិច្ចប្រជុំខាងលើយ៉ាងខ្លាំង តាមរយៈការស្វាគមន៍ជាមួយរាជបុត្ររូបនេះដោយការទះដៃគ្នា ៕
ចែករំលែកព័តមាននេះ