រាជធានីភ្នំពេញ ៖ នាយកសាលាបឋមសិក្សាទួលស្លែង ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន បានស្លាប់យ៉ាងអាណោចអាធ័មពេលបញ្ជូនដល់មន្ទីរពេទ្យមិត្តភាពខ្មែរ-សូវៀត ក្រោយពីត្រូវអ្នកសុំទានចាក់នឹងកាំបិតចុងស្រួច ។ ហេតុការណ៍នេះបានកើតឡើងកាលពីវេលាម៉ោង៣ និង១០នាទីរសៀល ថ្ងៃទី២៣ មិថុនា នៅផ្លូវលេខ១៧៣ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន ដោយសារតែលោកហាមឃាត់អ្នកសុំទាននោះមិនឱ្យសុំទានមុខសាលារៀន ។
នាយកសាលាដែលស្លាប់នៅក្នុងហេតុការណ៍ហិង្សានឹកស្មានមិនដល់នេះគឺលោក ស្រុី ឆៃគីម អាយុ៦៣ឆ្នាំ ។ ចំណែកឃាតករជាអ្នកសុំទានដែលចាក់នាយកសាលាស្លាប់នោះ ត្រូវបាននគរបាលប៉ុស្តិ៍ទួលស្វាយព្រៃទី១ចាប់ខ្លួនភ្លាមៗដែរ ដែលជននេះឈ្មោះ សំ ជៀន អាយុ៥០ឆ្នាំ មានស្រុកកំណើតនៅខេត្តព្រៃវែង ស្នាក់នៅចល័តនៅចំណុចសាលាបឋមសិក្សាខាងលើ។
នៅចំពោះមុខសមត្ថកិច្ច ជនឈ្មោះ សំ ជៀន សារភាពថា មូលហេតុដែលរូបគេចាក់សម្លាប់លោកនាយកសាលាខាងលើ គឺដោយសារឃាត់ខ្លួនរូបគេមិនឱ្យសុំទាននៅមុខសាលារៀន ឯរូបគេចង់ដាច់បាយម្តងៗទៅហើយ ។ ទោះបីជាបែបណា មិនគួរណាជនដៃដល់ជាអ្នកសុំទានស្រេកឃ្លានដល់ថ្នាក់ដាច់ចិត្តចាក់សម្លាប់មនុស្ស
ឡើយ ។ សូមបញ្ជាក់ថា លោក ស្រុី ឆៃគីម ត្រូវឃាតករចាក់មួយកូនកាំបិតចុងស្រួចចំចង្កេះខាងស្តាំ រងការចុកចាប់រហូតដល់ស្លាប់ ដោយគ្រូពេទ្យមិនអាចជួយសង្គ្រោះបាន ។
លោកគ្រូមួយរូបបានឱ្យដឹងថា ដោយសារតែលោកនាយកសាលារូបនេះក៏ជាគណៈកម្មការបោះឆ្នោតផងនោះ ទើបតម្រូវឱ្យប្រចាំការ សូម្បីតែថ្ងៃអាទិត្យក៏ត្រូវប្រចាំការដែរ ។ តាមមន្ត្រីអប់រំថា លោក ស្រុី ឆៃគីម ក៏ជិតដល់ឆ្នាំចូលនិវត្តន៍ដែរ មិនគួរណាលោកជួបគ្រោះអកុសលបែបនេះសោះ ។ សពលោក ស្រុី ឆៃគីម ត្រូវបានតម្កល់ធ្វើបុណ្យតាមប្រពៃណីនៅវត្តសន្សំកុសល ។ លោកក៏ធ្លាប់ជានាយករងសាលាបឋមសិក្សាទួលស្វាយព្រៃដែរ មុនពេលលោកមកធ្វើជានាយកសាលាបឋមសិក្សាទួលស្លែងនេះ ៕
ចែករំលែកព័តមាននេះ