ខេត្ដរតនគិរី ៖ ភ្នាក់ងារកាសែតមិនដែលឮឈ្មោះ «ជាតិសច្ចៈ» ប្រចាំនៅខេត្ដរតនគិរី ស្ទឹងត្រែង និងមណ្ឌលគិរី ចំនួន២នាក់ បានត្រូវក្រុមឈ្មួញរកស៊ីឈើព្រួតគ្នាវាយឱ្យរងរបួសយ៉ាងដំណំ កាលពីវេលាម៉ោង១១និង៣០នាទីព្រឹកថ្ងៃទី២២ មិថុនា នៅចំណុចផ្លូវបំបែកចូលភូមិស្រែគ ឃុំស្រែគ ស្រុកសេសាន ខេត្ដស្ទឹងត្រែង ។ នេះជាការប្រើហិង្សាលើកទី២ហើយមកលើក្រុមអ្នករាយការណ៍ព័ត៌មាននៅក្នុងខេត្ដស្ទឹងត្រែង ។
ប្រភពពីជនរងគ្រោះឈ្មោះ ថុន ប៊ុនធឿន ហៅម៉ៅ ភេទប្រុស អាយុ៥៣ឆ្នាំ ជាភ្នាក់ងារកាសែត «ជាតិសច្ចៈ» រស់នៅភូមិ១ សង្កាត់ឡាបានសៀក ក្រុងបានលុង រៀបរាប់ថា នៅថ្ងៃកើតហេតុ រូបគាត់បានរួមដំណើរជាមួយឈ្មោះ យ៉ាង យ៉ន ត្រូវជាបងជីដូនមួយទៅយកព័ត៌មាននៅឃុំស្រែគ ។ ពេលទៅដល់ភូមិស្រែគគាត់បើករថយន្ដម៉ាកកាមរី ស៊េរី១៩៩១ ពណ៌ទឹកសមុទ្រ ក្រឡឹងមួយជុំភូមិស្រែគនោះ រួចឈប់ហូបគុយទាវ កាហ្វេ ។
មួយសន្ទុះក្រោយមកក៏ត្រឡប់មកខេត្ដរតនគិរីវិញ ប៉ុន្ដែពេលមកដល់ចំណុចខាងលើ ស្រាប់តែឃើញមនុស្សមួយក្រុមមានគ្នា៧នាក់យកកំណាត់ឈើ៣ដុំដាក់កាត់ទទឹងផ្លូវស្ទាក់រថយន្ដគាត់ឱ្យឈប់ ហើយស្រែកថា ចាំមេខ្ញុំមកសិន ។ បន្ទាប់មកក៏ឃើញឈ្មោះ សិុន ថុន ដែលជាមេរបស់ពួកគេ ជិះរថយន្ដមកឈប់ទន្ទឹមគាត់ ហើយស្រែកថា «អាណាឱ្យអ្ហែងចូលមក បើតាចយឱ្យអ្ហែងចូលចាំអ្ហែងចូល!» និយាយរួចឈ្មោះ សិុន ថុន ចាប់រូបគាត់ដាល់ច្រើនដៃលើសៀតផ្កាខាងឆ្វេង បណ្ដាលឱ្យរងរបួសជាទម្ងន់ ។
លោក ថុង ប៊ុនធឿន រៀបរាប់ទៀតថា ក្នុងសកម្មភាពនោះ ឈ្មោះ សិុន ថុន បាននាំជនដៃដល់ចំនួន៧នាក់ទៀត ខ្លះស្លៀកពាក់ជាទាហានប៉ារ៉ា ខ្លះស្លៀកពាក់ស៊ីវិល មកព្រួតវាយតប់គាត់ឱ្យរងរបួសធ្ងន់ និងម្នាក់ទៀតចាប់ដៃក្រៀកស្លាបសេកទៅក្រោយ ប្រៀបដូចអ្នកទោស ឬចោរប្លន់ ។ ឈ្មោះ ស៊ិុន ថុន ត្រូវគេស្គាល់ថា ជាមេឈ្មួញម្នាក់លាក់ក្បាលបញ្ចេញកន្ទុយ មានវ័យប្រហែល៣៥ឆ្នាំ រស់នៅភូមិទេសអន្លង់ សង្កាត់បឹងកន្សែង ក្រុងបានលុង ខេត្ដរតនគិរី ។ ឈ្មោះ នេះធ្លាប់នាំបក្ខពួកវាយអ្នកកាសែតជាច្រើនដងមកហើយ ដែលកាលពីខែមេសា ឆ្នាំ២០១២ នៅវាលឆ្កែហត់ ឃុំត្រពាំងក្រហម ស្រុកកូនមុំ និងវាយអ្នកកាសែតម្នាក់កាលពីខែកុម្ភៈ ២០១៣ នៅត្រង់ផ្ទះបើកសិប្បកម្មរបស់ខ្លួន នៅបឹងកន្សែង ភូមិទេសអន្លង់ សង្កាត់បឹងកន្សែង ក្រុងបានលុង ។
ទោះបីជាមានសកម្មភាពប្រើច្បាប់ព្រៃដូច្នេះក្ដី ក៏ពុំដែលមានសមត្ថកិច្ចណាមួយចាត់ការ ឬអនុវត្ដតាមផ្លូវច្បាប់លើបុគ្គលនេះឡើយ ប្រហែលជាអំណាច ស៊ិន ថុន ធំជាងចៅហ្វាយខេត្ដហើយមើលទៅ ។ ចំពោះករណីចុងក្រោយកើតឡើងនៅភូមិស្រែគ ដោយក្រុមដៃដល់បានវាយអ្នកកាសែត និងដកហូតយកមេម៉ូរីម៉ាស៊ីនថត ពីក្រុមអ្នកកាសែតទៀតផង ហើយជនរងគ្រោះបានដាក់ពាក្យប្ដឹងនៅការិយាល័យស្រាវជ្រាវបទល្មើសព្រហ្មទណ្ឌនៃមន្ទីរស្រាវជ្រាវ និងយុត្ដិធម៌កងរាជអាវុធហត្ថខេត្ដស្ទឹងត្រែង ដើម្បីឱ្យសមត្ថកិច្ចជួយចាត់ការតាមផ្លូវច្បាប់រកយុត្ដិធម៌ឱ្យ ។
គេកំពុងទន្ទឹងរង់ចាំមើលថាតើឈ្មោះ ស៊ិន ថុន និងបក្ខពួកអាចចូលសំណាញ់ច្បាប់ដែរឬទេ ព្រោះសមត្ថកិច្ចកំពុងចាត់ការចំពោះរឿងហេតុខាងលើនេះហើយ ។
សូមបញ្ជាក់ថា ក្រុមឈ្មួញដែលតែងតែវាយអ្នកកាសែតនៅតំបន់ស្រែសាមី ស្រែគនេះ ដោយសារពួកគេជាឈ្មួញទុច្ចរិត រកស៊ីកាប់ឈើយ៉ាងអនាធិបតេយ្យនៅតំបន់នោះ និងក្នុងតំបន់អាងស្ដុកទឹក ដែលសាងសង់វារីអគ្គិសនីសេសាន ព្រោះខ្លាចបែកធ្លាយរឿងកាប់ឈើដល់អ្នកកាសែត ៕
ចែករំលែកព័តមាននេះ