អន្តរជាតិ ៖ អ៊ីរ៉ង់បានប្រកាសថា ពិភពលោកគួរតែត្រៀមខ្លួនសម្រាប់ប្រេងនៅក្នុងតម្លៃ ២០០ ដុល្លារក្នុង១បារ៉ែល (ធុង) ខណៈកងកម្លាំងរបស់ខ្លួន កាលពីថ្ងៃទី១១ ខែមីនា…
អន្តរជាតិ ៖ អ៊ីរ៉ង់បានប្រកាសថា ពិភពលោកគួរតែត្រៀមខ្លួនសម្រាប់ប្រេងនៅក្នុងតម្លៃ ២០០ ដុល្លារក្នុង១បារ៉ែល (ធុង) ខណៈកងកម្លាំងរបស់ខ្លួន កាលពីថ្ងៃទី១១ ខែមីនា ឆ្នាំ២០២៦ បានវាយប្រហារបណ្តាកប៉ាល់ដឹកជញ្ជូន។ ទីភ្នាក់ងារថាមពលអន្តរជាតិ (IEA) បានប្រកាសអំពីការបញ្ចេញស្តុកយុទ្ធសាស្ត្រយ៉ាងច្រើន ដើម្បីទប់ស្កាត់ផលប៉ះពាល់ដ៏អាក្រក់បំផុតមួយ ចាប់តាំងពីទសវត្សរ៍ឆ្នាំ ១៩៧០។ នេះបើយោងតាមប្រភពពី Reuters បានចេញផ្សាយ។
សង្គ្រាមដែលបង្កឡើងដោយការវាយប្រហារតាមអាកាសរួមគ្នារវាងសហរដ្ឋអាមេរិក និងអ៊ីស្រាអែលជិត២សប្តាហ៍មុន បានសម្លាប់មនុស្សប្រហែល ២ ពាន់នាក់ ភាគច្រើនជាជនជាតិអ៊ីរ៉ង់ និងលីបង់ ខណៈដែលសង្គ្រាមបានរីករាលដាលដល់ប្រទេសលីបង់ និងបានធ្វើឱ្យទីផ្សារថាមពល និងការដឹកជញ្ជូនសកលជួបភាពវឹកវរខ្លាំង។
បើទោះបីជាមន្ទីរបញ្ចកោណបានអះអាងអំពីការវាយប្រហារតាមអាកាសដ៏ខ្លាំងក្លាបំផុតរបស់អាមេរិក ចាប់តាំងពីការចាប់ផ្តើមនៃសង្គ្រាមក៏ដោយ ក៏អ៊ីរ៉ង់មកទល់ពេលនេះ នៅតែបាញ់មីស៊ីនស្រោចលើអ៊ីស្រាអែល និងគោលដៅជាច្រើនផ្សេងទៀតនៅទូទាំងតំបន់មជ្ឈិមបូព៌ា ដែលជាក់ពាក់ព័ន្ធនឹងសហរដ្ឋអាមេរិក ដោយបង្ហាញថា ខ្លួននៅតែអាចវាយបកវិញគ្រប់ពេល។
តួយ៉ាងនៅថ្ងៃទី១១ ខែមីនា ឆ្នាំ២០២៦ កប៉ាល់ ៣ គ្រឿង ត្រូវបានរាយការណ៍ថា រងការវាយប្រហារក្នុងដែនទឹកឈូងសមុទ្រ ខណៈឆ្មាំបដិវត្តន៍អ៊ីរ៉ង់អះអាងថា កងកម្លាំងខ្លួនបានបាញ់ទៅលើកប៉ាល់ក្នុងឈូងសមុទ្រណាដែលមិនស្តាប់បង្គាប់ពួកគេ។
ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១១ ខែមីនា ឆ្នាំ២០២៦ នៅក្នុងការជួបជុំអ្នកគាំទ្រនៅរដ្ឋកេនតាក់គី (Kentucky) បានលើកឡើងថា លោកមិនទាន់ត្រៀមខ្លួនរួចរាល់ ដើម្បីបញ្ចប់សង្គ្រាមនៅឡើយទេ ដោយលោកនិយាយថា «យើងបានឈ្នះសង្គ្រាម (អ៊ីរ៉ង់) ប៉ុន្តែសហរដ្ឋអាមេរិកមិនទាន់ចង់ត្រឡប់ទៅវិញរៀងរាល់ពីរឆ្នាំម្តងនោះទេ។ ដូច្នេះយើងត្រូវតែបញ្ចប់រាល់កិច្ចការនេះ»៕
ចែករំលែកព័តមាននេះ